Xionyoui kampa nesi tein kipia

Xionyoui kampa nesi tein kipia

Tanojnots 39: Ikuouj Aarón xochiouak

Tanojnots 39: Ikuouj Aarón xochiouak

XIKITA xochit uan itakilo chikauak tein kipia nejin kuouit. Nejin kuouit iaxka Aarón. ¡Nejin xochit uan itakilo chikauak moskaltijkej sayoj itech se youal! Maj tikitakan keyej.

Moisés kimakatok Aarón ikouj tein xochiyoj

Keman israelitas nentinemiaj taluakyan miak xiujmej, sekin moluiayaj ika Moisés amo yejua eskia tayekankej, niono Aarón maj eskia tayekankej tiopixkat. Coré yejua semej tein ijkon kinemiliaya, uan no Datán, Abiram uan 250 tein kinixyekanayaj israelitas. Nochin mosentilijkej uan kiiluijkej Moisés: ‘¿Keyej timoueyichiua uan timochiua titotayekankauj?’

Moisés kiniluij Coré uan itatojtokakauan: ‘Mosta kualkan xikuikan namopopochkaxiuj uan xiktalilikan kopal. Uan ompa, xiualakan itech itabernáculo Jiova uan tikitaskej akoni yej kijita’.

Mostika Coré uan 250 itatojtokakauan yajkej itech tabernáculo. Miakej tein imiuan mokuikej no yajkej. Jiova tel kualantoya. Moisés kiniluij israelitas: ‘Xikintalkauikan imin kaluan tachijchiuj ika taken nejin taltikpakneminij tein amo yolkualmej. Amo teyi xikuikan tein iminaxka’. Israelitas kikakkej, uan kintalkauijkej imin kaluan Coré, Datán uan Abiram.

Ompa Moisés kiniluij: ‘Ika nejin nankimatiskej akoni Jiova kijita. Tal motapos uan kintolos nejin taltikpakneminij tein amo yolkualmej’.

Keman Moisés tamitajtoj, tal motapoj. Ichan Coré tachijchiuj ika taken uan nochi tein kipiaya, uan Datán, Abiram uan tein imiuan yetoyaj pankalakkej, uan tal kinpantsakuak. Keman israelitas kikakkej ika tsajtsiaj tein pankalakiaj, kijtojkej chikauak: ‘¡Ximotalokan! ¡Tal no uelis techtolos!’

Coré uan 250 itatojtokakauan yetoyajok ompakauin itech tabernáculo. Yejika Jiova kintitanilij tit, uan nochin chichinaujkej. Satepan Jiova kiiluij Eleazar, ikoneuj Aarón, maj kikuini imin popochkaxiuj tein mikkej, maj kinkajkanauani uan maj ika kipikini kampa kinchichinouayaj tapialmej. Nejin kinpaleuiskia israelitas kemej se tanejmachtilis ika sayoj Aarón uan ikoneuan kitekitiliskiaj Jiova kemej tiopixkamej.

Sayoj ika, Jiova kinekia maj kiyekajsikamatinij ika yej kijitaka Aarón uan ikoneuan kemej tiopixkamej. Yejika kiiluij Moisés: ‘Tein taixyekanaj itech sejse kalyetouanij israelitas, maj kiualkuikan sejse imin kuouj. Itech ichankauan Leví, maj Aarón kiualkui ikuouj. Satepan xikintali nochin nejon kuoujmej itech tabernáculo, iixpan kaxon tein kixnextia netenkaualis. Takat tein nej nikijitak kemej tiopixkat xochiouas ikuouj’.

Mostika kualkan keman Moisés kiitato, ¡ikuouj Aarón xochiouak uan kipiaya itakilouan! ¿Tikmatika keyej Jiova kichiuak maj ikuouj Aarón xochiouani?

Números 16:1-49; 17:1-11; 26:10.



Netajtanilmej

  • ¿Akonimej kiixnamikkej itayekanalis Moisés uan Aarón, uan toni kiiluijkej Moisés?
  • ¿Toni Moisés kintajtanij Coré uan 250 itatojtokakauan?
  • ¿Toni kiniluij Moisés israelitas, uan toni mochiuak keman tamitajtoj?
  • ¿Toni kinpanok Coré uan 250 itatojtokakauan?
  • ¿Toni kichiuak Eleazar, ikoneuj Aarón, ika imin popochkaxiuj tein mikkej, uan keyej?
  • ¿Keyej kichiuak Jiova maj xochiouani ikuouj Aarón? (Xikita taixkopin.)

Okseki netajtanilmej

  • Xikixtajtolti Números 16:1-49.

    ¿Toni kichiujkej Coré uan itatojtokakauan, uan keyej kinextij nejon tachiualis ika kiixnamikiaj Jiova? (Núm. 16:9, 10, 18; Lev. 10:1, 2; Pro. 11:2.)

    ¿Toni tanemilil tein amo melauak kipiakej Coré uan 250 ‘tein kinixyekanayaj israelitas’? (Núm. 16:1-3; Pro. 15:33; Isa. 49:7.)

  • Xikixtajtolti Números 17:1-11 uan 26:10.

    ¿Toni kinextij keman ikuouj Aarón xochiouak, uan keyej kijtoj Jiova maj moeuani itech kaxon tein kixnextia netenkaualis? (Núm. 17:5, 8, 10.)

    ¿Toni technextilia axkan tein mochiuak keman xochiouak ikuouj Aarón? (Núm. 17:10; Hech. 20:28; Fili. 2:14; Heb. 13:17.)