Xionyoui kampa nesi tein kipia

Xionyoui kampa nesi tein kipia

Tanojnots 3: Yekinika takat uan yekinika siuat

Tanojnots 3: Yekinika takat uan yekinika siuat

¿TONI tikita tein taman itech nejin taixkopin? Kemaj, taltikpakneminij tein tikinita. Yejuan katkaj yekinika takat uan yekinika siuat. ¿Tikmati akoni kinchijchiuak? Dios. ¿Tikmati katiyejua itokay? Jiova. Yekinika takat motokaytij Adán uan yekinika siuat motokaytij Eva.

Adán uan Eva moajsij itech xochital itech Edén

Jiova Dios kichijchiuak Adán ijkon: kikuik tal uan ika kichijchiuak inakayo Adán tein amo teyi kipoloj. Satepan kiyekapitsak uan ijkuaka peuak nemi.

Dios kipialiaya se tekit Adán. Kiiluijka maj kintokaymakani nochin tataman tapialmej. Adán acha miak tonalmej kiniyekitak tapialmej keniujkej katkaj, uan ijkon uelik kintalilij se kuali tokayit. Keman kintokaymakatoya, peuak kiita teisa. ¿Tikmati toni?

Tapialmej nemiaj ojomen. Yetoyaj elefantejtetat uan elefantejtenan, uan yetoyaj tekuanitetat uan tekuanitenan. Sayoj ika Adán iselti katka. Yejika, Jiova kichiuak maj Adán tel kochini, uan ijkon kikixtilij inakastaj se ielchikiujomiyo. Ika nejon, Jiova kichijchiuilij se siuat tein mochiuako inamik.

¡Tel yolpakik Adán! ¡Uan no tel yolpakik Eva porin nemia itech se xochital tel kualtsin! Ijkuak, ueliskiajya kinpiaskiaj konemej uan senemiskiaj ika yolpakilis.

Jiova kinekia ika Adán uan Eva maj neminij nochipaya. Yej kinekia maj kichiuanij semanauak Taltikpak tel takualtsinkan kemej xochital itech Edén. ¡Tel yolpakkej Adán uan Eva keman kinemilijkej kichiuaskej semanauak Taltikpak se xochital! Komo ijkuak tinemiskia, ¿tikuelitaskia titapaleuis tikchiuas Taltikpak se kualtsin xochital? Sayoj ika Adán uan Eva amo uejkauak yolpaktoyaj. Tikitatij keyej.

Salmo 83:18; Génesis 1:26-31; 2:7-25.



Netajtanilmej

  • ¿Toni tikita tein taman itech itaixkopin tanojnots ome uan itech itaixkopin tanojnots eyi?
  • ¿Akoni kichijchiuak yekinika takat, uan keniuj motokaytij takat?
  • ¿Toni tekit kimakak Dios Adán maj kichiuani?
  • ¿Keyej kichiuak Dios maj tel kochini Adán?
  • ¿Kanachi xiuit ueliskiaj nemiskiaj Adán uan Eva, uan toni tekit kinekia Jiova maj kichiuanij?

Okseki netajtanilmej

  • Xikixtajtolti Salmo 83:18.

    ¿Katiyejua itokay Dios, uan toni ueyi tanauatil tein sayoj yejua kipia ipan Taltikpak? (Jer. 16:21; Dan. 4:17.)

  • Xikixtajtolti Génesis 1:26-31.

    Itech chikuasentika tonal, ¿toni tekit ika matamik kichijchiuak Dios, uan keniuj amo ijkuitik katka kemej tapialmej? (Gén. 1:26.)

    ¿Toni takual kinimakak Jiova taltikpakneminij uan tapialmej? (Gén. 1:30.)

  • Xikixtajtolti Génesis 2:7-25.

    ¿Toni monekia kichiuas Adán uan ijkon ueliskia kintokaymakaskia tapialmej? (Gén. 2:19.)

    ¿Keniuj techpaleuia Génesis 2:24 maj tikajsikamatikan tein kinemilia Jiova, keman aksa monamiktia, keman mokakauaj uan keman kitsayanaj amat iminixpan tekiuanij? (Mat. 19:4-6, 9.)