Xionyoui kampa nesi tein kipia

Xionyoui kampa nesi tein kipia

 TAMACHTILIS 17

Moisés kiixpejpena kiueyichiuas Jiova

Moisés kiixpejpena kiueyichiuas Jiova

Keman nemiajok Egipto, ichankauan Jacob kinixmatkej kemej israelitas. Satepan ke Jacob uan José momikilijkej, se yankuik faraón peuak tekiuajti. Nejin faraón mouia porin israelitas okachi momiakilijtoyaj ke egipcios. Yejua ika peuak kinteltekitiltia. Kinchikaujkauiaya maj kichijchiuanij ladrillos uan maj tel tekitinij kampa tatokayaj. Maski egipcios okachi kintajyouiltiayaj, israelitas okachi momiakiliayaj. Kemej faraón amo kiuelitaya nejon, tanauatij maj kinmiktianij nochin okichpipil israelitas akin yekin yoliaj, sayoj siuapipil amo. ¿Tiknemilia keniuj tel mouiaj israelitas?

Se siuat israelita akin monotsaya Jokébed kipiak se konetsin tel kuakualtsin. Kemej amo kinekia maj kimiktikan, kitalij itech se chikiuit tein kitatij xiujtsalan itech ueyiat Nilo. Míriam, iikniuj konetsin, mokauak ompakauin uan ijkon kiitaskia toni panouaya.

Iichpoch faraón yajki mopakato itech ueyiat uan kiitak chikiuit. Taijtik kiitak se konetsin  chokatoya, uan kiiknelij. Míriam kitajtanij: “¿Tikneki maj niktemoti se siuat akin kitamakas konetsin?”. Yejua kijtoj ke kemaj, uan Míriam kikuito imomaj. Iichpoch faraón kiluij Jokébed: “Xikuika nejin konetsin, xikyekpia uan nimitstaxtauis”.

Keman konetsin moskaltij, Jokébed kiuikilij iichpoch faraón. Yejua kitokaytij Moisés uan kiiskaltij kemej yeskia ikonetsin. Moisés kiitayaj kemej ichankauj faraón uan uelia kipiaya nochi tein kinekia. Sayoj ke amo keman kielkauak Jiova. Moisés kimatia ke tein melauj yejua katka israelita, amo egipcio, uan kiixpejpenak kitekitilis Jiova.

Keman kipiaya 40 xiujmej, Moisés kiixtalij kinpaleuis akin pouiaj itech ixolal. Se tonal, kiitak se egipcio kiteuijtoya se takeual israelita. Keman kiitak nejon, Moisés semi chikauak kiteuij egipcio uan mikik, uan kitatij itech xal. Keman faraón kimatik, kinekik kimiktis Moisés, sayoj ke yejua choloj uan yajki Madián. Ompa Jiova kiyekpiak.

“Moisés takuautamatinemik iuan Dios. lka ya nojon [...] amo kineyik ok ma in tagayot ma kipouakan Moisés ke yejua tekoneu den isuapil den rey Faraón. Ta, Moisés kachi kiyolnejnekik ma no tajyouijtinemi ijkon keme tajyouitinemij ipueblojkauan de Dios.” (Hebreos 11:24, 25)