Xionyoui kampa nesi tein kipia

Xionyoui kampa nesi tein kipia

Tanojnots 30: Uitskuoujtaktsoj xotatoya

Tanojnots 30: Uitskuoujtaktsoj xotatoya

MOISÉS ajsik itech tepet Horeb kintemolijtiaya xiuit ichkamej. Ompa kiitak se uitskuoujtaktsoj xotatoya, ¡sayoj ika uitskuoujtaktsoj amo chichinauiya!

Moisés yetok iixpan uitskuoujtaktsoj tein xotatok

Moisés moluij: ‘¡Amo keman ijkon nikitstoya!’ Okachi kuali nikitati. Keman motokito, itech uitskuoujtaktsoj kikakik se tajtolis: ‘Amo ximotokiok. Ximotekakkixti, porin kampa tiyetok talchipaujkan’. Katka Dios tein tajtouaya itenkopa se ángel, uan yejika Moisés moixtsakuak.

Ompa Dios kijtoj: ‘Nikitstok keniuj tajyouijtokej israelitas itech altepet Egipto. Nikinimakixtiti, uan tejua nimitstitani xikinkixtiti’. Jiova yaya kiniuikati israelitas itech kualtsin ueyi altepet Canaán.

Sayoj ika, Moisés kijtoj: ‘Nej amo teyi nichiujkej. ¿Keniuj uelis nikchiuas nejin? Uan komo niouj nechiluiskej: “¿Akoni mitsualtitanik?” ¿Toni nikiniluis?’

Dios tanankilij: ‘Yejua nejin tikiniluis, “JIOVA, iDios Abraham, iDios Isaac uan iDios Jacob nechualtitanik”’. Ompa, Jiova kijtoj okseki tajtolmej: ‘Nochipaya nejin eski notokay’.

Moisés tanankilij: ‘Sayoj ika, ¿uan komo amo nechneltokiliaj keman nikiniluis ika tejua tinechtitanik?’

Dios kitajtanij: ‘¿Toni timaktok?’

Moisés kinankilij: ‘Se kuouit’.

Dios kiiluij: ‘Xiktamota talpan’. Keman Moisés kichiuak nejon, kuouit mokepak se kouat. Satepan, Jiova kinextilij Moisés okse mouiskatekit, uan kiiluij: ‘Ximomaeua itech motaken’. Moisés kichiuak uan keman momakixtij, ¡katka maistak kemej sekti! Pane kipiaya kokolispalanilis. Ompa, Jiova kimakak uelilis Moisés uan maj ika kichiuani expatika mouiskatekit. Ika tamik kiiluij: ‘Ika nejin mouiskatekimej israelitas mitsneltokiliskej ika nejua nimitstitanik’.

Satepan, Moisés mokepak ichan uan kiiluij Jetró: ‘Nimitstataujtia, xinechkaua maj nimokepa Egipto maj nikinitati nochankauan’. Jetró kiiluij Moisés maj kualtsin youi, uan yej moojketsteuj uan mokepak Egipto.

Éxodo 3:1-22; 4:1-20.



Netajtanilmej

  • ¿Keniuj motokaytia tepet tein yetok itech taixkopin?
  • ¿Toni kiitak Moisés tein amo keman kiitstoya keman yajki itech tepet iuan ichkamej?
  • ¿Toni kijtoj tajtolis tein kisaya itech uitskuoujtaktsoj tein xotatoya, uan akoni katka itajtolis?
  • ¿Keniuj tanankilij Moisés keman Dios kiiluij maj kinkixtiti israelitas itech altepet Egipto?
  • ¿Toni kiiluij Dios Moisés maj tanankiliani komo kitajtaniskiaj akoni kititanik?
  • ¿Keniuj ueliskia kinextiskia Moisés ika katka Dios akin kititanik?

Okseki netajtanilmej

  • Xikixtajtolti Éxodo 3:1-22.

    ¿Keniuj techyolchikaua tikmatiskej ika Jiova techmakas inepaleuil kemej Moisés, keman yej techmakas se tekit uan timomachiliskej ika pane amo uelis tikchiuaskej? (Éxo. 3:11, 13; 2 Cor. 3:5, 6.)

  • Xikixtajtolti Éxodo 4:1-20.

    ¿Toni kualneskayomej kiixualtij Moisés itech ome poual xiuit keman yetoya Madián, uan toni kininextilia takamej tein kinejnekij kiajsiskej se tekit kemej tayekananij? (Éxo. 2:11, 12; 4:10, 13; Miq. 6:8; 1 Tim. 3:1, 6, 10.)

    Maski Jiova techmejmelaua imimakopa takamej tein kinixtalijtok maj taixyekanakan, ¿keniuj uelis techpaleuis tein kipanok Moisés? (Éxo. 4:12-14; Sal. 103:14; Heb. 12:4-11.)