Xionyoui kampa nesi tein kipia

Xionyoui kampa nesi tein kipia

Tanojnots 9: Noé kichijchiuak se arca

Tanojnots 9: Noé kichijchiuak se arca
Taltikpakneminij kikejkelojtokej Noé

NOÉ uan inamik kinpiakej eyi konemej. Motokaytijkej Sem, Cam uan Jafet. Nochin kipiayaj imin namik. Senochin kemej kalyetouanij katkaj chikueyin.

Dios kiiluij Noé maj kichijchiuani se teisa tein amo keman kichijchiujtoya. Kiiluij maj kichijchiuani se ueyi arca. Tel ueyi katka kemej se barco, sayoj ika okachi tamatia kemej se ueyi kaxon uan ueyak. Dios kiiluij: ‘Xikchijchiua maj eyi ixnepantik, uan xiktalili cuartos’. Itech nejon cuartos yetoskiaj Noé uan ichankauan, tapialmej uan takual tein kikuaskiaj yejuan uan tapialmej.

Dios kiiluij Noé maj kichijchiuani arca kemej amo kalakiskia at. Uan kiiluij: ‘Nikualkuiti se tetsaujkakiouit uan ika nikinixpoloti nochin tein nemij itech taltikpak. Tein amo yetos itech arca mikis’.

Noé uan ikoneuan kitakamatkej Dios uan peuak kichijchiuaj arca. Sayoj ika, oksekin taltikpakneminij sayoj kinkejkelojkej uan kisentokakej kichiujkej tein amo kuali. Amo akin kineltokilij Noé keman kiniluij toni yaya kichiuati Dios.

Ichankauan Noé kikalakijtokej itech arca tapialmej uan takual

Kemej katka ueyi arca, kiniuikilij miak xiujmej kitamichijchiuaskej. Satepan keman matankej, Dios kiiluij Noé maj ompa kinkalakiani tapialtetatmej uan tapialtenamej. Kiiluij: ‘Tein amo chipaujkej se taman tapial xikalaki sayoj ome, uan tein chipaujkej se taman tapial xikinkalaki chikome. Uan no xikinkalaki nochin tataman totomej’. Noé kichiuak ijkon kemej Dios kiiluijka.

Satepan keman Noé uan ichankauan no kalakkej itech arca, Dios tatsakuak. Keman Noé uan ichankauan yetoyaj taijtika monekik mochiaskej. Ximonemili ika ompa tiyetok uan timochixtok. ¿Ualaskia tetsaujkakiouit ijkon kemej Dios kijtojka?

Génesis 6:9-22; 7:1-9.



Netajtanilmej

  • ¿Kanachimej katkaj Noé uan ichankauan, uan keniuj motokaytijkej eyi konemej?
  • ¿Toni kiiluij Dios Noé maj kichijchiuani tein amo keman kichijchiujtoya, uan keyej?
  • ¿Keniuj tanankilijkej taltikpakneminij keman Noé kiniluij toni yaya kichiuati Dios?
  • ¿Toni kiiluij Dios Noé maj kichiuani ika tapialmej?
  • Satepan keman Dios tatsakuak, ¿toni monekik kichiuaskej Noé uan ichankauan?

Okseki netajtanilmej

  • Xikixtajtolti Génesis 6:9-22.

    ¿Keniuj moitak itech Noé ika nochipa kiueyichiuaya Dios tein melauak? (Gén. 6:9, 22.)

    ¿Keniuj kiita Jiova tateuilis, uan keniuj moneki techpaleuis nejin keman tikijitaj toneixpetanilis? (Gén. 6:11, 12; Sal. 11:5.)

    ¿Keniuj no ijkon uelis tikchiuaskej kemej Noé, keman Jiova techmaka tanauatilmej imin tenkopa takamej tein kinixtalijtok maj taixyekanakan? (Gén. 6:22; 1 Juan 5:3.)

  • Xikixtajtolti Génesis 7:1-9.

    ¿Keniuj techyolchikaua tikmatiskej ika Jiova kipouak Noé yolmelauak maski katka tajtakojkej? (Gén. 7:1; Pro. 10:16; Isa. 26:7.)