Xionyoui kampa nesi tein kipia

Xionyoui kampa nesi tein kipia

Tanojnots 49: Tonaltsin motsakuilij

Tanojnots 49: Tonaltsin motsakuilij

XIKITA Josué. Kijtojtok: ‘¡Tonaltsin, amo ximoolini!’ Uan Tonaltsin motsakuilij tatajko iluikak se tonal ajsitok. ¡Jiova kichiuak maj motsakuiliani! Sayoj ika, maj tikitakan keyej kinekia Josué maj kisentokani tauijtoni Tonaltsin.

Tonaltsin

Keman makuil tekiuanij amo yolkualmej tein moajsiaj Canaán peuak kiteuiaj Gabaón, gabaonitas kititankej se takat maj kinotsati Josué maj kinpaleuiti. Kiiluij: ‘¡Xiyakan ijsiujka uan xitechmakixtitij! Nochin tekiuanij tein nemij itech tepemej kinekij techteuiskej’.

Niman Josué uan itateuijkauan yajkej uan ojtokakej nochi youal. Keman ajsikej Gabaón, imin tateuijkauan makuil tekiuanij momoujtijkej uan peuak cholouaj. Yejika Jiova kichiuak maj uetsini uejueyi tesiuit, uan okachi miakej tateuianij momikilijkej ika tesiuit uan amo tein kinimiktijkej itateuijkauan Josué.

Josué

Josué kiitaya ika Tonaltsin yaya pankalakitia uan yaya tatayouayantiati, uan imin tateuijkauan makuil tekiuanij tein amo yolkualmej choloskiaj. Yejika Josué motatataujtilij iuan Jiova uan kijtoj: ‘¡Tonaltsin, amo ximoolini!’ Uan keman Tonaltsin kisentokaya tauijtoya, israelitas uelik tatankej itech neteuil.

Ompa Canaán nemiaj okseki tekiuanij amo yolkualmej tein kintauelitayaj israelitas. Josué uan itateuijkauan kiniuikilij chikuasen xiuit kinixpoloskej 31 tekiuanij tein moajsiaj itech altepemej. Keman kintamimiktijkej, Josué kichiuak maj kalyetouanij israelitas kinixejxelouilianij tal tein kitekitiltiskiaj.

Panok miak xiujmej uan Josué momikilij keman kipiaya 110 xiujmej. Keman Josué uan itasojikniuan nemiaj, israelitas kitakamatiaj Jiova. Sayoj ika keman yejuan momikilijkej, israelitas kichiujkej tein amo kuali uan mokalakijkej itech kuejmolmej. Uan ijkuak kemaj, monekik kitemoskej inepaleuil Dios.

Josué 10:6-15; 12:7-24; 14:1-5; Jueces 2:8-13.



Netajtanilmej

  • Kemej moita itech taixkopin, ¿toni kijtojtok Josué, uan keyej?
  • ¿Keniuj Jiova kinpaleuij Josué uan itateuijkauan?
  • ¿Kanachi tekiuanij taixnamikinij kinixpoloj Josué, uan kanachi xiujmej kiuikilij?
  • ¿Keyej kichiuak Josué maj moxejxelouani tal tein pouia Canaán?
  • ¿Kanachi xiuit kipiaya Josué keman momikilij, uan toni kichiujkej israelitas satepan?

Okseki netajtanilmej

  • Xikixtajtolti Josué 10:6-15.

    ¿Keniuj techpaleuia maj titakuaujtamatikan iuan Jiova, tikmatiskej ika Yej kitsakuilij Tonaltsin uan Metsti uan ijkon kinpaleuij israelitas? (Jos. 10:8, 10, 12, 13; Sal. 18:3; Pro. 18:10.)

  • Xikixtajtolti Josué 12:7-24.

    ¿Akoni tein melauj kinixpoloj 31 tekiuanij tein moajsiaj Canaán, uan keniuj techpaleuia axkan tikmatiskej nejin? (Jos. 12:7; 24:11-13; Deu. 31:8; Luc. 21:9, 25-28.)

  • Xikixtajtolti Josué 14:1-5.

    ¿Keniuj kinixejxelouilijkej tal kalyetouanij israelitas, uan toni kinextia nejin tein mochiuas ika talmej itech Xochital? (Jos. 14:2; Isa. 65:21; Eze. 47:21-23; 1 Cor. 14:33.)

  • Xikixtajtolti Jueces 2:8-13.

    Ijkon kemej Josué kinpaleuij israelitas, ¿akonimej techpaleuiaj axkan maj amo timoixkepakan itech taneltokalis tein melauak, ta maj timopiakan? (Jue. 2:8, 10, 11; Mat. 24:45-47; 2 Tes. 2:3-6; Tito 1:7-9; Apo. 1:1; 2:1, 2.)