Xionyoui kampa nesi tein kipia

Xionyoui kampa nesi tein kipia

Tanojnots 35: Jiova kitemakak itanauatiluan

Tanojnots 35: Jiova kitemakak itanauatiluan

KEMEJ ome metsti satepan keman israelitas kiskej Egipto, ajsikej itech tepet Sinaí, tein no motokaytiaya Horeb. Ompa kampa Dios tajtojka iuan Moisés itech se uitskuoujtaktsoj tein xotatoya. Israelitas ompa motsakuilijkej uan mokaujkej se ome eyi tonalmej.

Keman Moisés tejkok itech tepet, israelitas mochixkej tepetsintaj. Ompa Jiova kiiluij Moisés ika Yej kinekia maj israelitas kitakamatinij uan maj mochiuanij Iaxkauan. Keman Moisés temok, kiniluij israelitas tein Jiova kijtojka. Uan yejuan kijtojkej ika kitakamatiskiaj, porin kinekiaj mochiuaskej iaxkauan Jiova.

Jiova kichiuak tein amo keman kichiujtoya. Kichiuak maj tapopokani tepekuako, uan maj chikauak tatitikuini. No kininojnotsak israelitas uan kiniluij: ‘Nejua ni Jiova namoDios tein namechkixtij Egipto’. Ompa kinimakak nejin tanauatil: ‘Amo xikiniueyichiuakan okseki tiotsitsin, ta sayoj nejua’.

Ome patauak tet

Dios kinimakak israelitas okseki chiknaui tanauatilmej. Israelitas motelmoujtiayaj, yejika kiiluijkej Moisés: ‘Tejua xitechnojnotsa, porin tikmouiliaj timikiskej komo Jiova technojnotsa’.

Satepan, Jiova kiiluij Moisés: ‘Xitejko tepekuako. Nejua nimitsmakati ome patauak tet kampa nikijkuiloj tanauatilmej tein nikneki maj kitakamatikan israelitas’. Yejika Moisés oksepa tejkok itech tepet. Ome poual tonal uan ome poual youal yetoya ompa.

Dios kinpialiaya miak, miak tanauatilmej israelitas. Nejin tanauatilmej Moisés kinijkuiloj. Dios no kimakak Moisés ome patauak tet, kampa Jiova kijkuiloj majtakti tanauatilmej tein kiniluijka israelitas. Motokaytiaj Majtakti Tanauatilmej.

Moisés yetok itech tepet Sinaí

Nejin Majtakti Tanauatilmej yejua tein motelneki. Uan amo sayoj yejua, ta no okseki miak tanauatilmej tein Dios kinimakak israelitas. Semej, yejua nejin: ‘Xiktasojta Jiova moDios ika nochi moyolo, ika nochi motanemililis, ika nochi motanejnekilis uan ika nochi mochikaualis’. Uan okse yejua nejin: ‘Xiktasojta mokniuj ijkon kemej tejua timotasojta’. IKoneuj Dios, Jesucristo, kijtoj ika yejua nejin ome tanauatilmej tayekantokej tein Dios kinimakak israelitas. Satepan timomachtiskej tein kichiuak iKoneuj Dios uan tein tamachtij.

Éxodo 19:1-25; 20:1-21; 24:12-18; 31:18; Deuteronomio 6:4-6; Levítico 19:18; Mateo 22:36-40.



Netajtanilmej

  • Ome metsti satepan keman israelitas kiskej Egipto, ¿kani motsakuilijkej?
  • ¿Toni kinekia Jiova maj kichiuanij israelitas, uan keniuj tanankilijkej?
  • ¿Keyej kimakak Jiova Moisés ome patauak tet?
  • Keman Jiova kitemakak Majtakti Tanauatilmej, ¿katiyejua okseki tanauatilmej kinimakak israelitas?
  • ¿Katiyejua ome tanauatilmej kijtoj Jesucristo ika okachi tayekantok?

Okseki netajtanilmej

  • Xikixtajtolti Éxodo 19:1-25; 20:1-21; 24:12-18, uan 31:18.

    ¿Keniuj techpaleuia tajtolmej tein ijkuiliujtokej itech Éxodo 19:8, maj tikajsikamatikan tein kijtosneki se motemaktis iuan Jiova? (Mat. 16:24; 1 Ped. 4:1-3.)

  • Xikixtajtolti Deuteronomio 6:4-6; Levítico 19:18, uan Mateo 22:36-40.

    Tein kichiuaj kemej Cristo, ¿keniuj kinextiaj imin netasojtalis iuan Dios uan taltikpakneminij? (Mar. 6:34; Hech. 4:20; Rom. 15:2.)