Xionyoui kampa nesi tein kipia

Xionyoui kampa nesi tein kipia

 TAMAJSIKAYOT

Keniuj tikmelauaskej kuejmol tein mochiua ika tanamakalis

Keniuj tikmelauaskej kuejmol tein mochiua ika tanamakalis

Itech 1 Corintios 6:1-8, tatitanil Pablo ika tajtoj kuejmolmej tein kipia se tokniuj iuan okse. Yekinika, kijtoj ke semi mokualantijtoya porin sekin itatojtokakauan Cristo kayomej Corinto, moixeuiayaj ‘moteluilitiuij imin iixpan jueces’ (versículo 1). Satepan kijtoj ke kuejmolmej moneki kimelauaskej itech nechikol uan amo imin ixpan tekiuanij. Maj tikitakan keyej ijkon kijtoj itech icarta tein Dios kimatiltij, uan satepan, tikitaskej seki tachiualismej tein amo uelis momelauas itech nechikol.

Keman tein kichiuaj kemej Cristo kipiaj kuejmolmej ika tanamakalis, Jiova kichia maj kimelauakan kemej yejuatsin kineki uan amo kemej tejuan tiknekiskej (Proverbios 14:12). Kemej kinextij Jesús, moneki niman tikmelauaskej uan amo tikauaskej maj ueyia (Mateo 5:23-26). Semi tetayokoltij tikijtoskej ke sekin itatojtokakauan Cristo kiuelitaj kichiuaskej maj ueyia kuejmol uan ika tami youij imin ixpan tekiuanij. Sayoj ke Pablo kinextij ke ‘kinueyipinaujtia komo onkatok neteluililis inintechkakopaka’. ¿Keyej kinueyipinaujtia? Porin uelis amo kuali ika motajtos itokay Dios uan inechikol. Sayoj ke tein techpaleuis maj amo pano nejon, moneki tikchiuaskej tein tatitanil kijtoua: “Kachi kuali ximotekauilikan [...] maj namechchiuilikan tensa chiualis ten amokuali” (versículo 7).

Pablo no kinextij ke Dios kitalijtok itech nechikol tein techtelpaleuia maj tikmelauakan kuejmolmej. Kijtoua ke ompa moajsij takamej tein kipiaj tamatilis porin momachtiaj Biblia. Kemaj, tayekananij “uelis kinixkomakas[kej] in tokniuan” itech “miak tataman neteluililismej de nikan taltikpak” (versículos 3-5). Uan no, Jesús kijtoj ke ijkuak tikmelauaskej se ueyi kuejmol —xa keman techtakajkayauiliaj oso techkuiliaj teisa ika xolopijyot—, moneki tikchiuaskej eyi taman. Yekinika, tikyejyekoskej tikmelauaskej kuejmol iuan okse toselti; komo amo uelik, ika ome, uelis timosentiliskej imiuan se oso ome taixpantinij; uan komo amo no uelik, ika eyi, tiyaskej imiuan tokniuan tayekananij tein tajtouaj itenkopa nechikol (Mateo 18:15-17).

 Sayoj ke tayekananij amo kiselijtokej tanauatil maj tapaleuikan oso maj tayolmajxitikan itech tanamakalis, niono kinextiskej ke yejua nejon kichiujtokej. Amo no kiniluiskej keniuj kimelauaskej kuejmol tein kipiaj ika tanamakalis ome tokniuan. Ta kinpaleuiskej maj omen kichiuakan kemej kijtoua principios tein kipia Biblia tein kiniuikas maj kualtsin moyekkauakan. Komo tel ouij kuejmol, xa kinemiliskej kixejekoltiskej tokniuj takalpanojkej oso imin sucursal itaixpantijkauan Jiova. Sayoj ke moajsi seki tachiualismej tein amo nochipa uelis momelauas itech nechikol kemej tayolmajxitij Pablo. Maj tikitakan seki.

Timoteluiliskej imin ixpan tekiuanij amo nochipa kijtosneki ke sayoj tikitaj totanejnekilis. Nejon xa moneki tikchiuaskej porin ijkon kijtoua imin tanauatil tekiuanij. Tikitatij seki neskayomej: uelis namikuanij kitsayanaskej amat imin ixpan tekiuanij, moijtos akoni imako mokauas se konetsin, moijtos kanachi kiselijtos tein ika ixpanos, kiseliskej inepaleuil tein kitemaka se seguro, oso kiselis tomin akin tetaneujtij itech se tanamakalis tein amo kualtiak. Uan no, se tein kichiua kemej Cristo xa kinemilis moteluilis porin ijkon uelis mopaleuis ika tein kiteluiliaj. *

Itatojtokakauj Cristo tein kipanotos tachiualismej kemej nejon, uan youi moteluiliti imin ixpan tekiuanij, sayoj ke amo kichiua porin kineki momakepas, amo kitapanauilijtoskia tein kiteajsikamatiltia itayolmajxitilis Pablo. * Maj amo tikelkauakan ke moneki tiktayekanaltiskej maj moueyitali itokay Dios Jiova, maj timoyekuikakan itech nechikol uan maj tiolochyetokan. Tein okachi techteixmatiltia ke tiitatojtokakauan Cristo, yejua netasojtalis, se netasojtalis tein “amo [...] kinemilijtinemi sayoj ten niaxka” (1 Corintios 13:4, 5; Juan 13:34, 35).

^ párr. 2 Komo se itatojtokakauj Cristo kichiuilia aksa tein tel amo kuali —se teisa tein amo semi panoua, xa keman teikamauiltia, tateuia, temiktia oso ueyi tachteki—, amo kitapanauiliskiaj tein kijtoua Biblia komo kiteluiliaj imin ixpan tekiuanij maski nejon kiuikaskia maj kitsakuakan.

^ párr. 3 Komo tikonneki tikonmatis okachi, xikonita La Atalaya 15 de marzo de 1997, págs. 17-22, uan 15 de octubre de 1991, págs. 25-28.