Xionyoui kampa nesi tein kipia

Xionyoui kampa nesi tein kipia

Tanojnots 68: Ome konemej oksepa nenkej

Tanojnots 68: Ome konemej oksepa nenkej

KOMO timomikiliskia, ¿keniuj momachiliskia momomaj komo oksepa tinemiskia? ¡Tel yolpakiskia! Sayoj ika, ¿ueli oksepa nemi tein momikilijya? ¿Mochiujkaya achto nejin?

Xikita takat, siuat uan konet tein yetokej itech taixkopin. Takat, tanauatijkej Elías. Siuat tein amo nemiok inamik, kayot itech altepet Sarepta, uan okichpil, ikoneuj. Se tonal konet kokolispeuak, ueyipeuak uan momikilij. Ompa, Elías kiiluij siuat: ‘Xinechmaka konet’.

Elías iuan se siuat tein amo nemiok inamik uan ikoneuj tein moajokuik

Elías kiuikak tapan uan kitalij itech itapech. Ompa kichiuak se netataujtil: ‘Jiova, nimitstataujtia, xikchiua maj oksepa nemi konet’. ¡Uan konet peuak mijyotia! Ompa, Elías kitemoltij uan kiiluij siuat: ‘¡Xikita, mokoneuj yoltok!’ Nejin kitelyolpaktij imomaj.

Okse itanauatijkauj Jiova motokaytij Eliseo. Yej katka itapaleuijkauj Elías. Sayoj ika satepan, Jiova kichiuak maj Eliseo no kichiuani mouiskatekimej. Se tonal, Eliseo yajki altepet Sunem, uan keman ompa moajsia, se siuat kinextiliaya ueyi kualtakayot. Satepan nejin siuat kipiak se konet.

Keman konet nenken ueyiak, se kualkan kiajsito ipopaj kampa tekititoya itech italpan. Ompa, sepasaj tsajtsik: ‘¡Nechkokoua notsontekoj!’ Keman kiuikakej kalijtik, momikilij. ¡Moteltayokoltij imomaj! Uan niman kitemoto Eliseo.

Keman Eliseo ajsik uan kalakik kampa mokauaya, ompa yetoya konet miket. Kichiuak se netataujtil iuan Jiova, uan ipan motekak miket. Inakayo konet niman kauanik, uan ekxoj chikojpa. ¡Tel yolpakik imomaj keman kalakik uan kiitak ika oksepa yoltoya konet!

Tel miakej taltikpakneminij momikilijkejya. Nejin kintayokoltia imin chankauan uan imin tasojikniuan. Tejuan amo ueli tikinajokuij mikemej. Sayoj ika, Jiova kemaj ueli. Satepan tikitaskej ika yej kichiuas maj tel miakej taltikpakneminij oksepa nemikan.

1 Reyes 17:8-24; 2 Reyes 4:8-37.


Netajtanilmej

  • ¿Akonimej eyi taltikpakneminij tein yetokej itech taixkopin, uan toni kipanok konet se tonal?
  • ¿Toni tajtanik Elías itech inetataujtil maj kichiuiliani Jiova konet, uan toni mochiuak satepan?
  • ¿Keniuj motokaytij itapaleuijkauj Elías?
  • ¿Keyej kitatitauijkej Eliseo maj yani ichan siuat tein nemia Sunem?
  • ¿Toni kichiuak Eliseo, uan toni kipanok konet tein momikilijka?
  • ¿Toni ueli kichiua Jiova, ijkon kemej kinextij imin techkopa Elías uan Eliseo?

Okseki netajtanilmej

  • Xikixtajtolti 1 Reyes 17:8-24.

    1) ¿Keniuj motalij itech tayejyekolis itatakamatilis uan itakuaujtamatilis Elías? (1 Rey. 17:9; 19:1-4, 10.)

    2) ¿Keniuj kinextij se ueyi takuaujtamatilis siuat tein katka kayot Sarepta tein amo nemiaok inamik? (1 Rey. 17:12-16; Luc. 4:25, 26.)

    3) Ika tein kipanok siuat tein katka kayot Sarepta tein amo nemiaok inamik, ¿keniuj kinextij ika katka melauj itajtoluan Jesús tein ijkuiliujtokej itech Mateo 10:41, 42? (1 Rey. 17:10-12, 17, 23, 24.)

  • Xikixtajtolti 2 Reyes 4:8-37.

    Ika tein kichiuak siuat tein nemia Sunem, ¿toni technextilia ika moneki tikchiuaskej keman aksa techkalpanoua? (2 Rey. 4:8; Luc. 6:38; Rom. 12:13; 1 Juan 3:17.)

    ¿Toni tachiualismej tein kuali uelis tikinchiuiliskej itekitikauan Dios axkan tonalmej? (Hech. 20:35; 28:1, 2; Gál. 6:9, 10; Heb. 6:10.)