Xionyoui kampa nesi tein kipia

Xionyoui kampa nesi tein kipia

Tanojnots 1: Dios peuak tachijchiua

Tanojnots 1: Dios peuak tachijchiua

NOCHI tein kuali techmakatok Dios. Yej kichijchiuak Tonaltsin maj techmaka tanex, Metsti uan sitalimej maj techmakakan tanex itech youal. Uan Taltikpak maj ompa tinemikan.

Sayoj ika, Tonaltsin, Metsti, sitalimej uan Taltikpak amo yejua tein yekinika kichijchiuak Dios. ¿Tikmati toni achto kichijchiuak? Yekinika kinchijchiuak ángeles. Nejin amo ueli tikinitaj ijkon kemej Dios amo ueli tikitaj. Yej kinchijchiuak ángeles maj iuan nemikan iluikak.

Yekinika ángel tein Dios kichijchiuak katka semi taman. Katka yekinika iKoneuj Dios uan tekitik iuan iPopaj. Kipaleuij kichijchiuak nochi tein onkak. Kipaleuij kichijchiuak Tonaltsin, Metsti, sitalimej uan no Taltikpak.

¿Kenijkui katka Taltikpak achto? Yekinika amo akin uelia nemia nikan Taltikpak porin sayoj pexontoya at. Sayoj ika, Dios kinekia maj nemikan taltikpakneminij. Yejika, peuak techyekchijchiuilia. ¿Toni kichiuak?

Taltikpak monekia maj achto kipiani tanex. Yejika Dios kichiuak maj Tonaltsin taui itech Taltikpak, uan ijkon ueliskia tatanesiskia uan tatayouayantiaskia. Satepan kichiuak maj nesini taltikpak uan at maj mokauani tani.

Yekinika amo teyi onkaya nikan Taltikpak. Tamatia kemej taixkopin tein nikan tikita. Amo onkaya xochimej, kuoujmej niono tapialmej. Amo nemiaj amichimej itech at. Dios kipiaya miak tekit tein kichiuas uan ijkon tapialmej uan taltikpakneminij ueliskiaj kipiaskiaj se kuali nemilis nikan Taltikpak.

Jeremías 10:12; Colosenses 1:15-17, NM; Génesis 1:1-10.

Taltikpak kampa amo teyi onkak


Netajtanilmej

  • ¿Akoni techmakatok nochi tein kuali? ¿Uelis tiktalis se neskayot?
  • ¿Toni yekinika kichijchiuak Dios?
  • ¿Keyej katka taman yekinika ángel?
  • Xikmelaua keniuj katka Taltikpak keman ayamo yekchijchiujtoya (xikita taixkopin).
  • ¿Keniuj peuak kiniyekchijchiuilia Dios Taltikpak tapialmej uan taltikpakneminij?

Okseki netajtanilmej

  • Xikixtajtolti Jeremías 10:12.

    ¿Katiyejuan ikualneskayouan Dios monextiaj itech itachijchiualis? (Isa. 40:26; Rom. 11:33.)

  • Xikixtajtolti Colosenses 1:15-17, NM.

    Keman Dios kichijchiuak nochi tein onkak, ¿toni tekit kichiuak Jesús? Uan ijkon kemej yej tekitik, ¿keniuj kipata totanemilil itech yej?

  • Xikixtajtolti Génesis 1:1-10.

    ¿Akoni kichijchiuak Taltikpak? (Gén. 1:1.)

    ¿Toni mochiuak yekinika tonal keman Dios tachijchiujtoya? (Gén. 1:3-5.)

    ¿Toni mochiuak ojpatika tonal keman Dios tachijchiujtoya? (Gén. 1:7, 8.)