Xionyoui kampa nesi tein kipia

Xionyoui kampa nesi tein kipia

Tanojnots 72: Dios kipaleuij Ezequías

Tanojnots 72: Dios kipaleuij Ezequías

¿TIKMATI keyej nejin takat kichiujtok se netataujtil iuan Jiova? ¿Keyej kitalij nejin amamej iixpan kampa kimakayaj netetayokolilmej Jiova? Motokaytia Ezequías. Yej kinixyekanaya ome kalyetouanij israelitas. Uan kipiaya se ueyi ouijkayot. ¿Keyej?

Tekiuaj Ezequías kichiujtok netataujtil

Porin tateuianij asirios kintankajya majtakti kalyetouanij. Kemej katkaj amo yolkualmej, yejika Jiova kinkauak maj ijkon kinpanouani. Uan satepan, tateuianij asirios no kinteuisnekiaj ome kalyetouanij tein kinixyekanaya Ezequías.

Tein tekiuajtia Asiria kititanilij seki amamej tekiuaj Ezequías. Uan yejua nejin amamej tein Ezequías kintalij iixpan Dios. Tein kijtouaya amamej kikejkelouaya Jiova, uan kiiluiayaj Ezequías maj motemakani imiuan asirios. Yejika Ezequías kichiuak se netataujtil: ‘Jiova, nimitstataujtia, xitechmakixti imako tein tekiuajti Asiria. Ijkon, nochin altepemej kimatiskej ika sayoj tejua ti Dios’. ¿Kikakik Jiova?

Ezequías katka se kuali tekiuaj. Amo katka kemej tein kinixyekanayaj majtakti kalyetouanij israelitas, niono kemej ipopaj, Acaz, tekiuaj tein amo yolkuali katka. Yej kitakamatia ika miak nejmachkayot nochin itanauatiluan Jiova. Yejika, keman kitamichiuak inetataujtil Ezequías, Jiova kimakak tanauatijkej Isaías nejin tajtolmej maj kiiluiani: ‘Tein tekiuajti Asiria amo kalakis Jerusalén, amo motokis niose itateuijkauj. Uan amo kimotaskej altepet ika niose flecha’.

Xikita nejin taixkopin. ¿Tikmati akonimej nejin tateuianij mikemej? Yejuan asirios. Jiova kititanik se iángel, uan itech sayoj se youal kinimiktij 185,000 tateuianij asirios. Yejika tein tekiuajtia Asiria yajki.

Tateuianij asirios mikemej

Ome kalyetouanij tein kinixyekanaya Ezequías makiskej, uan kipiakej yekyetolis se ome eyi xiujmej. Sayoj ika, satepan keman momikilij Ezequías, ikoneuj Manasés mochiuak tekiuaj. Nejin takat Manasés katka se tekiuaj amo yolkuali, uan satepan ikoneuj Amón no ijkon kichiuak. Yejika momiakilij eliuisyot uan amo kuali tachiualismej. Keman tekiuaj Amón kimiktijkej itekitikauan, ikoneuj Josías mochiuak imin tekiuaj ome kalyetouanij.

2 Reyes 18:1-36; 19:1-37; 21:1-25.



Netajtanilmej

  • ¿Akoni takat tein yetok itech taixkopin, uan keyej kipia se ueyi ouijkayot?
  • ¿Toni kijtouaya amamej tein Ezequías kitalij iixpan Dios, uan toni kitajtanij itech inetataujtil?
  • ¿Keniuj katka tekiuaj Ezequías, uan toni tajtolmej kimakak Jiova tanauatijkej Isaías maj kiiluiani Ezequías?
  • Kemej moita itech taixkopin, ¿toni kinchiuilij asirios iángel Jiova?
  • Maski ijkuak Ezequías kinixyekanaya ome kalyetouanij kipiayaj yekyetolis se ome eyi xiujmej, ¿toni mochiuak satepan keman yej momikilij?

Okseki netajtanilmej

  • Xikixtajtolti 2 Reyes 18:1-36.

    Rabsaqué, imin tanauatijkauj asirios, ¿keniuj kitemouaya kinpolouilis israelitas imin takuaujtamatilis iuan Jiova? (2 Rey. 18:19, 21; Éxo. 5:2; Sal. 64:3.)

    ¿Keniuj no ijkon kichiuaj itaixpantijkauan Jiova kemej Ezequías keman kinixnamikij tein kintauelitaj? (2 Rey. 18:36; Sal. 39:1; Pro. 26:4; 2 Tim. 2:24.)

  • Xikixtajtolti 2 Reyes 19:1-37.

    Keman itekitikauan Jiova kipanouaj ouijkayomej, ¿keniuj no ijkon kichiuaj kemej Ezequías? (2 Rey. 19:1, 2; Pro. 3:5, 6; Heb. 10:24, 25; Sant. 5:14, 15.)

    ¿Toni eyi taman kipanok tekiuaj Senaquerib tein kipinaujtij, uan akoni no ijkuitik kipanos amo uejkaua? (2 Rey. 19:32, 35, 37; Apo. 20:2, 3.)

  • Xikixtajtolti 2 Reyes 21:1-6, 16.

    ¿Keyej ueli moyekijtoua ika Manasés katka semej tekiuanij okachi amo yolkuali tein tekiuajtik Jerusalén? (2 Cró. 33:4-6, 9.)