Xionyoui kampa nesi tein kipia

Xionyoui kampa nesi tein kipia

Tanojnots 56: Saúl yekinika imin tekiuaj israelitas

Tanojnots 56: Saúl yekinika imin tekiuaj israelitas
Samuel kikuatekilijtok aceite Saúl kemej tekiuaj

XIKYEKITA Samuel, kikuatekilijtok aceite nejin takat. Yejua nejin kichiuiliayaj aksa uan ika nejon moitaya ika katka se tekiuaj taijital. Jiova kiiluij Samuel maj kikuatekiliani aceite Saúl. Katka se aceite tein kualtsin ajuiyak.

Saúl momachiliaya ika amo ueliskia mochiuaskia tekiuaj. Kiiluij Samuel: ‘Nej nipoui itech ichankauan Benjamín, tein okachi amo miakej itech nochi Israel. ¿Keyej tikijtoua ika eski nitekiuaj?’ Saúl kiyolpaktij Jiova porin amo moueyimatia niono momachiliaya ueyichiujkej. Yejika kijitak maj mochiuani tekiuaj.

Sayoj ika Saúl amo kipanouaya tatasojtilis, niono katka se takat nojnel. Yej ualeuaya itech se kalyetouanij tein kipiayaj miak tomin, uan katka tel kuakualtsin uan uejkapantik. ¡Nochin israelitas kitamiliayaj itech iajkoluan! Saúl no tel kuali motalouaya, uan tel chikauak katka. Israelitas tel yolpakiaj maj Jiova kijitani Saúl maj mochiuani tekiuaj. Nochin tsajtsiaj: ‘¡Maj moueyitali totekiuaj!’

Tein kinteltauelitayaj israelitas tel miakej katkajok. Nimasaj keman Saúl mochiuak tekiuaj, amonitas kinteuisnekiaj israelitas. Sayoj ika Saúl kinsentilij tel miakej tateuianij, uan kintankej amonitas. Israelitas yolpakiaj kipiaskej Saúl kemej imin tekiuaj.

Panok xiujmej, uan Saúl kinpaleuij israelitas maj tatanikan itech miak neteuilmej. Saúl no kipiaya se konet yolchikauak, tein motokaytij Jonatán. Uan yej kinpaleuij israelitas maj tatanikan itech miak neteuilmej. Filisteos kisentokayaj kinteltauelitayaj israelitas. Se tonal, tel miakej filisteos kinteuisnekiaj israelitas.

Samuel kiiluijka Saúl maj mochiaskia maj yej ajsini, uan kinchichinoskia tapialmej tein kimakaskia Jiova kemej se netetayokolil. Sayoj ika Samuel uejkauak. Uan Saúl kinimouiliaya filisteos maj kipeualtianij neteuil, yejika amo mochiak uan yejua kinchichinoj tapialmej. Keman Samuel ajsik, kiiluij Saúl ika amo tatakamatik. Kiiluij: ‘Jiova kijitas okse takat maj mochiua imin tekiuaj israelitas’.

Satepan, Saúl oksepa amo tatakamatik. Samuel kiiluij: ‘Okachi kuali se kitakamatis Jiova uan amo se kimakas se ichkat tein okachi kuali kemej se netetayokolil. Uan kemej amo tiktakamatik Jiova, yej amo mitskauas xiksentoka ximochiujto imin tekiuaj israelitas’.

Nejin technextilia se kuali nemachtil. Technextilia ika motelneki maj nochipa tiktakamatikan Jiova. No, technextilia ika se aksa tein yolkuali, kemej Saúl katka, uelis mochiuas amo yolkuali. ¿Melauj ika amo keman tiknekij maj techpano nejon?

1 Samuel capítulos 9-11; 13:5-14; 14:47-52; 15:1-35; 2 Samuel 1:23.



Netajtanilmej

  • Kemej moita itech taixkopin, ¿toni kichiujtok Samuel, uan keyej?
  • ¿Keyej Saúl kiyolpaktij Jiova, uan keniuj katka?
  • ¿Keniuj motokaytij ikoneuj Saúl, uan toni kichiuak?
  • ¿Keyej kinchichinoj tapialmej Saúl uan amo mochiak maj Samuel kichiuani?
  • ¿Toni technextilia tein kichiuak Saúl?

Okseki netajtanilmej

  • Xikixtajtolti 1 Samuel 9:15-21 uan 10:17-27.

    ¿Keniuj kipaleuij iyolyemanilis Saúl, maj amo ijsiujka mokualantiani keman seki takamej kijijtojkej? (1 Sam. 9:21; 10:21, 22, 27; Pro. 17:27.)

  • Xikixtajtolti 1 Samuel 13:5-14.

    Keman Saúl moajsia Guilgal, ¿toni tajtakol kichiuak ompa? (1 Sam. 10:8; 13:8, 9, 13.)

  • Xikixtajtolti 1 Samuel 15:1-35.

    ¿Toni ueyi tajtakol kichiuak Saúl keman kikitskijkaya Agag, tein tekiuajtia Amaleq? (1 Sam. 15:2, 3, 8, 9, 22.)

    ¿Keniuj kitemoj Saúl motenpaleuis, uan kinpantis oksekin ika nochi tein kichiuak? (1 Sam. 15:24.)

    ¿Toni tanejmachtilis moneki tikelnamikiskej keman techyolmajxitiskej? (1 Sam. 15:19-21; Sal. 141:5; Pro. 9:8, 9; 11:2.)