Xionyoui kampa nesi tein kipia

Xionyoui kampa nesi tein kipia

Tanojnots 20: Dina mokalakij itech kuejmolmej

Tanojnots 20: Dina mokalakij itech kuejmolmej

¿TIKITA akonimej kinkalpanoti Dina? Kinitati seki ichpochmej tein nemij itech tal tein poui Canaán. ¿Kiyolpaktiskia Jacob nejin? Uelis tiknankilis nejin netajtanil, komo timoelnamiktia keniuj Abraham uan Isaac kinitayaj siuamej tein nemiaj Canaán.

Dina kinkalpanojtok ichpochmej tein nemij Canaán

¿Kinekia Abraham maj Isaac monamiktiani iuan se ichpoch tein nemia Canaán? Amo. ¿Kinekiaj Isaac uan Rebeca maj imin koneuj Jacob monamiktiani iuan se ichpoch tein nemia Canaán? Amo. ¿Tikmati keyej?

Porin nejin taltikpakneminij kiniueyichiuayaj tiotsitsin. Nejin taltikpakneminij amo katkaj yolkualmej, yejika amo ueliskiaj imiuan monamiktiskiaj, niono ueliskiaj mochiuaskiaj imin tel tasojikniuan. Yejika ueli tikajsikaneltokaj ika Jacob amo kiyolpaktiskia maj Dina mochiuani itasojikniuan ichpochmej tein nemiaj Canaán.

Ijkoni yej, Dina mokalakij itech kuejmolmej. ¿Ueli tikita itech taixkopin nejin takat tein kiitstok Dina? Motokaytia Siquem. Se tonal keman Dina takalpanouaya, Siquem kichikaujkauij Dina maj iuan motekani. Nejin tachiualis tel amo kuali, porin sayoj takamej uan siuamej tein namikuanij uelis mosentekaskej. Tein Siquem kichiuak iuan Dina, kiualkuik okachi kuejmolmej.

Keman ikniuan Dina kikakkej toni mochiuak, tel kualankej. Okachi tel kualankej Simeón uan Leví, yejika kikuikej imin espadas uan ichtakakalakitoj itech altepet. Yejuan uan imin ikniuan kimiktijkej Siquem uan nochin okseki takamej. Jacob tel kualanik keman kikakik toni kichiujkej ikoneuan.

¿Keniuj peuak nochi nejin kuejmolmej? Keman Dina peuak kinpia itasojikniuan tein amo kitakamatiaj itanauatiluan Dios. Tejuan amo tiktemoskej totasojikniuan tein amo kitakamatij Dios, ¿melauj?

Génesis 34:1-31.



Netajtanilmej

  • ¿Keyej Abraham uan Isaac amo kinekiaj maj imin koneuan monamiktianij imiuan taltikpakneminij tein nemiaj Canaán?
  • ¿Keniuj kiitaya Jacob maj Dina mochiuani itasojikniuan ichpochmej tein nemiaj Canaán?
  • Kemej moita itech taixkopin, ¿akoni takat tein kiitstok Dina, uan toni kichiuak tein amo kuali?
  • ¿Toni kichiujkej Simeón uan Leví, ikniuan Dina, keman kimatkej toni mochiuak?
  • ¿Keniuj momachilij Jacob ika tein kichiujkej Simeón uan Leví?
  • ¿Keniuj peuak kipiaj kuejmolmej Dina uan ichankauan?

Okseki netajtanilmej

  • Xikixtajtolti Génesis 34:1-31.

    ¿Sayoj kinkalpanojtikisaya Dina ichpochmej tein nemiaj Canaán? Xikmelaua (Gén. 34:1).

    ¿Keyej uelis tikijtoskej ika Dina no kipiak tajtakol maj ika mauiltianij? (Gál. 6:7.)

    ¿Keniuj uelis kinextiskej telpochmej uan ichpochmej tein nemij axkan, ika kiitaj kemej se tanejmachtilis tein kipanok Dina? (Pro. 13:20; 1 Cor. 15:33; 1 Juan 5:19.)