Xionyoui kampa nesi tein kipia

Xionyoui kampa nesi tein kipia

Espíritus amo nemij nikan taltikpak niono mikij nikan

Espíritus amo nemij nikan taltikpak niono mikij nikan

¡Espíritus kemaj nemij! Kampa nemij espíritus moajsij tein yolkualmej uan tein amo yolkualmej. ¿Yejuan taltikpakneminij tein nenkej uan mikkej nikan taltikpak?

Amo, amo yejuan. Keman aksa momikilia, amo nemiti imiuan espíritus kemej miakej kinemiliaj. ¿Keniuj tikmatij? Porin Biblia ijkon kijtoua. Biblia se amaix tein kijtoua tein melauak uan ualeua imako Dios tein sayoj yejuatsin melauak uan motokaytia Jiova. Yejuatsin kinchijchiuak taltikpakneminij, yejika kuali kimati toni kinpanoua keman momikiliaj (Salmo 83:18; 2 Timoteo 3:16).

Adán kichijchiujkej ika talnex uan talnex mokepak

Biblia kijtoua ke Dios kichijchiuak yekinika takat Adán “ika talnex” (Génesis 2:7). Dios kitalij itech Xochital tein moajsia Edén. Komo Adán kitakamatiskia itanauatiluan Jiova, amo momikiliskia; kisentokaskia nemiskia axkan nikan taltikpak. Sayoj ke ijkuak Adán amo kitakamatik itanauatiluan Dios maski kimatia toni kipanos, Dios kiiluij: “Timokepas itech tal, porin ika tichijchiujtok. Ta tejua titalnex uan talnex timokepas” (Génesis 3:19).

¿Toni kijtosneki? Maj timonemilikan nejin, ¿kani yetoya Adán achtopa ke Jiova kichijchiuaskia ika talnex? Amo yetoya kansaika. Amo katka se espíritu ne iluikak tein ayamo yolia nikan taltikpak. Yejua amo nemia. Yejika keman Jiova kiiluij Adán ke ‘mokepaskia talnex’, kijtosnekia ke momikiliskia. Yejua amo yajki kampa yetokej espíritus. Keman Adán momikilij, oksepa amo nemia. Mikilis amo nenken ijkuitik kemej nemilis.

 Sayoj ke, ¿toni kinpanoua oksekin taltikpakneminij tein momikiliaj? ¿Amo no nemijok? Biblia kinankilia nejin netajtanilmej:

  • “Nochin [kemej taltikpakneminij uan tapialmej] sekosaj youij. Nochin chijchiujtokej ika talnex, uan nochin mokepaj talnex.” (Eclesiastés 3:20.)

  • “Akin momikilijkejya, [...] amo kimatijok nionteyi.” (Eclesiastés 9:5.)

  • “Imin netasojtalis, imin netauelitalis uan imin chauatilis tamikya.” (Eclesiastés 9:6.)

  • “Amo teyi tekitok, niono teisa tein monemilia mochijchiuas, niono taixmatilis, niono tamatilis itech Seol [taltekoch] kampa tiyouj.” (Eclesiastés 9:10.)

  • “[Taltikpaknenkej] mokepa itech tal; uan ijkuak, yekmelauj poliui itanemililuan.” (Salmo 146:4.)

Sayoj tein yoltokej uelij tekitij

¿Ouij mitsonkisa tikoneltokas tein kijtouaj nejin textos itech Biblia? Komo ijkon, xikonnemili  nejin: itech miakej kalyetouanij, tetakauj kitani tomin tein ika kintekipanos ichankauan. Keman takat momikilia, ichankauan kipanouaj ouijkayomej. Iksa temomaj uan tekoneuan amo kinajsi tomin tein ika kikouaskej tein kikuaskej. Xa oksekin tein kitauelitayaj tetakauj, kinchiuiliaj tein amo kuali ichankauan. Axkan xionmotajtani nejin: ‘Komo nejon takat nemi kampa yetokej espíritus, ¿keyej amo kisentoka kintekipanoua ichankauan? ¿Keyej amo kinpaleuia maj amo kinchiuilikan tein amo kuali?’. Nejin amo mochiua porin textos tein tikitakej, kijtoua tein melauak. Nejon takat amo nemiok; amo ueliok kichiua nionteyi (Salmo 115:17).

Mikemej amo uelij kinpaleuiaj akin kipanouaj mayan, niono uelij kinpaleuiaj akin kichiuiliaj tein amo kuali

¿Kijtosneki nejin ke mikemej amo keman nemiskej oksepa? Amo, amo yejua kijtosneki. Satepan ika titajtoskej neajokuilis. Sayoj ke nejin kemaj kijtosneki ke mikemej amo kimatij tein tikonchiua. Amo uelij mitsonitaj, mitsonkakij niono uelij tajtouaj mouantsin. Amo onkak keyej tikoninmouilis. Yejuan amo uelij mitsonpaleuiaj niono mitsonijtakouaj (Eclesiastés 9:4; Isaías 26:14).