Xionyoui kampa nesi tein kipia

Xionyoui kampa nesi tein kipia

Tanojnots 58: David uan Goliat

Tanojnots 58: David uan Goliat

FILISTEOS oksepa kinteuisnekiaj israelitas. Eyi ikniuan David tein tayekanayaj, yetoyaj imiuan itateuijkauan Saúl. Yejika, se tonal Isaí kiiluij David: ‘Xikiniuikili mokniuan tatet uan koyotaxkal uan xikinitati ox kuali yetokej’.

Goliat

Keman David ajsik, motaloj kintemoto ikniuan kampa yetoyaj tateuianij israelitas. Ueyi takat filisteo tein motokaytij Goliat, kinkejkelouaya israelitas. Ijkon kichiujtoya 40 tonalmej, kualkan uan youak. Kijtouaya chikauak: ‘Xikijitakan aksa maj moteuiki nouan. Komo yej nechtani uan nechmiktia, tejuan timochiuaskej namotekitikauan. Sayoj ika komo nej niktani uan nikmiktia, namejuan namochiuaskej nantotekitikauan. Maj tikitakan ox aksa moixeuia moteuis nouan’.

David kintajtanij seki tateuianij: ‘¿Toni kimakaskej takat tein kimiktis nejin filisteo uan kinpinaujkakixtis israelitas?’

Se tateuijkej kijtoj: ‘Saúl kimakas miak tomin. Uan no kimakas iichpoch kemej inamik’.

Sayoj ika israelitas kimouiliayaj Goliat porin katka tel ueyi takat. Ajsitoyaya eyi metro ika uejkapantik katka, uan kipiaya se tateuijkej tein kimamaliaya iescudo.

Sekin tateuianij kiiluitoj tekiuaj Saúl ika David kinekia yas moteuitiuj iuan Goliat. Sayoj ika Saúl kiiluij David: ‘Amo tiuelis, tej tikonetok, uan yej kemaya ipa kuali moteuia’. David kiiluij: ‘Nej nikmiktij se oso uan se tekuani keman kikuilitoj iichkauan nopopaj. Uan axkan no ijkon nikchiuas nejin filisteo. Jiova nechpaleuis’. Keman kijtoj nejin, Saúl kiiluij: ‘Xiouj, uan maj Jiova yeto mouan’.

David temok atenoj uan kiololoj makuil tetsitsin ajalaxtik uan kikalakij itech ibolsa. Ompa momailpilij iateuitats uan pankisak moteuito iuan ueyi takat. Goliat amo uelia kineltokaya. Kiitaya ika amo nenken ouij kimiktiskia David.

David kitamottok se tet

Goliat kiiluij: ‘Xiuiki nikan, uan nikimakas monakayo maj kikuakan totomej uan okuilimej’. Sayoj ika David kiiluij: ‘Tej tiuitse notech ika se espada uan ika se lanza, sayoj ika nej niouj motech itokaykopa Jiova. Axkan Jiova mitstekauilis nomako uan nimitsuetsiltis’.

Ompa David motaloj kixnamikito Goliat. Kikixtij se tet tein kiuikaya, kitalij itech iateuitats, uan kitamotilij Goliat ika nochi ichikaualis. ¡Tet kixkuakoyonij Goliat, uetsik uan mikik! Keman filisteos kiitakej ika uetsik takat tein katka tel chikauak, cholojkej. Israelitas kinikantokakej uan ijkon tatankej itech neteuil.

1 Samuel 17:1-54.



Netajtanilmej

  • ¿Keniuj kinpejpeualtiaya Goliat tateuianij israelitas?
  • ¿Kanachi ika uejkapantik katka Goliat, uan toni kimakaskia Saúl takat tein kimiktiskia?
  • ¿Keniuj tanankilij David, keman Saúl kiiluij ika katka konetok uan amo ueliskia moteuiskia iuan Goliat?
  • Keman David kinankilij Goliat, ¿keniuj kinextij ika takuaujtamatia iuan Jiova?
  • Kemej moita itech taixkopin, ¿toni ika kimiktij David Goliat, uan toni kinpanok filisteos satepan?

Okseki netajtanilmej

  • Xikixtajtolti 1 Samuel 17:1-54.

    ¿Keyej tel yolchikauak David katka, uan keniuj no ijkon uelis timochiuaskej tiyolchikaujkej? (1 Sam. 17:37, 45; Efe. 6:10, 11.)

    Tein kichiuaj kemej Cristo, ¿keyej maj amo kitelnejnekikan motataniskej, kemej kichiuak Goliat, ijkuak mauiltiskej oso teuantiskej itech okse taman neixpetanilis? (1 Sam. 17:8; Gál. 5:26; 1 Tim. 4:8.)

    ¿Keniuj kinextij itajtoluan David ika takuaujtamatia ika Dios kipaleuiskia? (1 Sam. 17:45-47; 2 Cró. 20:15.)

    Keman moteuijkej filisteos imiuan israelitas, ¿keniuj kinextia nejin tanojnots ika tein yekmelauj moteuijkej, katkaj tiotsitsin iuan Dios tein melauak, Jiova? (1 Sam. 17:43, 46, 47.)

    Ijkon kemej David kinextij ika takuaujtamatia iuan Jiova, ¿keniuj no ijkon kinextiaj taijitalmej tein yetokejok nikan Taltikpak uan yatij iluikak? (1 Sam. 17:37; Jer. 1:17-19; Apo. 12:17.)