Xionyoui kampa nesi tein kipia

Xionyoui kampa nesi tein kipia

Tanojnots 34: Se yankuik takual

Tanojnots 34: Se yankuik takual

¿TIKMATI toni kipejpentokej taltikpakneminij? Pane sekti, istak, tsikitsitsin uan kajkanauak. Sayoj ika amo sekti, ta teisa tein ueli se kikua.

Israelitas kisentilijtokej maná

Sayoj panok kemej se metsti keman israelitas kiskej Egipto, uan moajsiaj taluakyan. Ompa tepitsisaj motachiuaya uan yejuan amo kiuelitayaj. Yejika kijtouayaj: ‘Okachi kuali maj Jiova techmiktiani Egipto. Ompa tikuayaj nochi tein tiknekiaj’.

Yejika Jiova kiniluij: ‘Nikchiuas maj uetsi takual tein ualeuas iluikak’. Uan yejua nejon tein kichiuak. Mostika kualkan, keman israelitas kiitakej tein uetsik, motajtanijkej: ‘¿Toni nejin?’

Moisés kiniluij: ‘Yejua nejin takual tein Jiova namechmaka xikuakan’. Taltikpakneminij kitokaytijkej MANÁ. Maná uelik katka kemej koyotaxkal ika nekti.

Moisés kiniluij taltikpakneminij: ‘Xikpejpenakan sayoj tein nankitamiskej’. Yejika, mojmostaj kualkan kipejpenayaj. Tein mochiuaya, keman Tonaltsin moixtapouaya, maná tein mokauaya talpan atiaya.

Moisés no kiniluij: ‘Amo ximoeuilikan tein nankikuaskej mostika’. Sayoj ika sekin moeuiliayaj. ¿Tikmati toni kipanouaya maná? ¡Tein moeuiliayaj, mostika kualkan ijkochyouaya uan tsojyayaya!

Sayoj ika, Jiova kiniluij maj kipejpenanij maná se tonal semana kemej kinajsiskia ome tonal. Katka chikuasentika tonal. Kemej Jiova amo kichiuaskia maj uetsi maná chikometika tonal, yejika kiniluij maj kipejpenanij tein kikuaskiaj mostika. ¡Keman moeuiliayaj maná tein kikuaskiaj chikometika tonal, amo ijkochyouaya niono tsojyayaya! ¡Katka okse mouiskatekit!

Itech nochin xiujmej keman israelitas moajsiaj taluakyan, Jiova kintamakak ika maná.

Éxodo 16:1-36; Números 11:7-9; Josué 5:10-12.



Netajtanilmej

  • ¿Toni kipejpentokej taltikpakneminij tein moitaj itech taixkopin, uan keniuj motokaytia?
  • ¿Toni kininajnauatij Moisés israelitas keman kipejpenaskiaj maná?
  • ¿Toni kiniluij Jiova maj kichiuaskiaj israelitas chikuasentika tonal, uan keyej?
  • ¿Toni mouiskatekit kichiuaya Jiova keman moeuiliayaj maná chikometika tonal?
  • ¿Kanachi xiuit kintamakak Jiova israelitas ika maná?

Okseki netajtanilmej

  • Xikixtajtolti Éxodo 16:1-36 uan Números 11:7-9.

    ¿Keniuj kinextia Éxodo 16:8 ika moneki tikinpoujkaitaskej takamej tein Jiova kinixtalijtok, maj kinixyekanakan oloch tokniuan tein monechikouaj? (Heb. 13:17.)

    Keman israelitas yetoyaj taluakyan, ¿keniuj kinelnamiktiaya mojmostaj ika Jiova kinimakaya tein ika moixpanoltiskiaj? (Éxo. 16:14-16, 35; Deu. 8:2, 3.)

    ¿Toni neskayot kitemakak Jesús keman ika tajtoj maná, uan keniuj techpaleuia nejin ‘takualis tein ualeuak iluikak’? (Juan 6:31-35, 40.)

  • Xikixtajtolti Josué 5:10-12.

    ¿Kanachi xiuit kikuajkej maná israelitas, keniuj moitak tein yekmelauj kinemiliayaj, uan toni technextilia nejin? (Éxo. 16:35; Núm. 11:4-6; 1 Cor. 10:10, 11.)