Xionyoui kampa nesi tein kipia

Xionyoui kampa nesi tein kipia

 TAMACHTILIS 35

Ana kitajtania Jiova se konetsin

Ana kitajtania Jiova se konetsin

Elcaná katka se israelita akin kinpiaya ome siuamej: Ana uan Peniná. Sayoj ke Elcaná okachi kitasojtaya Ana. Peniná kinpiaya miakej konemej, sayoj ke Ana amo kipiaya nion se. Yejua ika, Peniná kikejkelouaya Ana. Nochi xiujmej, Elcaná kinuikaya ichankauan maj kiueyichiuatij Jiova itech tabernáculo ompa Siló. Se tonal, keman ompa yetoyaj, Elcaná kiitak ke Ana, akin semi kitasojtaya, tel tayokoxtoya. Yejua ika kiyemankailuij: “Amo xichoka, Ana. Nejua mouan niyetok, uan semi nimitstasojta”.

Satepan, Ana kichiuato netataujtil iselti. Kisentokaya chokaya, uan kitataujtij Jiova maj kipaleui. Motenkauak iuan: “Jiova, komo tinechmaka se okichpiltsin, nimitsmaktilis maj mitstekitili nochi inemilis”.

Elí, akin kinixyekanaya tiopixkamej, kiitak ke Ana chokatoya uan ke sayoj kioliniaya itenxipal, uan kinemilij ke uintitoya. Ana kiluij: “Amo, tejuatsin, amo niuintitok. Nikpia se ueyi ouijkayot uan niktataujtijtoya Jiova”. Elí kiitak ke mopoloj uan kiluij Ana: “Maj Jiova mitsmaka tein tiktajtanij”. Ana okachi kuali momachilij uan yajki. Keman ayamo ajsia se xiuit, Ana kipiak se okichpil uan kitokaytij Samuel. ¿Tiknemilia keniuj semi yolpakik Ana?

 Ana amo kielkauak tein motenkaujka iuan Jiova. Niman keman amo yejuaok kitamakaya Samuel, kikauato tabernáculo maj kitekitili Dios. Ana kiluij Elí: “Niktataujtij Jiova maj nechmakani nejin okichpiltsin. Axkan nikmaktilia maj kitekitili nochi inemilis”. Elcaná uan Ana kikalpanouayaj Samuel nochi xiujmej uan kiuikiliayaj se yankuik taken makojkotoltik. Satepan, Jiova kichiuak maj Ana kinpiani okseki eyi okichpipil uan ome siuapipil.

“Xitajtanilikan Dios uan namechmaktis ne ten moneki. Ijkon keme tensa se kiyektemoa de se kipoloa, no ijkon xiktatatautilikan Dios uan Yejuatsin namechseliltis.” (Mateo 7:7)