Xionyoui kampa nesi tein kipia

Xionyoui kampa nesi tein kipia

Tanojnots 75: Naui konemej tein moajsiaj Babilonia

Tanojnots 75: Naui konemej tein moajsiaj Babilonia

TEKIUAJ Nabucodonosor kiniuikak Babilonia israelitas tein okachi tamachtilmej. Satepan, kinijitak telpochmej tein okachi kualtsitsin uan tamatinij. Itech taixkopin tikinita nauin. Se motokaytia Daniel uan oksekin telpochmej, babilonios kintokaytijkej Sadrac, Mesac uan Abednego.

Nabucodonosor kinekia kuali kinimachtis uan ijkon tekitiskiaj itech ikaltekiuaj. Satepan keman kipanoskiaj eyi xiuit itech nemachtil, sayoj kinijitaskia tein okachi tamatinij tein kipaleuiskiaj maj kimelaua kuejmolmej. Kinekia maj telpochmej eskiaj chikaujkej, yejika tanauatij maj kinimakanij takual uan tayil tein yejua uan ichankauan kinimakayaj.

Daniel, Sadrac, Mesac uan Abednego kimelaujtokej tein kineltokaj

Xikita telpoch Daniel. ¿Tikmati toni kiiluijtok Aspenaz, itayekankatakeual Nabucodonosor? Kiiluijtok ika amo kineki kikuas takual tel uejuelik tein kimakayaj tekiuaj. Sayoj ika Aspenaz motekipachoj. Kiiluij: ‘Tekiuaj kijtoj tein nankikuaskej uan tein nantayiskej. Uan komo amo namoitaj nanchikaujkej kemej oksekin telpochmej, uelis nechmiktis’.

Satepan, Daniel no kiiluij takat tein Aspenaz kitalijka maj kinitani yejua uan eyi itasojikniuan. Kiiluij: ‘Ika xitechita majtakti tonalmej. Xitechmaka takual tein se kitoka uan at tein titayiskej. Ompa, xitechita tejuan uan xikinita oksekin telpochmej tein kimajseuaj itakual tekiuaj, uan xikyekita akonimej okachi chikaujkej’.

Takat tein kinitaya kijtoj ika kuali yetok. Uan keman tamik majtakti tonalmej, Daniel uan eyi itasojikniuan okachi chikaujkej moitayaj, uan amo kemej oksekin telpochmej. Yejika kinkaujkej maj kikuajtokan tein tajtankaj, uan amo tein tekiuaj kitemakaya.

Keman ajsik eyi xiuit, nochin telpochmej kiniuikakej iixpan tekiuaj Nabucodonosor. Satepan keman tekiuaj imiuan tajtoj, kinitak ika Daniel uan eyi itasojikniuan okachi katkaj tamatinij. Yejika, kinkauak kemej tapaleuianij itech ikaltekiuaj. Uan keman tekiuaj kiniuikiliaya netajtanilmej uan kuejmolmej Daniel, Sadrac, Mesac uan Abednego, yejuan kimatiaj majtakpa okachi ke tiopixkamej uan tamatinij tein kinpiaya tekiuaj.

Daniel 1:1-21.



Netajtanilmej

  • ¿Akonimej naui konemej tein moitaj itech taixkopin, uan keyej moajsij Babilonia?
  • ¿Toni kininekiliaya Nabucodonosor naui konemej, uan toni kininauatij itekitikauan?
  • ¿Toni tajtanik Daniel maj kinimakanij tein kikuaskiaj uan tein tayiskiaj yejua uan eyi itasojikniuan?
  • Keman panok majtakti tonalmej kikuajtoyaj tein se kitoka, ¿keniuj yetoyaj Daniel uan eyi itasojikniuan, uan keniuj yetoyaj oksekin telpochmej?
  • ¿Keyej kiniuikakej Daniel uan eyi itasojikniuan itech iueyichan tekiuaj, uan keniuj kinextijkej ika okachi kipiayaj tamatilis ke tiopixkamej uan tamatinij?

Okseki netajtanilmej

  • Xikixtajtolti Daniel 1:1-21.

    ¿Toni chikaujkayot moneki tikchiuaskej tein techpaleuis maj amo titajtakokan, uan timotekitiliskej kampa timomachiliskej ika uelis techtanis tajtakol? (Dan. 1:8; Gén. 39:7, 10; Gál. 6:9.)

    ¿Keniuj axkan telpochmej uan ichpochmej uelis kinejnekiskej kichiuaskej, oso kiniluiskej maj kichiuakan tachiualismej tein oksekin kiitaj ika tel teyolpaktij? (Dan. 1:8; Pro. 20:1; 2 Cor. 6:17, 18; 1 Pe. 1:15, 16.)

    Keman tikitaj itech Biblia tein kipanokej naui telpochmej hebreos, ¿keniuj techpaleuia maj tikajsikamatikan kemej moneki tikitaskej tamachtilis, tein motemaka itech uejueyi kaltamachtiloyamej? (Dan. 1:20; Isa. 54:13; 1 Cor. 3:18-20.)