Xionyoui kampa nesi tein kipia

Xionyoui kampa nesi tein kipia

 TAMAJSIKAYOT

¿Kuali maj tikchiuakan iluimej?

¿Kuali maj tikchiuakan iluimej?

BIBLIA amo kipeualtij iluimej tein kichiuaj itech taneltokalis tein amo melauak, itech kaltamachtiloyan, itech altepemej uan oksekiok tein noyampa moixmatij axkan. Komo amo, ¿kani ualeujkej? Komo ueli tionyoui itech se biblioteca, ompa tikonajsis amaixmej kampa ika motajtoua iluimej tein moixmatij kampa tejuatsin tionnemi. Maj tikitakan seki neskayomej.

Semana Santa. Maski itech nejon tonalmej kijtouaj kielnamikij imikilis uan ineajokuilis Jesús, mochiua miak taman tein Biblia amo tanauatia. Se taman yejua keman tatamalakacholtiaj.  Kemej kijtoua amaix Las Grandes Religiones Ilustradas, achtopa keman Cristo ualaskia, babilonios “kintelyekpiayaj tiotsitsin [...]. Kinpikiaj ika taken tel patiyoj, kintaliliayaj koskamej, brazaletes uan anillos; kintekayaj itech tapechmej tein tel patiyoj uan kintamalakacholtiayaj”.

Yankuik Xiuit. Itech se ueyi altepet iuan okse, mopata kemej kichiuaj uan keman kichiuaj Yankuik Xiuit. Se amaix kampa kinextia kani ualeuak, kijtoua: “Itech xiuit 46 achtopa ke ualaskia Cristo, tekiuaj romano Julio César, kitalij yekinika tonal enero keman iluichiuaskiaj itech Yankuik Xiuit. Romanos kiixtalijkej nejon tonal keman kiiluichiuiliskiaj Jano, itiotsin ikalakyan uan ipeujyan, tein kipiaya ome iixko: se tachixtoya taixpan uan okse taikan. Uan metsti enero [itech tajtol latín moijtoua, Januarius] kitokaytijkej kemej dios Jano” (The World Book Encyclopedia). Nejin kinextia ke tein kichiuaj itech Yankuik Xiuit amo ualeua itech Biblia.

IninTonal mikemej (Todos santos). Se amaix kijtoua: “IninTonal Mikemej, [...] ijkuak Iglesia Católica Romana, kiixtalij maj kinelnamikikan mikemej tein yolmelaujkej. [...] Miak taman tein kineltokaj uan mochiua itech ininTonal Mikemej, ualeua itech taneltokalis tein amo melauak uan amo se kimati kemanian peuak kineltokaj nejon. Miakej koujtaj tekitinij akin kayomej itech uejueyi altepemej católicos, kijtouaj ke itech ininyoual Mikemej, mokepaj ininchan kampa achto nemiaj uan iniuan takuaj akin yoltokej” (La edición de 1910 de The Encyclopædia Britannica).

Okseki iluimej. Amo ueli ika titajtouaj nochin iluimej tein noyampa mochiuaj. Tein kemaj, Jiova amo kiyolpaktia nion se iluit tein kinueyichiua taltikpakneminij, taltikpak tekiuajyomej oso oksekiok (Jeremías 17:5-7; Hechos 10:25, 26). Uan no, tein mitsonpaleuis tikonmatis komo se iluit tein kichiuaj itech taneltokalis kiyolpaktia Dios oso amo, moneki tikonitas kani ualeua (Isaías 52:11; Apocalipsis 18:4). Itayolmajxitilis Biblia tein motemakak itech capítulo 16, mitsonpaleuis xikonmati keniuj kiita Dios maj se kichiua iluimej tein mochiuaj itech kaltamachtiloyan, itech altepemej uan oksekiok.