Xionyoui kampa nesi tein kipia

Xionyoui kampa nesi tein kipia

 TAMACHTILIS 6

¿Oksepa tikinitaskej akin momikilijkejya?

¿Oksepa tikinitaskej akin momikilijkejya?

1. ¿Toni panos iniuan akin momikilijkejya?

Se tonal, keman Jesús nemia nikan taltikpak, itasojikniuj Lázaro momikilij. Yejua nemia itech xolal Betania, tein amo uejka moajsia iuan Jerusalén. Keman Jesús ajsik ompa, Lázaro momikilijkaya naui tonal achto. Iuan Marta uan María, iikniuan akin momikilijkaya, Jesús yajki kampa kipachojkaj uan niman miakej mosentilijkej. ¿Uelis tionmonemilis keniuj yolpakkej Marta uan María keman Jesús kiajokuik Lázaro? Xikonixtajtolti Juan 11:21-24, 38-44.

Se kuali tanauatil tein moajsi itech Biblia, yejua ke onkas neajokuilis. Marta kimatiaya ke Jiova kinajokuis mikemej uan oksepa kichiuas maj nemikan nikan taltikpak. Xikonixtajtolti Job 14:14, 15.

2. ¿Keniuj moajsij mikemej?

Dios kiiluij Adán: “Titalnex uan talnex timokepas” (GÉNESIS 3:19)

Taltikpakneminij chijchiujtokej ika talnex (Génesis 2:7; 3:19). Keman timomikiliaj amo tiksentokaj tinemij okseko. Tokuatixyo no miki uan amo teyi tiknemiliajok. Yejua ika, Lázaro amo teyi kijtoj tein panok keman miket katka porin mikemej amo teyi kimatij. Xikonixtajtolti Eclesiastés 9:5, 6, 10.

¿Tetajyouiltia Dios ika tit satepan ijkuak se momikilia? Amo, ta kemej tikitakejya, mikemej amo teyi kimatij. Uan keman motamachtia ke onkak se miktan kichiua maj kipantikan Dios ika teisa tein amo kichiujtok. Yejuatsin nion kinemilia uan semi kitauelita kintajyouiltis taltikpakneminij itech tit. Xikonixtajtolti Jeremías 7:31.

Xikonita video ¿Keniuj moajsij mikemej?

 3. ¿Ueli titajtouaj iniuan mikemej?

Mikemej amo uelij tajtouaj nion takakij (Salmo 115:17). Sayoj ke moajsij seki ángeles tein amo yolkualmej, uan yejuan uelij tajtouaj iniuan taltikpakneminij uan kichiuaj maj kinemilikan ke yejuan mikemej akin tajtouaj (Judas 6). Jiova techtakaualtia maj amo tikyejyekokan titajtoskej iniuan mikemej. Xikonixtajtolti Deuteronomio 18:10, 11.

4. ¿Akonimej oksepa nemiskej?

Tel miakej taltikpakneminij akin momikilijkejya oksepa nemiskej nikan taltikpak. Uan no moajokuiskej sekin akin amo kiixmatkej Dios uan kichiujkej tein amo kuali. Xikonixtajtolti Lucas 23:43, TNM, uan Hechos 24:15.

Akin moajokuiskej uelis kimatiskej akoni yekmelauj Dios uan takuaujtamatiskej iuan Jesús uan kitakamatiskej (Apocalipsis 20:11-13). Uan komo ijkon kichiuaj, uelis nemiskej ika yolpakilis nochipaya nikan taltikpak. Xikonixtajtolti Juan 5:28, 29.

5. ¿Toni technextilia Jiova ika neajokuilis?

Uelis oksepa tikinitaskej akin momikilijkejya porin Dios kiualtitanik iKonetsin maj toka momikiliki. Ijkon, ika neajokuilis Jiova kinextia inetasojtalis uan tatiochiualis tein amo technamiki maj techmaka. Keman oksepa nemiskej akin momikilijkejya, ¿akoni tikonnekiskia tikonitas tejuatsin? Xikonixtajtolti Juan 3:16 uan Romanos 6:23.