Xionyoui kampa nesi tein kipia

Xionyoui kampa nesi tein kipia

 TAMACHTILIS 94

Kiseliaj yektikatsin espíritu

Kiseliaj yektikatsin espíritu

Majtakti tonalmej satepan ke Jesús mokepak iluikak, imomachtijkauan kiselijkej yektikatsin espíritu. Mochiujtoya Iluit Pentecostés itech xiuit 33, uan taltikpakneminij akin miakkan ualeuayaj ajsikaj Jerusalén. Kemej 120 imomachtijkauan Jesús mosentilijkaj ajko itech se kali, uan mochiuak se taman tein kitelmoujkaitakej. Se taman kemej se tit nesik itech inintsontekon sejse, uan nochin peuak tajtouaj tataman tajtolmej. Uan no, mokakik ke chikauak taejekaya itech nochi kali.

Taltikpakneminij kikakkej ke takakistik uan ijsiujka kiitatoj toni panotoya. Semi kinmoujkakakkej imomachtijkauan Jesús keman tajtojtoyaj itech okseki tajtolmej. Kijtouayaj: “Nejin taltikpakneminij kayomej Galilea. Komo ijkon, ¿keyej uelij tajtouaj totajtoluan?”.

Ompa, Pedro uan okseki tatitanilmej moketskej ininixpan nochin. Pedro kinmelauilij: “Namejuan nankimiktijkej Jesús, sayoj ke Jiova kiajokuik. Axkan Jesús yetok iluikak iyekmakopa Dios. Uan  techmakak yektikatsin espíritu tein motenkaujka techmakas. Yejua ika nankiitakej uan nankikakkej nejin uejueyi tachiualismej”.

Taltikpakneminij kitelmoujkakakkej. Itajtoluan Pedro kinyololinij, yejua ika tajtankej: “¿Toni moneki tikchiuaskej?”. Yejua kinnankilij: “Ximoyolnonotsakan uan ximoauikan itokaykopa Jesús. Satepan no nankiseliskej yektikatsin espíritu”. Nejon tonal moauijkej kemej 3,000 taltikpakneminij. Ijkuak, peuak momiakiliaj imomachtijkauan Jesús ompa Jerusalén. Yektikatsin espíritu kinpaleuij tatitanilmej maj kipeualtianij okachi nechikolmej. Ijkon uelik tamachtijkej nochi tein Jesús kinnauatijka.

“Komo namejuan nankiyekijtoaj senteixteno ke Jesucristo Yejuatsin namotekotsin, uan no komo nantakuautamatij ika nochi namoyolojuan ke Dios kipankixtij yoltok [...], ijkuakon Dios namechmakixtis.” (Romanos 10:9)