Xionyoui kampa nesi tein kipia

Xionyoui kampa nesi tein kipia

Tanojnots 71: Dios motenkauak kichiuas se xochital

Tanojnots 71: Dios motenkauak kichiuas se xochital

NEJIN se taixkopin kampa nesi xochital kemej tein Dios acha kinextilij itanauatijkauj Isaías. Isaías nemik satepan keman momikilij Jonás.

Taltikpakneminij moajsij itech Xochital

Xochital moixmati kemej “kanajika kampa takualtsinkan”. ¿Mitselnamiktia teisa tein tikitakaya itech nejin amaix? Kemaj, kualtsin xochital tein Dios kinchijchiuilijka Adán uan Eva, ¿melauj? Sayoj ika, ¿mochiuas semanauak Taltikpak?

Jiova kiiluij tanauatijkej Isaías maj kijkuilouani keniuj eski yankuik xochital, tein Dios kinimakati itekitikauan amo uejkaua. Kiiluij: ‘Tepeitskuimej uan ichkamej kualtsin senemiskej. Kuakuejkonemej uan tekuanikonemej sentakuaskej, uan se konet kintakualtis. Uan pilkonet tein mauiltis kampa mokalakia kouat tein tekejtsoma amo teyi kichiuilis’.

Miakej kijtoskej: ‘Nejon amo keman uelis mochiuas. Ipa onkak tajyouilis nikan taltikpak uan nochipa onkas’. Sayoj ika ximonemili, ¿keniuj katka kampa Dios kinkaujka maj nemikan Adán uan Eva?

Dios kintalij Adán uan Eva itech se xochital. Sayoj, kemej amo kitakamatkej Dios, kipolojkej kualtsin xochital, ueuentsintiakej uan momikilijkej. Dios motenkaua ika tein kitasojtaj kinimakas nochi tein kipolojkej Adán uan Eva.

Itech yankuik xochital tein ualajtok amo teyi taijtakos niono taixpolos teisa. Onkas yekmelauj yekyetolis. Nochin taltikpakneminij amo kipiaskej kokolis uan yolpakiskej kemej yekinika kinekia Dios. Satepan timomachtiskej keniuj kichiuas Dios nejin.

Isaías 11:6-9; Apocalipsis 21:3, 4.



Netajtanilmej

  • ¿Akoni katka Isaías, kemanian nemik, uan toni kinextilij Jiova?
  • ¿Keniuj moixmati xochital, uan toni techelnamiktia?
  • ¿Toni Jiova kiiluij Isaías maj kijkuilouani kemej eski yankuik Xochital?
  • ¿Keyej kipolojkej Adán uan Eva xochital kampa nemiaj?
  • ¿Toni motenkaua Jiova kinimakas tein kitasojtaj?

Okseki netajtanilmej

  • Xikixtajtolti Isaías 11:6-9.

    ¿Keniuj kimelaua iTajtol Dios yekyetolis tein kipiaskej taltikpakneminij uan tapialmej itech yankuik taltikpak? (Sal. 148:10, 13; Isa. 65:25; Eze. 34:25.)

    Maski ayamo onkak yekyetolis kemej kijtoj Isaías, ¿keniuj mochiujtok itech itekitikauan Dios nejin tajtolmej? (Rom. 12:2; Efe. 4:23, 24.)

    ¿Akoni kinamiki maj tikueyichiuakan keman tikitaj ika taltikpakneminij mopataj, axkan uan kemej itech yankuik taltikpak? (Isa. 48:17, 18; Gál. 5:22, 23; Fili. 4:7.)

  • Xikixtajtolti Apocalipsis 21:3, 4.

    ¿Toni kijtosneki keman Biblia kijtoua ika Dios nemi imiuan taltikpakneminij? (Lev. 26:11, 12; 2 Cró. 6:18; Isa. 66:1; Apo. 21:2, 3, 22-24.)

    ¿Toni tataman ixayot uan tekokojkayot poliuis? (Luc. 8:49-52; Rom. 8:21, 22; Apo. 21:4.)