Xionyoui kampa nesi tein kipia

Xionyoui kampa nesi tein kipia

 TAMACHTILIS 72

Okichpil Jesús

Okichpil Jesús

José uan María nemiaj Nazaret iuan Jesús uan okseki ininokichpipiluan uan ininsiuapipiluan. José tekitia kemej koujxijxinkej uan ijkon kinixpanoltiaya ichankauan. Uan no, kinpaleuiaya maj kiixmatikan Jiova uan iTanauatil. Nochin momattoyaj yaskej sinagoga kiueyichiuatij Dios uan no yayaj Jerusalén kichiuatij Pascua sejse xiuit.

Keman Jesús kipiaya 12 xiujmej, ichankauan uejka ojtokakej hasta Jerusalén, kemej ipa. No yajkaj tel miakej akin seseko kayomej kichiuatoj Pascua. Keman tamik nejon iluit, José uan María oksepa peuak ojtokaj hasta ininchan uan kinemiliayaj ke Jesús yaya iniuan. Sayoj ke keman peuak kiixtemouaj, amo kiajsikej.

Yejua ika mokepkej Jerusalén uan eyi tonal kitemojtinenkej hasta ke kiajsikej itech templo. Ompa yetoya Jesús, tokotsyetoya iniuan tamachtianij, kuali kinkaktoya uan kinchiuilijtoya kuali netajtanilmej. Tamachtianij semi kimoujkakakiaj tein Jesús kijtouaya  uan yejua ika peuak kichiuiliaj netajtanilmej. Semi kimoujkakakiaj tein kinnankiliaya. Kiitakej ke Jesús kuali kiajsikamatia iTanauatil Jiova.

José uan María semi motekipachojtoyaj. María kiluij: “Nokonetsin, noyampa timitstemojtinenkej. ¿Kani tiyetoya?”. Uan Jesús kinankilij: “¿Amo nankimatiaj ke moneki niyetos ichan noTajtsin?”.

Jesús mokepak Nazaret iniuan itatuan. Ompa, José kimachtij Jesús keniuj koujxijximas. ¿Toni tiknemilia? ¿Keniuj katka Jesús keman katka telpoch? Ijkon kemej moskaltijtiyaya, Jesús okachi mochiujtiyaya tamatkej. Yejua ika Dios uan taltikpakneminij okachi kitasojtayaj.

“Nikchiuas motanejnekilis, noDios, nechtelyolpaktia, uan motanauatil moajsi noyolijtik.” (Salmo 40:8)