Xionyoui kampa nesi tein kipia

Xionyoui kampa nesi tein kipia

Tanojnots 59: Keyej choloj David

Tanojnots 59: Keyej choloj David

SATEPAN keman David kimiktij Goliat, Abner, tein kinixyekanaya tateuianij israelitas kiuikilij Saúl. Saúl yolpakik ika tein kichiuak David, yejika kitalij maj kinixyekanani itateuijkauan uan no maj nemini ichan.

Satepan, keman tateuianij mokepkej ijkuak moteuitoj imiuan filisteos, siuamej mokuikatijkej: ‘Saúl kinimiktij miles, uan David majtakti miles’. Saúl kinexikoluij David, porin okachi kiueyichiuayaj uan yej amo semi. Sayoj ika Jonatán, ikoneuj Saúl amo katka nexikol. Kitasojtaya David, uan David no kitasojtaya Jonatán. Yejika, motenkaujkej ika nochipa eskiaj tasojiknimej.

Tekiuaj Saúl kitamottok se lanza

David kuali kitsotsonaya arpa, uan Saúl kiuelkakia itatsotsoj. Sayoj ika se tonal, iueyi nexikolo Saúl kiuikak maj kichiuiliani David teisa tein tel amo kuali. Keman David tatsotsontoya, Saúl kikuik se lanza uan kitamotilij. Kijtoj: ‘¡Niksoti David itech tepamit!’ Sayoj ika David moilakatsoj. Satepan, keman Saúl oksepa kitamotilij lanza David, amo no kikuiltij. David kimatik ika nochipa monekia motelpias.

¿Tikelnamiki tein motenkaujka Saúl? Yej kijtoj ika takat tein kimiktiskia Goliat, kimakaskia iichpoch kemej inamik. Yejika Saúl kiiluij David ika ueliskia kikuis iichpoch, Mical, sayoj ika achto monekia kinimiktis 100 filisteos. ¡Sayoj ximonemili! Tein melauj, Saúl kichiaya maj filisteos kimiktianij David. Sayoj ika amo ijkon mochiuak, uan Saúl kimakak iichpoch kemej inamik.

Se tonal Saúl kiiluij Jonatán uan nochin itekitikauan ika kinekia kimiktis David. Sayoj ika Jonatán kiiluij: ‘Amo teyi xikchiuili David. Yej amo teyi mitschiuilijtok tein amo kuali. Ta okachi mitspaleuij. Moixeuij kimiktis Goliat, uan keman tikitak, tiyolpakik’.

David moilakatsojtok

Saúl kikakik ikoneuj, uan kijtoj ika amo teyi kichiuiliskia. Ompa, David kiuikakej ichan Saúl uan oksepa kitekitiliaya kemej ipa. Sayoj ika se tonal keman David tatsotsontoya, ika expa Saúl kitamotilij lanza. Uan yej moilakatsoj uan lanza motokato itech tepamit. ¡David kimatik ika monekia cholos!

Itech nejon youak David yajki ichan, sayoj ika Saúl kintitanik seki takamej maj kimiktitij. Mical kimatik tein ipopaj kinekia kichiuas. Yejika kiiluij David: ‘Xicholo nejin youak, komo amo mosta amo tiyoltosok’. Nejon youak Mical kipaleuij David maj cholouani itech se ventana. Ajsitoyaya chikome xiuit kicholuijtinemia Saúl.

1 Samuel 17:55-58; 18:1-30; 19:1-18.



Netajtanilmej

  • ¿Keyej Saúl kinexikoluiaya David, uan keniuj taman katka ikoneuj Jonatán?
  • ¿Toni mochiuak se tonal keman David kitatsotsonilijtoya Saúl?
  • ¿Toni kijtoj Saúl ika monekia kichiuas David achtopa keman monamiktiskia iuan iichpoch Mical, uan keyej kijtoj nejon?
  • Kemej moita itech taixkopin, ¿toni ika expa kichiuak Saúl, tonal keman David kitsotsoniliaya arpa?
  • ¿Keniuj Mical kimakixtij David, uan toni monekia kichiujtinemis chikome xiuit?

Okseki netajtanilmej

  • Xikixtajtolti 1 Samuel 18:1-30.

    Ijkon kemej Jonatán uan David nochipa moteltasojtakej, ¿keniuj no ijkon moteltasojtaj ‘okseki ichkamej’ imiuan ‘amo ueyi oloch ichkamej’? (1 Sam. 18:1; Juan 10:16; Luc. 12:32, NM; Zac. 8:23.)

    Maski Jonatán kinamikia mochiuas tekiuaj satepan keman Saúl momikiliskia, ¿keniuj kinextia tein kijtoua 1 Samuel 18:4 ika yej kinextilij ueyi poujkaitalis akin Jiova kijitaka maj mochiuaskia tekiuaj?

    ¿Keniuj kinextia tein kichiuak Saúl, ika nexikolot uelis techuikas maj tikchiuakan uejueyi tajtakolmej, uan toni technejmachtia nejin? (1 Sam. 18:7-9, 25; Sant. 3:14-16.)

  • Xikixtajtolti 1 Samuel 19:1-17.

    ¿Keyej ueliskia kipoloskia inemilis Jonatán keman kinojnotsato taixnamikkej Saúl? (1 Samuel 19:1, 4-6; Prov. 16:14.)