Xionyoui kampa nesi tein kipia

Xionyoui kampa nesi tein kipia

Tanojnots 41: Kouat tachijchiuj ika cobre

Tanojnots 41: Kouat tachijchiuj ika cobre
Moisés uan kouat tachijchiuj ika cobre

¿TIMOLUIA ika melauj kouat tein tetekuiniujtok itech nejin kuouit? Amo. Ta nejin kouat tachijchiuj ika cobre. Jiova kiiluij Moisés maj kitaliani panian itech se kuouit, uan ijkon israelitas ueliskiaj kiitaskiaj uan kisentokaskiaj nemiskiaj. Sayoj ika oksekin kouamej tein yetokej talpan, kemaj yoltokej. Kinkejtsonkej israelitas uan kokolispeujkej. ¿Tikmati keyej?

Porin israelitas tajtojkej inpan Dios uan Moisés, keman kijtojkej: ‘¿Keyej titechkixtij Egipto maj timikikij nikan taluakyan? Nikan amo onkak takual niono at. Uan techyolajsika tikuajtoskej maná’.

Sayoj ika maná katka se kuali takual, tein Jiova, ika se mouiskatekit kinimakaya. Uan at no kinimakaya ika se mouiskatekit. Sayoj ika israelitas amo motasojkamatiaj ika nochi tein Jiova kinimakaya. Yejika Jiova kintatsakuiltij keman kintitanilij kouamej tein tekejtsomaj. Nejin kouamej kinkejtsonkej israelitas, uan miakej mikkej.

Kouamej kinkejtsonkej israelitas

Satepan israelitas kiiluijkej Moisés: ‘Titajtakojkej, porin titajtojkej ipan Jiova uan tejua. Xitechtatataujtili iuan Jiova maj kinijkuani nejin kouamej’.

Yejika Moisés kintatataujtilij israelitas. Uan Jiova kiiluij Moisés maj kichijchiuani se kouat ika cobre. Kiiluij maj kitaliani itech se kuouit, uan nochi akin kikejtsomaskia se kouat monekia kiitas kouat tachijchiuj ika cobre. Moisés kichiuak ijkon kemej Dios kiiluijka. Uan akin kikejtsomaya se kouat kiitaya kouat tachijchiuj ika cobre uan pajtia.

Nejin technextilia ika tejuan timoajsij kemej eskia israelitas tein kinkejtsonkej kouamej. Kemej tikmati, nochin taltikpakneminij ueuentsintiaj, kokoliskuij, uan momikiliaj. Nejin mochiua porin Adán uan Eva kikaujkej Jiova, uan nochin tejuan ompa tiualeuaj. Sayoj ika Jiova kitapoj se ojti kampa uelis tikajsiskej nemilis nochipaya.

Jiova kiualtitanik iKonetsin Jesucristo nikan Taltikpak. Miakej moluiayaj ika Jesús amo yolkuali katka, yejika kipilojkej itech se kuouit. Sayoj ika Jiova kitemakak maj techmakixtiki. Komo titakuaujtamatij itech uan tiktojtokaj, uelis tikseliskej nemilis nochipaya. Sayoj ika, satepan timomachtiskej okachi keniuj uelis tikchiuaskej.

Números 21:4-9; Juan 3:14, 15.



Netajtanilmej

  • ¿Toni tetekuiniujtok itech kuouit tein moita itech taixkopin, uan keyej Jiova kiiluij Moisés maj kitaliani ompa?
  • ¿Keniuj kinextijkej israelitas ika amo motasojkamatiaj ika nochi tein Jiova kinimakaya?
  • ¿Toni kiiluijkej israelitas Moisés keman Jiova kintatsakuiltij ijkuak kintitanilij kouamej tein tekejtsomaj?
  • ¿Keyej Jiova kiiluij Moisés maj kichijchiuani se kouat ika cobre?
  • ¿Toni nemachtil techkauilia nejin tanojnots?

Okseki netajtanilmej

  • Xikixtajtolti Números 21:4-9.

    ¿Toni technejmachtia tein kichiujkej israelitas keman amo motasojkamatiaj ika nochi tein Jiova kinimakaya? (Núm. 21:5, 6; Rom. 2:4.)

    Miak xiujmej satepan, ¿keniuj kikuikej israelitas kouat tachijchiuj ika cobre, uan toni kichiuak Ezequías? (Núm. 21:9; 2 Rey. 18:1-4.)

  • Xikixtajtolti Juan 3:14, 15.

    Keman Moisés kitalij kouat tachijchiuj ika cobre itech se kuouit, ¿keniuj kinextij ika satepan kipiloskiaj Jesús itech se kuouit? (Gál. 3:13; 1 Ped. 2:24.)