Xionyoui kampa nesi tein kipia

Xionyoui kampa nesi tein kipia

Tanojnots 14: Dios kiitak Abraham ox itech takuaujtamatia

Tanojnots 14: Dios kiitak Abraham ox itech takuaujtamatia

¿UELI tikita tein kichiujtok Abraham? Maktok se tatekiloni, uan pane kimiktiti ikoneuj. ¿Keyej? Yekinika, maj tikitakan keniuj kipiakej imin koneuj Abraham uan Sara.

Abraham kitemakatok Isaac

Xikelnamiki, Dios motenkaujka imiuan ika kipiaskiaj se konet. Sayoj ika, nejon pane amo ueliskiaok, porin Abraham uan Sara katkaj tel xiuejkejya. Sayoj ika, Abraham kineltokaya ika Dios nochi ueli kichiua maski pane amo ueliskiaok. Yejika, ¿toni mochiuak?

Panok se xiuit keman Dios motenkaujka. Keman Abraham kipiaya 100 xiujmej uan Sara 90 xiujmej, kipiakej se konet tein motokaytij Isaac. ¡Dios kichiuak ijkon kemej motenkaujka!

Sayoj ika, keman Isaac moskaltijkaya, Jiova kiitak Abraham ox itech takuaujtamatia. Dios kinotsak: ‘¡Abraham!’ Uan yej tanankilij: ‘¡Nikan niyetok!’ Ompa Dios kiiluij: ‘Xiouj itech tepet tein nimitsnextiliti, uan xikuiteua mokoneuj, Isaac, tein ipa setsin. Ompa xikmikti uan xiktemaka kemej se netetayokolil’.

¡Moteltayokoltij Abraham keman kikakik nejin tanauatil porin kiteltasojtaya ikoneuj! Uan xikelnamiki, Dios motenkaujka iuan Abraham ika ikoneuan nemiskiaj itech tal tein pouia Canaán. Sayoj ika, ¿keniuj ueliskia mochiuaskia nejon komo mikiskia Isaac? Maski Abraham amo kiajsikamatia, kichiuak nochi tein Dios kinauatijka.

Keman ajsik itech tepet, Abraham kiilpij ikoneuj uan kitalij kampa tachijchiujka kani kitemakaskia netetayokolil. Ompa kikixtij itatekiloni tein ika yaya kimiktiti. Sayoj ika, Dios nimantsin kinotsak itenkopa se ángel: ‘¡Abraham, Abraham!’ Uan yej tanankilij: ‘¡Nikan niyetok!’

Dios kiiluij: ‘Amo xikmikti niono teyi xikchiuili telpoch. Axkan nikmatika ika notech titakuaujtamati, porin amo tinechtsakuiltilij mokoneuj, Isaac, tein ipa setsin.

¡Abraham kipialiaya Dios tel ueyi takuaujtamatilis! Yej kineltokaya ika kemej Jiova nochi ueli kichiua, no ueliskia kiajokuiskia Isaac komo mikiskia. Sayoj ika, tein melauj Dios amo kinekia maj Abraham kimiktiani ikoneuj; yejika kichiuak maj moijilpiani xiujtsalan se ichkat, uan maj yejua kitemakani kemej netetayokolil uan amo Isaac.

Génesis 21:1-7; 22:1-18.



Netajtanilmej

  • ¿Toni motenkaujka Dios iuan Abraham, uan keniuj kichiuak kemej motenkaujka?
  • Kemej moita itech taixkopin, ¿toni kichiuak Dios uan ijkon kiitaskia itakuaujtamatilis Abraham?
  • ¿Toni kichiuak Abraham maski amo kiajsikamatia keyej kimakak Dios nejon tanauatil?
  • ¿Toni mochiuak keman Abraham kikixtij itatekiloni tein ika yaya kimiktiti ikoneuj?
  • ¿Keniuj katka itakuaujtamatilis Abraham itech Dios?
  • ¿Toni kimakak Dios Abraham maj kitemakani kemej netetayokolil, uan keniuj?

Okseki netajtanilmej

  • Xikixtajtolti Génesis 21:1-7.

    ¿Keyej Abraham kineskayotij ikoneuj itech inakayo keman kipiaya chikueyi tonal? (Gén. 17:10-12; 21:4.)

  • Xikixtajtolti Génesis 22:1-18.

    ¿Keniuj kinextij Isaac ika kitakamatik ipopaj, uan keniuj kinextij nejin ika miak xiuit satepan mochiuaskia teisa ijkuitik tein okachi monekia? (Gén. 22:7-9; 1 Cor. 5:7; Fili. 2:8, 9.)