Xionyoui kampa nesi tein kipia

Xionyoui kampa nesi tein kipia

Tanojnots 111: Se telpoch tein kochik

Tanojnots 111: Se telpoch tein kochik

¡XIKITA! ¿Toni mochiujtok nikan? ¿Motelkokoj telpoch tein uetstok talpan? ¡Xikita, semej takamej tein kalankistok yejua Pablo! ¿No ueli tikita Timoteo nikan? ¿Timoluia ika pauetsik itech ventana telpoch?

Pablo kiajokuiki Eutico

Kemaj, yejua nejon mochiuak. Pablo moajsia Troas uan ompa kinimakatoya se tamachtilis imomachtijkauan Jesús. Yej kimatia ika amo niman kinitaskia porin mostika monekia kisas ika barco. Yejika tajkoyoualtij tamachtijtoya.

Tein mochiuak, nejin telpoch tein motokaytij Eutico, tokotsyetoya itech se ventana tein moajsia itech se kali eyi ixnepantik. ¡Ompa kochtiaj uan pauetsik! Yejika ueli tikinita keyej taltikpakneminij moteltekipachojtokej. Keman takamej kiajokkej telpoch, ¡kiitakej ika momikilij! Uan ipa yejua nejon kimouilijtoyaj.

Keman Pablo kiitak ika telpoch momikilij, ipan motekak uan kinapaloj. Ompa kijtoj: ‘Amo ximotekipachokan. ¡Telpoch kuali yetok!’ ¡Uan ijkon mochiuak! ¡Katka se mouiskatekit! ¡Pablo kiajokuik! Uan sepasaj yolpakkej nochin taltikpakneminij tein ompa yetoyaj.

Nochin oksepa tejkokej uan peuak takuaj. Pablo kisentokak tamachtijtoya uan ijkon tanesik. ¡Sayoj ika ueli tikyekmatij ika Eutico amo kochikok! Ompa, Pablo, Timoteo uan tein imiuan yayaj tejkokej itech barco. ¿Tikmati kani yajkej?

Pablo matantoyaya iexpatika takalpanolis ika tanojnotsalis. Itech nejin takalpanolis Pablo yetoya eyi xiuit sayoj itech altepet Efeso. Yejika, okachi uejkauaskia, amo kemej ojpatika.

Satepan keman kiskej Troas, barco tepitsin motsakuilij Mileto. Uan kemej amo tel uejka moajsia Efeso, Pablo kininotsak takamej tein okachi xiuejkej tein moajsiaj itech kalnechikol Efeso, maj yanij Mileto uan ompa sayojya kininojnotsaskia. Satepan, keman barco kistiayaya, ¡moteltayokoltijkej keman kiitakej Pablo yajki!

Ompa, barco mokepak Cesarea. Keman Pablo mokalotijtoya ichan Felipe, se imomachtijkauj Jesús, tanauatijkej Agabo kijtoj ika keman Pablo ajsiskia Jerusalén kitsakuaskiaj. Uan yejua nejon mochiuak kemej kijtojka Agabo. Uan satepan keman Pablo tsaktoya ome xiuit Cesarea, kititankej Roma, kampa kixkomakaskia César, tekiuaj romano. Tikitatij toni kipanok keman yajtoya Roma.

Hechos capítulos 19-26.



Netajtanilmej

  • ¿Akoni telpoch tein uetstok talpan, uan toni kipanok?
  • ¿Toni kichiuak Pablo keman kiitak ika telpoch momikilij?
  • ¿Kani yajkej Pablo, Timoteo uan tein imiuan yayaj, uan toni mochiuak keman motsakuilijkej Mileto?
  • ¿Toni tanauatijkej Agabo kinejmachtij Pablo, uan keniuj mochiuak kemej kijtoj tanauatijkej?

Okseki netajtanilmej

  • Xikixtajtolti Hechos 20:7-38.

    Kemej kijtoua itajtoluan Pablo itech Hechos 20:26, 27, ¿toni moneki tikchiuaskej uan ijkon ‘amo totajtakol eski komo se taltikpaknenkej ixpoliui’? (Eze. 33:8; Hech. 18:6, 7.)

    Keman tokniuan ueuentsitsin tamachtiskej, ¿keyej moneki maj amo ‘kisekokauakan itajtol Dios tein melauak’? (Hech. 20:17, 29, 30; Tito 1:7-9; 2 Tim. 1:13.)

  • Xikixtajtolti Hechos 26:24-32.

    ¿Keniuj kikuik Pablo tein kinamikia kiselis kemej romano, uan ika nejon uelik kiuikak tanojnotsalis tein Jesús kinauatijka? (Hech. 9:15; 16:37, 38; 25:11, 12; 26:32; Luc. 21:12, 13.)