Xionyoui kampa nesi tein kipia

Xionyoui kampa nesi tein kipia

 TAMACHTILIS 3

Adán uan Eva amo kitakamatij Dios

Adán uan Eva amo kitakamatij Dios

Se tonal, keman Eva yetoya iselti, se kouat iuan tajtoj. Kitajtanij: “¿Yekmelauj Dios amo namechkaua xikuakan nion se koujtakilot?”. Eva kinankilij: “Ueli tikuaj tein yeski takilot, sayoj itakilo se kouit amo. Komo tikuaj itakilo nejon kouit, timikiskej”. Kouat kijtoj: “Amo nanmikiskej. Komo nankikuaj, nanyeskij kemej Dios”. ¿Katka melauak nejon? Amo. Kouat kikajkayaujtoya, uan Eva kineltokilij. Ijkon kemej okachi kiitaya nejon takilot, okachi kinekia kikuas. Yejua ika kikuaj uan no kimakak Adán. Maski kimatia ke momikiliskiaj komo amo kitakamatiaj Dios, Adán kikuaj takilot.

Nejon tiotak, Jiova iniuan tajtoj Adán uan Eva. Kintajtanij keyej amo kitakamatkej. Eva kitajtakoltij kouat, uan Adán kitajtakoltij Eva. Kemej Adán uan Eva amo tatakamatkej, Jiova kinkalankixtij. Uan no, ikalakyan xochital kintalij ángeles uan se espada tein xotatoya uan ijkon amo keman ueliskiaj mokepaskej.

Jiova kijtoj ke no kitatsakuiltiskia akin kikajkayauak Eva. Tein melauj, amo yejua kouat tajtoj iuan. Jiova amo kinchijchiuak kouamej maj tajtokan. Se ángel akin amo yolkuali kichiuak maj kouat tajtouani. Kinekia kikajkayauas Eva. Nejon ángel monotsa Satanás, akin no moixmati kemej Amokuali. Satepan, Jiova kiixpolos Satanás. Ijkon, amo kisentokas kinkajkayauas taltikpakneminij maj kichiuakan tein amo kuali.

“Ne amokuali Satanás ipa temiktijke desde ne tonal kuak tatsinpeuak nochi. Uan yejua amo keman kitekitiltia ten melau.” (Juan 8:44)