Xionyoui kampa nesi tein kipia

Xionyoui kampa nesi tein kipia

Tanojnots 15: Inamik Lot tachiak taikampa

Tanojnots 15: Inamik Lot tachiak taikampa

LOT uan ichankauan nemiaj iuan Abraham itech tal tein pouia Canaán. Se tonal Abraham kiiluij Lot: ‘Nikan amo ajsi toni kikuaskej totapialuan. Yejika maj timoxexelokan. Komo tej tiouj sekopa, nej niyas oksekopa’.

Keman Lot analtachiak kampa panouaya ueyiat Jordán, kiitak ika onkaya at uan xiuit tein kikuaskiaj itapialuan. Yejika ompa kiniuikak ichankauan uan itapialuan. Satepan mokaltalitoj itech altepet Sodoma.

Taltikpakneminij tein nemiaj Sodoma tel amo yolkualmej katkaj. Lot amo nenken kiuelitaya, porin katka yolkuali. Dios amo no nenken kiuelitaya. Kemej mochiuaya tachiualismej tein tel amo kuali itech altepet Sodoma, uan okse tein motokaytij Gomorra, yejika Dios kintitanik ome ángeles maj kinauatianij Lot ika yaya kinixpoloti nejon altepemej.

Ángeles kiiluijkej Lot: ‘¡Xikuiteua monamik uan moichpochuan uan xikisakan ijsiujka!’ Lot uan ichankauan yolikatitoyaj, yejika ángeles kinimakitskijkej uan kinkixtijkej itech altepet. Ompa semej ángeles kiniluij: ‘¡Xicholokan! Amo xitachiakan taikampa. Xiyakan itech tepemej uan ompa ximopaleuikan’.

Lot uan iichpochuan tatakamatkej uan cholojkej. Motalojkej uan amo tachiakej taikampa. Sayoj ika inamik Lot amo tatakamatik. Keman uejka yetoyajya kampa nemiaj, moketsak uan tachiak taikampa. Satepan mokepak istat uan mokauak kemej se kalikxit. ¿Ueli tikita itech taixkopin?

Ika tein mochiuak techkauilia se kuali nemachtil: ika Dios kinimakixtia tein tatakamatij, uan tein amo tatakamatij kipolouaj imin nemilis.

Génesis 13:5-13; 18:20-33; 19:1-29; Lucas 17:28-32; 2 Pedro 2:6-8.

Lot kistok Sodoma


Netajtanilmej

  • ¿Keyej moxexelojkej Abraham uan Lot?
  • ¿Keyej kinemilij Lot mokaltalitiuj Sodoma?
  • ¿Keniuj katkaj taltikpakneminij tein nemiaj Sodoma?
  • ¿Toni kinauatijkej Lot ome ángeles?
  • ¿Keyej mokepak istat uan mokauak kemej se kalikxit inamik Lot?
  • ¿Toni technextilia tein kipanok inamik Lot?

Okseki netajtanilmej

  • Xikixtajtolti Génesis 13:5-13.

    ¿Keniuj no ijkon moneki tikchiuaskej kemej Abraham keman tikmelauaskej se kuejmol iuan aksa? (Gén. 13:8, 9; Rom. 12:10; Fili. 2:3, 4.)

  • Xikixtajtolti Génesis 18:20-33.

    Keman tikixtajtoltiaj keniuj tajtoj Abraham iuan Jiova, ¿keyej uelis titakuaujtamatiskej ika Jiova uan Jesús taixkomakaskej ika melaujkayot? (Gén. 18:25, 26; Mat. 25:31-33.)

  • Xikixtajtolti Génesis 19:1-29.

    Ika tein kijtoua Génesis 19:5 uan 13, ¿keniuj kiita Dios tein auilnemi iuan se itakaikniuj? (Lev. 20:13.)

    ¿Keniuj tataman kitakamatkej tanauatil tein Dios kinimakak Lot uan Abraham, uan toni technextilia nejin? (Gén. 19:15, 16, 19, 20; 22:3.)

  • Xikixtajtolti Lucas 17:28-32.

    ¿Keniuj kiitaya inamik Lot nochi tein kikaujka, uan keniuj techpaleuia kemej se tanejmachtilis? (Luc. 12:15; 17:31, 32; Mat. 6:19-21, 25.)

  • Xikixtajtolti 2 Pedro 2:6-8.

    ¿Keniuj no ijkon moneki tikitaskej kemej Lot, taltikpakneminij imin tachiualisuan tein tel amo kuali? (Eze. 9:4; 1 Juan 2:15-17.)