Xionyoui kampa nesi tein kipia

Xionyoui kampa nesi tein kipia

 TAMACHTILIS 48

Oksepa nemi iokichpil se siuatsin

Oksepa nemi iokichpil se siuatsin

Keman tauaktoya, Jiova kiluij Elías: “Xiyouj Sarepta. Ompa nemi se siuatsin akin amo nemiok itakauj akin mitstamakas”. Ikalakyan altepet, Elías kiitak se siuatsin akin amo nemiaok itakauj akin kipanotoya tatasojtilis uan kiololojtoya kouit. Elías kitajtanij maj kimakani tepitsin at. Keman siuatsin kikuito at, Elías kiluij: “Ika kualtakayot, no xinechmaka sentakoton pantsin”. Sayoj ke siuatsin kinankilij: “Amo nikpia, amo ueli nimitsmaka nion teyi. Sayoj nikpia tepitsin harina uan tepitsin aceite tein ika nikchijchiuas tein tikuaskej nejua uan nokonetsin”. Elías kiluij: “Jiova motenkauak ke komo tinechchijchiuilia se pantsin, tikpias aceite uan harina hasta keman oksepa kiouis”.

Yejua ika siuatsin yajki ichan uan kichijchiuilij pantsin. Siuatsin uan iokichpil kipiakej tein kikuaskej nochi tonalmej keman tauaktoya, ijkon kemej Jiova motenkaujka. Komit kampa kitaliaya harina uan komit kampa kitaliaya aceite amo kaxankej.

Satepan panok se taman tein semi tetayokoltij. Iokichpil  siuatsin ueyi kokolispeuak uan momikilij, uan siuatsin kitataujtij Elías maj kipaleuiani. Elías kikuik okichpil akin siuatsin kinapalojtoya uan kiuikak tapan. Ompa, kitekak itech se tapech uan kichiuak netataujtil: “Jiova, ika kualtakayot, xikchiua maj oksepa nemi nejin okichpil”. ¿Tikmati keyej se kimoujkaitaskia maj Jiova kichiuani nejon? Porin hasta ijkuak, nion se aksa akin momikilijka oksepa kiselijka nemilis. Uan no, porin siuatsin uan iokichpil amo katkaj israelitas.

Ompa okichpil peuak mijyotia. Elías kiluij siuat: “¡Xikita! Mokonetsin yoltok”. Siuatsin tel yolpakik uan kiluij Elías: “Axkan nikmati ke yekmelauj tiitanauatijkauj Dios. Tein tikijtoua ualeua itenkopa Jiova, yejua ika nochipa mochiua”.

“Kuali xikitakan san in [...] cuervos, yejuan amo motatokiaj uan nion no kajokuij takilot uan amo no kipiaj sinkalme kampa taeutinemij. Pero Namoueyitajtsin nachipa kintamakatok ne tototsitsin. ¿Xe amo namejuan kachi nantayekantokke iuan Dios uan ke ne tototsitsin?” (Lucas 12:24)