Xionyoui kampa nesi tein kipia

Xionyoui kampa nesi tein kipia

 TAMACHTILIS 55

Iángel Jiova kiyekpia Ezequías

Iángel Jiova kiyekpia Ezequías

Akin nemiaj Asiria moaxkatilijkaj tekiuajyot Israel kampa pouiaj 10 uejueyi kalyetouanij. Axkan Senaquerib, akin tekiuajtia Asiria, no kinekia moaxkatilis tekiuajyot Judá kampa pouiaj ome uejueyi kalyetouanij. Yejua ika moaxkatilijtiyajki sejse xolal tein pouia Judá. Sayoj ke xolal tein okachi kinekia katka Jerusalén. Sayoj ke Senaquerib amo kimatia ke Jiova kimatampauijtoya nejon xolal.

Ezequías, akin tekiuajtia Judá, kimakak Senaquerib miak tomin porin amo kinekia maj kinteui. Maski Senaquerib kiselij tomin, kintitanik tel miakej tateuianij maj kinteuitij akin nemiaj Jerusalén. Itech xolal nochin tel mouiaj porin tateuianij ajsitiyayajya. Yejua ika Ezequías kiniluij: “Amo ximouikan. Akin kayomej Asiria chikaujkej, sayoj ke Jiova techchiuas okachi tichikaujkej ke yejuan”.

Senaquerib kititanik itanauatijkauj, akin moixmatia kemej rabsaqué, maj kinkejkeloti akin nemiaj Jerusalén. Nejon rabsaqué ijkatoya kalampa itech xolal uan kijtoj chikauak: “Jiova amo uelis namechpaleuis. Amo xikauakan maj Ezequías namechkajkayaua. Nion se tiotsin uelis namechpaleuis maj amo teyi tamechchiuilikan”.

Ezequías kitajtanij Jiova toni monekia kichiuas, uan Jiova kinankilij: “Amo xikmouili tein kijtoua rabsaqué. Senaquerib amo moaxkatilis Jerusalén”. Satepan, Senaquerib kititanilij Ezequías seki amamej tein kijtouayaj: “Ximotemakakanya. Jiova amo uelis namechmakixtis”. Ompa Ezequías kitataujtij Dios: “Jiova, ika kualtakayot, xitechmakixti, uan ijkon nochin kimatiskej ke sayoj tejua tiDios akin melauak”. Uan Jiova kinankilij: “Akin tekiuajti Asiria amo kalakis Jerusalén. Nejua nikmatampauiti noxolal”.

Senaquerib senkis kinemiliaya ke amo uejkaua moaxkatiliskia Jerusalén. Sayoj ke se youak, Jiova kititanik se ángel kampa tateuianij asirios kitalijkaj  inintakenkaluan, kalampa itech xolal. ¡Ángel kinmiktij 185,000 tateuianij! Itateuijkauan Senaquerib akin okachi chikaujkej katkaj mikkej uan yejua mokepak ichan iselti. Ijkon Jiova kiyekpiak Ezequías uan nochin akin nemiaj Jerusalén, ijkon kemej motenkaujka. Komo tiyetoskia Jerusalén itech nejon tonalmej, ¿titakuaujtamatiskia iuan Jiova?

“Iángel Jiova kinyoualojtinemi akin kimoujkatokaj uan kinmakixtia.” (Salmo 34:7)