Xionyoui kampa nesi tein kipia

Xionyoui kampa nesi tein kipia

Tanojnots 113: Pablo moajsik Roma

Tanojnots 113: Pablo moajsik Roma

XIKITA tepos tein ika mailpitok Pablo, uan xikita tajpixkej romano tein kiyekpia. Pablo kitsaktoyaj Roma. Mochixtoya maj César romano kijtouani toni kichiuiliskia. Keman Pablo tsaktoya, kikauayaj maj kikalpanouanij.

Eyi tonal satepan keman ajsika Roma, tajtanik maj seki tayekananij judíos kikalpanouanij. Yejika miakej judíos tein nemiaj Roma kiitatoj. Pablo ika kininojnotsak Jesús uan itekiuajyo Dios. Sekin kineltokakej uan mochiujkej imomachtijkauan Jesús, sayoj ika oksekin amo kineltokakej.

Pablo tsaktok

Pablo no kininojnotsak nochin tajpianij tein kiyekpiayaj. Itech ome xiuit keman Pablo tsaktoya Roma, kininojnotsak akin uelik. Yejika, ichankauan César no kikakkej kuali tanauatilmej ika iTekiuajyo Dios, uan sekin mochiujkej imomachtijkauan Jesús.

Sayoj ika, ¿akoni takalpanojkej tein tajkuilojtok itech mesa? ¿Tikmati akoni? Kemaj, yejua Timoteo. Kemej ika tanojnotsaya iTekiuajyo Dios, no kitsakkaj, sayoj ika kikixtijkajya. Uan kipaleuito Pablo, kemej moita nikan. ¿Tikmati toni kijkuilojtok? Maj tikitakan.

¿Tikinelnamiki altepemej kemej Filipos uan Efeso itech Tanojnots 110? Pablo tapaleuij maj ompa mopeualtiani yankuik kalnechikolmej. Uan keman Pablo tsaktoya, kinijkuilouilij amamej imomachtijkauan Jesús. Nejon amamej tein motokaytiaj Efesios uan Filipenses, moajsij itech Biblia. Nikan Pablo kiiluijtok Timoteo toni maj kinijkuilouili imin tasojikniuan tein nemij Filipos.

Filipenses kinextilijkej ueyi kualtakayot Pablo. Kititanilijkej se netetayokolil kampa tsaktoya, uan yejika kintajkuilouilij kampa kintasojkamatiliaya. Epafrodito, yejua kiuikilij netetayokolil Pablo. Yej kokolispeujka uan saachi miki. Sayoj ika pajtikaya, uan oksepa yaya mokepati ialtepeuj. Uan yejua kiuikaskia imin amauj Pablo uan Timoteo keman mokepaskia Filipos.

Keman Pablo tsaktoya kinijkuiloj ome amamej tein moajsij itech Biblia. Se kintitanilij imomachtijkauan Jesús tein nemiaj itech altepet Colosas. ¿Tikmati keniuj motokaytia? Colosenses. Okse kititanilij se itasojikniuj tein itokay Filemón tein no nemia Colosas. Amat ika tajtouaya Onésimo, se itekitikauj Filemón.

Onésimo kicholuij Filemón uan yajki Roma. Onésimo kimatik ika Pablo ompa tsaktoya. Yejika kikalpanoto Pablo uan yej kinojnotsak. Onésimo no niman mochiuak imomachtijkauj Jesús. Ompa, yej moyolkokouaya keyej choloj. Yejika, ¿tikmati toni Pablo kijkuilouilij Filemón itech amat?

Pablo kiiluij Filemón maj kitapojpoluiani Onésimo. Kijkuiloj nejin: ‘Oksepa nimitstitanilia. Sayoj ika axkan amo sayoj eski motekitikauj, ta no se kuali tokniuj tein kitekitilia Dios’. Keman Onésimo mokepak Colosas, kiuikak ome amamej, se kinimakak colosenses uan okse Filemón. ¡Ximonemili keniuj yolpakik Filemón keman kimatik ika itekitikauj Onésimo, mochiujkaya imomachtijkauj Jesús kemej yej!

