Xionyoui kampa nesi tein kipia

Xionyoui kampa nesi tein kipia

Tanojnots 22: Kitsakkej José

Tanojnots 22: Kitsakkej José

JOSÉ sayoj kipiaya 17 xiujmej keman kiuikakej tani itech altepet Egipto. Uan ompa kinamakiltijkej se takat tein motokaytij Potifar. Potifar kitekitiliaya tein tekiuajtia Egipto, tein motokaytij Faraón.

José tsaktok

José kiteltekitiliaya iteko, Potifar. Yejika, keman José ueyiak, Potifar kikauak maj kitajpiali ikalijtik. Komo ijkon, ¿keyej kitsakkej José? Ika kikuikej inamik Potifar.

Keman José ueyiak mochiuak se takat tel kuakualtsin, uan inamik Potifar kinekia maj José iuan motekani. Sayoj ika, José kimattoya ika nejon amo kuali, yejika amo kinekik. Inamik Potifar tel kualanik. Yejika, keman inamik ajsik, kitakajkayauilij uan kiiluij: ‘¡Nejon José amo yolkuali kinekia nouan motekas!’ Potifar kineltokilij inamik, uan kitelkualauij José. Yejika tanauatij maj kitsakuakan.

Tein kinitaya tein tsaktoyaj niman kiitak ika José katka se takat yolkuali. Yejika kinkauak imako José nochin tein tsaktoyaj maj yejua kinitani. Satepan Faraón kikualantijkej tein kitayilmakaya uan ipanchiujkauj uan kintsakuak. Se youak, kipiakej sejse takochitalis tein kijtosnekia teisa, sayoj ika yejuan amo kimatiaj toni kijtosnekia. Mostika José kiniluij: ‘Xinechtapouikan tein nankikochitakej’. Ompa, ika inepaleuil Dios, José kimelauak tein kijtosnekia nejon takochitalismej.

José kiiluij tetayilmakakej: ‘Uipta mitskixtiskej, uan oksepa timochiuas tiitayilmakakauj Faraón’. Yejika kijtoj okseki tajtolmej: ‘Keman tikisas, xinechtajtoui iixpan Faraón, uan xinechpaleui maj nikisa’. Sayoj ika José kiiluij panchiujkej: ‘Uipta mitskechkotonas Faraón’.

Uiptika mochiuak ijkon kemej kijtojka José. Faraón kikechkotonak panchiujkej. Sayoj ika, tetayilmakakej kikixtijkej uan oksepa peuak kitayilmaka tekiuaj. ¡Sayoj ika, kielkauak José! Amo kitajtouij iixpan Faraón, uan José kisentokak tsaktoya.

Génesis 39:1-23; 40:1-23.



Netajtanilmej

  • ¿Kanachi xiuit kipiaya José keman kiuikakej Egipto, uan toni mochiuak keman ompa ajsik?
  • ¿Keyej kitsakkej José?
  • ¿Toni tekit kimakakej José kampa tsaktoya?
  • Keman tsaktoyaj, ¿toni kiniluij José itayilmakakauj uan ipanchiujkauj Faraón?
  • ¿Toni mochiuak satepan keman kikixtijkej tetayilmakakej?

Okseki netajtanilmej

  • Xikixtajtolti Génesis 39:1-23.

    Maski itech itonaluan José ayamo ijkuiliujtoya se itanauatil Dios, maj kinextiani ika yej kitauelita auilnemilis, ¿toni kipaleuij kixtopeuas inamik Potifar? (Gén. 2:24; 20:3; 39:9.)

  • Xikixtajtolti Génesis 40:1-23.

    Xikijto ika se ome eyi tajtolmej tein kikochitak tetayilmakakej, uan keniuj kimelauilij José ika inepaleuil Jiova (Gén. 40:9-13).

    ¿Toni kikochitak panchiujkej, uan toni kijtosnekia? (Gén. 40:16-19.)

    ¿Keniuj no ijkon kichiuaj kemej José tein pouij itech takeual takuaujtamach uan tamatkej tein yetok itech totonaluan? (Gén. 40:8; Sal. 36:9; Juan 17:17; Hech. 17:2, 3.)

    ¿Keniuj techpaleuia Génesis 40:20, maj tikmatikan keniuj kiita Dios keman kiiluichiuiliaj aksa tein xiuajsi? (Ecl. 7:1; Mar. 6:21-28.)