Xionyoui kampa nesi tein kipia

Xionyoui kampa nesi tein kipia

Tanojnots 6: Se konet yolkuali uan se amo yolkuali

Tanojnots 6: Se konet yolkuali uan se amo yolkuali

XIKITA taixkopin. Nikan yetok Caín uan Abel uan nochin uejueyiakejya. Caín mochiuak tatokkej. Yej kitokaya tatet, kuoujtakilot uan miak tataman kilmej.

Caín uan Abel kimakatokej Dios netetayokolilmej

Abel katka ichkatajpixkej uan kiuelitaya kinitas tein kinpolouaya ichkakonemej. Nejin uejueyiakej uan satepan Abel kinpiak se oloch ichkamej.

Se tonal Caín uan Abel kiuikilijkej Dios sejse netetayokolil. Caín kiuikak takual tein kitokka, uan Abel kiuikak se ichkat tein okachi kualtsin uan okachi ueyi tein kipiaya. Abel kiyolpaktij Jiova uan inetetayokolil. Sayoj ika amo kiyolpaktij Caín uan inetetayokolil. ¿Tikmati keyej?

Amo kijtosnekia ika inetetayokolil Abel katka okachi kuali uan amo ijkon tein kitemakak Caín, ta porin Abel katka yolkuali, kitasojtaya Jiova uan ikniuj. Caín amo katka yolkuali porin amo kitasojtaya ikniuj.

Yejika Dios kiiluij maj kipata itanemilil. Sayoj ika, Caín amo kitakamatik. Tel kualantoya porin Dios okachi kiyolpaktiaya Abel. Caín kiiluij Abel: ‘Tiouij tinemitij’. Keman yetoyaj uejka imiselti, Caín kitelmaak Abel uan kimiktij. ¿Amo timoluia ika tel amo kuali tein kichiuak Caín?

Caín cholojtok satepan ke kimiktij Abel

Dios kielnamiki Abel maski momikilijya porin yej katka yolkuali. Jiova amo kinelkaua tein yolkualmej kemej Abel. Yejika se tonal Jiova Dios kichiuas maj oksepa nemi. Itech nejon tonalmej amo keman mikisok, ta uelis nemis nochipaya nikan Taltikpak. ¿Tikuelitaskia tikinixmatis taltikpakneminij kemej Abel?

Sayoj ika Dios amo kiyolpaktiaj taltikpakneminij tein amo yolkualmej kemej Caín. Yejika, satepan keman Caín kimiktij ikniuj, Dios kitatsakuiltij, kititanik uejka uan ijkon maj kintalkauiani ichankauan. Keman Caín nemito oksekopa, kiuikak se ikniuj uan iuan monamiktij.

Keman panok tonalmej, Caín uan inamik kinpiakej konemej. Oksekin imin telpochuan uan imin ichpochuan Adán uan Eva monamiktijkej uan no kinpiakej konemej. Ijkon ijsiujka momiakilijkej nikan Taltikpak. Maj tikinixmatikan sekin.

Génesis 4:2-26; 1 Juan 3:11, 12; Juan 11:25.



Netajtanilmej

  • ¿Toni tekit kichiuayaj Caín uan Abel?
  • ¿Toni netetayokolilmej kiuikilijkej Jiova Caín uan Abel?
  • ¿Keyej kiyolpaktij Jiova inetetayokolil Abel, uan keyej amo kiyolpaktij inetetayokolil Caín?
  • ¿Keniuj katka Caín, uan toni kiiluij Jiova maj kichiuani?
  • Ijkuak Caín kiiluij ikniuj maj nemitij, ¿toni kichiuilij keman yetoyaj imiselti?
  • Xikmelaua toni kipanok Caín satepan keman kimiktij Abel.

Okseki netajtanilmej

  • Xikixtajtolti Génesis 4:2-26.

    ¿Itech toni kuejmolmej kinejmachtij Jiova ika yaya mokalakiti Caín? (Gén. 4:7.)

    ¿Keniuj kinextij Caín tein kinemiliaya itech iyolo? (Gén. 4:9.)

    ¿Keniuj kiita Jiova maj se kimikti aksa tein kichiua tein kuali? (Gén. 4:10; Isa. 26:21.)

  • Xikixtajtolti 1 Juan 3:11, 12.

    ¿Keyej tel kualanik Caín, uan keniuj techpaleuia axkan tonalmej kemej se tanejmachtilis? (Gén. 4:4, 5; Pro. 14:30; 28:22.)

    Maski nochin tochankauan kiixnamikiskej Jiova, ¿keniuj kinextia Biblia ika uelis tiksentokaskej tikpiaskej se nemilis melauak iixpan Jiova? (Sal. 27:10; Mat. 10:21, 22.)

  • Xikixtajtolti Juan 11:25.

    Nochin tein momikiliaj porin kitekitiliaj Jiova, ¿toni motenkaua kinimakas? (Juan 5:24.)