Keman Pablo kintajkuilouilij filipenses uan Filemón, kinpialiaya kuali tanauatilmej. Pablo kiniluij filipenses: ‘Namechtitanilia Timoteo. Sayoj ika amo uejkaua no namechkalpanotiuj’. Uan Filemón, kijkuilouilij: ‘Xitayektali kampa nimokalotis’.

Keman Pablo kikixtijkej, miakkan kinkalpanoto tokniuan tein kitekitiliayaj Dios. Sayoj ika satepan, Pablo oksepa kitsakkej Roma. Kimatia ika ijkuak kimiktiskiajya. Yejika kitajkuilouilij Timoteo maj niman kikalpanouani. Kijkuiloj: ‘Amo keman nikauak Dios uan yej nechtatiochiuis’. Se ome eyi xiuit satepan keman Pablo momikilij, Jerusalén oksepa kiixpolojkej, uan ijkuak, kichiujkej romanos.

Sayoj ika moajsi oksekiok amaixmej itech Biblia. Jiova kichiuak maj tatitanil Juan kijkuilouani amaixmej tein ika tamiskiaya Biblia, semej motokaytia Apocalipsis. Nejin amaix ika tajtoua tein mochiuas satepan. Maj tikitakan tein mochiuati amo uejkaua.

Hechos 28:16-31; Filipenses 1:13; 2:19-30; 4:18-23; Hebreos 13:23; Filemón 1-25; Colosenses 4:7-9; 2 Timoteo 4:7-9.



Netajtanilmej

  • ¿Akonimej kininojnotsak Pablo keman tsaktoya Roma?
  • ¿Akoni takalpanojkej tein tokotsyetok mesajixpan, uan keniuj kipaleuia Pablo?
  • ¿Akoni katka Epafrodito, uan toni kiuikak keman mokepak Filipos?
  • ¿Keyej kijkuilouilij Pablo se amat iteltasojikniuj Filemón?
  • ¿Toni kichiuak Pablo keman kikixtijkej, uan toni kipanok satepan?
  • ¿Akoni kikuik Jiova maj kijkuilouani amaixmej tein ika tami Biblia, uan toni ika tajtoua amaix tein itokay Apocalipsis?

Okseki netajtanilmej

  • Xikixtajtolti Hechos 28:16-31 uan Filipenses 1:13.

    ¿Keniuj kikuik Pablo itonaluan keman tsaktoya Roma, uan keniuj kinpaleuij oloch tokniuan ichikauak takuaujtamatilis? (Hech. 28:23, 30; Fili. 1:14.)

  • Xikixtajtolti Filipenses 2:19-30.

    ¿Toni tajtolmej Pablo kinijkuilouilij Timoteo uan Epafrodito tein kinextiaya ika kintasojtaya, uan keniuj no ijkon uelis tikchiuaskej kemej tatitanil? (Fili. 2:20, 22, 25, 29, 30; 1 Cor. 16:18; 1 Tes. 5:12, 13.)

  • Xikixtajtolti Filemón 1-25.

    ¿Keniuj Pablo kitataujtij Filemón maj kichiuani tein kuali, uan keniuj nejin kinpaleuia axkan tokniuan ueuentsitsin? (File. 9; 2 Cor. 8:8; Gál. 5:13.)

    ¿Keniuj kinextia itajtoluan Pablo itech Filemón 13, 14, ika kipoujkaitaya imin tanemilil oksekin tokniuan tein monechikouayaj? (1 Cor. 8:7, 13; 10:31-33.)

  • Xikixtajtolti 2 Timoteo 4:7-9.

    Ijkon kemej tatitanil Pablo, ¿keyej uelis titakuaujtamatiskej ika Jiova techtatiochiuis komo amo keman tikauaj, ta tiksentokaj ijkuak ejkos tamilis? (Mat. 24:13, NM; Heb. 6:10.)