Ichan tekiuaj Acab moajsia Jezreel. Ompa uelia kipanitaya iuvajtal se takat akin motokaytiaya Nabot. Acab kinekia nejon tal uan kinekik kikouilis Nabot. Sayoj ke Nabot amo kinekik kinamakiltis porin iTanauatil Jiova kijtouaya ke amo uelia se kinnamakaya talmej tein tekauiliayaj se itatuan. Nabot kichiuak tein monekia. ¿Tiknemilia ke Acab kiuelitak nejon? Amo, ta tel kualanik. Kemej tel kualantoya, amo kinekia kisas kampa kochia nion kinekia takuas.

Inamik Acab katka Jezabel, akin tel amo yolkuali katka. Jezabel kiluij: “Tejua titekiuaj itech xolal Israel, yejua ika uelis tikpias nochi tein tiknekis. Nejua nikchiuas xikpia nejon tal”. Ompa, kijkuiloj seki amamej tein kintitanilij tayekananij itech xolal. Itech nejon amamej kinnauatij maj kipantikan Nabot ke kiuijuikaltij Dios uan maj satepan kitetemakan hasta maj miki. Tayekananij kichiujkej nochi tein Jezabel kinnauatij. Satepan, Jezabel kiluij Acab: “Nabot momikilijya. Moaxkaya iuvajtal”.

Jezabel amo sayoj kimiktij Nabot, ta kinmiktij oksekin akin no amo teyi kichiujkaj. Kinmiktij miakej akin kitasojtayaj Jiova. No kinueyichiuaya tiotsitsin uan kichiuaya okseki taman tein tel amo kuali. Sayoj ke Jiova kiitstoya nochi nejon. ¿Toni kichiuaskia Jiova iuan Jezabel?

Satepan ke Acab momikilij, itelpoch, Jehoram, peuak tekiuajti. Ompa Jiova kititanik se takat akin monotsaya Jehú maj kitatsakuiltiti Jezabel uan ichankauan.

Jehú tejkok itech icarro uan yajki Jezreel, kampa nemia Jezabel. Jehoram no yajki itech icarro kinamikito Jehú. Keman kiitak, Jehoram kitajtanij: “¿Onkak yolseuilis?”. Jehú kinankilij: “Amo onkas yolseuilis komo momomaj,  Jezabel, kisentoka kichiua tein amo kuali”. Jehoram kinekik cholos, sayoj ke Jehú kitamotilij se flecha uan kimiktij.

Satepan, Jehú yajki ichan Jezabel. Keman kimatik ke Jehú ualaya, moixtapaluij, mokuaxiluij uan kichiak inakastan ventana tein yetoya ajko. Keman Jehú ajsik, Jezabel amo kiyektajpaloj. Jehú kinajkotsajtsilij tekitinij akin yetoyaj iuan Jezabel: “¡Xikpankajkauakan!”. Yejuan kitopeujkej, uan Jezabel panuetsik uan mikik.

Ompa, Jehú kinmiktij 70 ikoneuan Acab uan kichiuak maj amo akin kiueyichiuaniok Baal. Kemej tikitaj, Jiova kimati nochi uan kintatsakuiltia keman moneki akin kichiuaj tein amo kuali.