Xionyoui kampa nesi tein kipia

Xionyoui kampa nesi tein kipia

Tanojnots 37: Se kali tachijchiuj ika taken kampa taueyichiuayaj

Tanojnots 37: Se kali tachijchiuj ika taken kampa taueyichiuayaj

¿TIKMATI toni tein yetok itech taixkopin? Se kali tachijchiuj ika taken kampa sayoj kiueyichiuayaj Jiova. Motokaytia tabernáculo. Israelitas kitamichijchiujkej se xiuit satepan keman kiskej Egipto. ¿Tikmati akoni kinemilij maj mochijchiua?

Tabernáculo

Katka itanemilil Jiova. Keman Moisés yetoya tepekuako tein itokay Sinaí, Jiova kiiluij keniuj maj kichijchiuani. Kiiluij maj kichijchiuani kemej amo ouij kikojkopinaskiaj. Ijkon ueliskia kiuikaskiaj okseko uan ompa oksepa kisajsaloskiaj. Yejika, keman israelitas mijkuaniayaj okseko itech taluakyan, kiuikayaj nejon kali tachijchiuj ika taken.

Komo tikyekita cuartito ne takaltech tein kipia tabernáculo, ompa yetok se kaxon. Nejin kaxon motokaytia kaxon tein kixnextia netenkaualis. Kipiaya ome ángeles oso querubines tachijchiuj ika oro, uan yetoyaj nenekakpa. Dios kiyekaijkuiloj Majtakti Tanauatilmej itech ome patauak tet, porin Moisés kintatapatsak tein achto. Uan nejon temej kieujkej itech kaxon tein kixnextia netenkaualis. Ompa no kieujkej komit tein kipiaya maná. ¿Tikelnamiki toni maná?

Jiova kijitak Aarón, ikniuj Moisés, maj mochiuani tayekankej tiopixkat. Yej kinixyekanaya israelitas ika taueyichiualis tein kimakayaj Jiova. Uan ikoneuan no katkaj tiopixkamej.

Axkan xikyekita cuarto tein okachi ueyi tein kipia tabernáculo. Okse achiok ika ueyi ke yekinika cuartito. ¿Tikita kaxontsin tein popokatok? Ompa kampa tiopixkamej tapopochuiayaj, se teisa tein kualtsin ajuiyaya. No xikita tauilketsaloni tein kipia chikome tauilmej. Uan ika eyi yetok se mesa itech nejon cuarto, kampa yetokej 12 koyotaxkalmej.

Tabernáculo iixpan yetoya se ueyi akaxit, tein pexontoya ika at. Tiopixkamej kikuiaj ika mopajpakayaj. Ompa no yetoya kampa kinchichinouayaj tapialmej tamiktilmej tein kimakayaj Jiova kemej netetayokolilmej. Kalmej tachijchiuj ika taken kampa nemiaj israelitas, kiyoualojtoyaj tabernáculo.

Éxodo 25:8-40; 26:1-37; 27:1-8; 28:1; 30:1-10, 17-21; 34:1, 2; Hebreos 9:1-5.



Netajtanilmej

  • ¿Keniuj motokaytia tein yetok itech taixkopin, uan toni ompa kichiuayaj?
  • ¿Keyej Jiova kiiluij Moisés maj kichijchiuani kali ika taken kemej amo ouij kikojkopinaskiaj?
  • ¿Keniuj motokaytia kaxon tein yetok ne takaltech itech cuartito tein moajsi itech tabernáculo, uan toni kipia?
  • ¿Akoni katka takat tein Jiova kijitak maj mochiuani tayekankej tiopixkat, uan toni tekit kichiuaya?
  • ¿Toni eyi taman yetok itech cuarto tein okachi ueyi tein kipia tabernáculo?
  • ¿Toni ome taman yetok iixpan tabernáculo, uan toni ompa kichiuayaj?

Okseki netajtanilmej

  • Xikixtajtolti Éxodo 25:8-40; 26:1-37; 27:1-8, uan 28:1.

    ¿Toni kixneskayotijkej querubines tein yetoyaj ipan kaxon tein kixnextia netenkaualis? (Éxo. 25:20, 22; Núm. 7:89; 2 Rey. 19:15.)

  • Xikixtajtolti Éxodo 30:1-10, 17-21; 34:1, 2, uan Hebreos 9:1-5.

    ¿Keyej kinajsikamatiltij Jiova tiopixkamej tein kitekitiliayaj itech tabernáculo, ika motelnekia mopajpakaskej, uan toni technextilia nejin? (Éxo. 30:18-21; 40:30, 31; Heb. 10:22.)

    Itech tonalmej keman tatitanil Pablo kintajkuilouilij tokniuan hebreos, ¿keniuj kiteajsikamatiltij ika amo kualtiayaok tabernáculo niono Tanauatilmej tein Dios kinimakaka israelitas? (Heb. 9:1, 9; 10:1.)