Xionyoui kampa nesi tein kipia

Xionyoui kampa nesi tein kipia

Tanojnots 16: Isaac kitemolijkej se kuali inamik

Tanojnots 16: Isaac kitemolijkej se kuali inamik

¿TIKMATI akoni siuat tein yetok itech taixkopin? Motokaytia Rebeca. Uan takat tein kiajsiti, motokaytia Isaac. Yejua mochiuati inamik Isaac. ¿Keniuj mochiuak?

Abraham, kinekiliaya ikoneuj se kuali inamik. Amo kinekia maj monamiktiani iuan se siuat tein nemia Canaán, porin siuamej tein ompa nemiaj, kiniueyichiuayaj tiotsitsin. Yejika kinotsak itakeual uan kiiluij: ‘Xiouj Harán kampa nemij nochankauan, uan ompa xiktemoli se inamik nokoneuj Isaac’.

Satepan, itakeual Abraham kinkuiteuak majtakti camellos uan moojketsteuj. Keman ajsitiayaya kampa nemiaj ichankauan Abraham, moseuito itech se ameyal. Keman tapoyauia, siuamej tein nemiaj itech altepet yayaj atakuitij itech nejon ameyal. Yejika itakeual Abraham kiiluij Jiova itech se netataujtil: ‘Siuat tein nechkixtilis at uan tein kinamakas camellos, maj yejua tein tej tikneki maj mochiua inamik Isaac’.

Rebeca moajsi iuan Isaac

Amo uejkauak, atakuito Rebeca. Keman takeual kitajtanij at, yej kimakak. Satepan peuak kinamaka nochin camellos tein amiktoyaj. Tel asasakak, porin camellos tel miak at tayij.

Keman Rebeca kintamiamakak, itakeual Abraham kitajtanij itokay ipopaj. No kitajtanij ox ueliskia mokauaskia iminchan nejon youal. Rebeca kinankilij: ‘Nopopaj motokaytia Betuel, uan uelis timokauas kalijtik’. Itakeual Abraham kimatia ika Betuel ipopaj katka Nacor, ikniuj Abraham. Yejika motankuaketsak uan kitasojkamatilij Jiova porin kiuikak kampa nemiaj ichankauan Abraham.

Nejon youal itakeual Abraham kiniluij Betuel uan Labán, ikniuj Rebeca, keyej ompa yetoya. Keman kikakkej, kijtojkej ika Rebeca ueliskia yas iuan takeual uan maj monamiktiani iuan Isaac. ¿Keniuj tanankilij Rebeca keman kitajtanijkej ox kinekia yas? Kijtoj ika kemaj, kinekia yas. Yejika, niman mostika kinpejpechtijkej camellos, moojketskej uan mokepkej Canaán.

Youaka katka keman ajsikej. Rebeca kiitak se takat nentoya ompakauin. Nejon takat katka Isaac. Yej yolpakik keman kiitak Rebeca. Imomaj Isaac, tein motokaytij Sara, momikilijkaya eyi xiuita achto, yejika Isaac tayokoxtoyaok. Sayoj ika, yej kiteltasojtak Rebeca uan oksepa tel yolpakik.

Génesis 24:1-67.



Netajtanilmej

  • ¿Akonimej takat uan siuat tein yetokej itech taixkopin?
  • ¿Toni kichiuak Abraham uan ijkon kitemolij ikoneuj se inamik, uan keyej?
  • ¿Keniuj kinankilij Dios netataujtil tein kichiuak itakeual Abraham?
  • ¿Keniuj tanankilij Rebeca keman kitajtanijkej ox kinekia monamiktis iuan Isaac?
  • ¿Toni kichiuak maj oksepa yolpakini Isaac?

Okseki netajtanilmej

  • Xikixtajtolti Génesis 24:1-67.

    ¿Toni kualneskayomej kinextij Rebeca keman moajsik iuan itakeual Abraham itech ameyal? (Gén. 24:17-20; Pro. 31:17, 31.)

    ¿Toni se kuali neskayot kinkauilia axkan tein kichiuaj kemej Cristo ika tein Abraham kichiuilij Isaac? (Gén. 24:37, 38; 1 Cor. 7:39; 2 Cor. 6:14.)

    ¿Keyej moneki tikxeloskej tepitsin den tonalmej uan ijkon tiknemiliskej tein timomachtiaj, kemej kichiuaya Isaac? (Gén. 24:63; Sal. 77:12; Fili. 4:8.)