Xionyoui kampa nesi tein kipia

Xionyoui kampa nesi tein kipia

Tanojnots 7: Se takat yolchikauak

Tanojnots 7: Se takat yolchikauak
Enoc

KEMAN taltikpakneminij peuak momiakiliaj, tel miakej kichiujkej tachiualismej tein amo kuali kemej Caín. Sayoj ika, nemia se takat tein katka taman. Motokaytij Enoc. Katka se takat yolchikauak. Taltikpakneminij tein kiyoualouayaj Enoc amo katkaj yolkualmej, sayoj ika yej kisentokaya kitekitiliaya Dios.

¿Tikmati keyej kichiuayaj tachiualismej tein amo kuali? Xitanemili itech nejin: ¿Akoni kichiuak maj Adán uan Eva amo kitakamatinij Dios uan maj kikuanij kuoujtakilot tein Dios kiniluijka maj amo kikuakan? Se ángel tein amo yolkuali. Biblia kitokaytia Satanás. Yej kineki maj tinochin timochiuakan amo tiyolkualmej.

Tachtekilis uan temiktilis

Se tonal Jiova Dios kichiuak maj Enoc kiniluiani taltikpakneminij teisa tein amo kinekiaj kikakiskej. Kiniluij nejin: ‘Se tonal Dios kinixpolos nochin tein amo yolkualmej’. Nejin tajtolmej acha kintelkualantij taltikpakneminij. Acha kinekkej kimiktiskej. Yejika Enoc monekik kipias yolchikaualis uan ijkon uelik kiniluij taltikpakneminij tein Dios yaya kichiuati.

Dios amo kikauak Enoc maj uejkauak nemini imiuan taltikpakneminij tein amo yolkualmej. Sayoj nemik 365 xiujmej. ¿Keyej tikijtouaj “sayoj 365 xiujmej”? Porin itech nejon xiujmej taltikpakneminij katkaj okachi chikaujkej uan nemiaj okachi miak xiujmej uan amo kemej axkan. ¡Kemaj, ikoneuj Enoc tein motokaytij Matusalén nemik 969 xiujmej!

Taltikpakneminij kichiujtokej tein amo kuali

Satepan keman momikilij Enoc, taltikpakneminij okachi mochiujkej amo yolkualmej. Biblia kijtoua ika ‘nochipa kinemiliayaj tein amo kuali’, uan ‘Taltikpak pexonik ika tateuilis’.

¿Tikmati keyej tel miak kuejmolmej onkaya itech nejon tonalmej? Porin Satanás kiajsik okse taman keniuj kinchiuas taltikpakneminij maj kichiuakan tein amo kuali. Maj tikitakan toni katka.

Génesis 5:21-24, 27; 6:5; Hebreos 11:5, NM; Judas 14, 15.



Netajtanilmej

  • ¿Keniuj katka taman Enoc?
  • Itech itonaluan Enoc, ¿keyej kichiuayaj tachiualismej tein amo kuali?
  • ¿Toni tachiualismej tein amo kuali kichiuayaj taltikpakneminij? (Xikita taixkopin.)
  • ¿Keyej monekik kipias yolchikaualis Enoc?
  • Itech itonaluan Enoc, ¿kanachi xiujmej nemiaj taltikpakneminij, uan kanachi xiuit nemik Enoc?
  • ¿Toni mochiuak satepan keman momikilij Enoc?

Okseki netajtanilmej

  • Xikixtajtolti Génesis 5:21-24, 27.

    ¿Keniuj mouikak Enoc iuan Jiova? (Gén. 5:24.)

    Kemej kijtoua Biblia, ¿akoni takat tein okachi miak xiuit nemik, uan kanachi xiuit kipiaya keman momikilij? (Gén. 5:27.)

  • Xikixtajtolti Génesis 6:5.

    Satepan keman momikilij Enoc, ¿keniuj mochiuak tel amo kuali imin tachiualisuan taltikpakneminij, uan keniuj ijkon tamati itech totonaluan? (2 Tim. 3:13.)

  • Xikixtajtolti Hebreos 11:5, NM.

    ¿Toni ikualneskayo Enoc ‘kitelyolpaktij Dios’?, uan ika nejon, ¿keniuj kiyajki itech inemilis? (Gén. 5:22.)

  • Xikixtajtolti Judas 14, 15.

    Ijkon kemej Enoc katka yolchikauak, ¿keniuj no uelis timochiuaskej kemej yej, keman titanejmachtiaj ika amo uejkaua ualati ineteuilis Dios tein motokaytia Armagedón? (2 Cor. 1:10; 2 Tim. 4:2.)