Xionyoui kampa nesi tein kipia

Xionyoui kampa nesi tein kipia

Tanojnots 108: Itech ojti tein yaya Damasco

Tanojnots 108: Itech ojti tein yaya Damasco

¿TIKMATI akoni takat tein uetstok talpan? Yejua Saulo tein kinpialij imin taken tein kitetenkej Esteban. ¡Xikita tanex tein petantok! ¿Toni mochiujtok?

Satepan keman kimiktijkej Esteban, Saulo kintemouaya itatojtokakauan Jesús uan kinchiuiliaya tein amo kuali. Kalakia imin kalijtik, kinkixtiaya uan kintsakuaya. Miakej imomachtijkauan Jesús cholojkej itech okseki altepemej uan ompa kitetapouiayaj ‘kuali tanauatilmej’. Sayoj ika Saulo no yaya itech okseki altepemej uan kintemouaya itatojtokakauan Jesús. Keman yajtoya Damasco, yejua nejin mochiuak tein se kimojkaita:

Sepasaj se tanex tein ualaya iluikak kitauilij Saulo uan uetsik, kemej tikita nikan. Ompa, se tajtolis kijtoj: ‘¡Saulo, Saulo! ¿Keyej tinechchiuilia tein amo kuali?’ Takamej tein yetoyaj iuan, kiitakej tanex uan kikakkej tajtolis, sayoj ika amo kiajsikamatkej tein kijtouaya.

Saulo kiixpojpoloj se tanex

Saulo kijtoj: ‘¿Tiakoni Tejuatsin?’

Tajtolis kijtoj: ‘Nejua ni Jesús, akin tikchiuilia tein amo kuali’. Jesús kijtoj nejon porin keman Saulo kintajyouiltiaya itatojtokakauan, kimachiliaya kemej eskia yejua kichiuiliayaj tein amo kuali.

Ompa, Saulo tajtanik: ‘¿Toni moneki nikchiuas noTekotsin?’

Jesús kijtoj: ‘Ximoajokui uan xiouj Damasco. Ompa mitsiluiskej toni tikchiuas’. Keman Saulo moajokuik uan moixtapoj, amo tachiaya ¡Ixpopoyot katka! Yejika, takamej tein yayaj iuan kimajchankej uan kiajxitijkej Damasco.

Satepan, ompa Damasco, Jesús kinotsak se imomachtijkauj uan kiiluij: ‘Ananías, ximoajokui uan xiouj itech ojti tein itokay Melauak. Ichan Judas ika xitajtani se takat tein itokay Saulo. Nej nikijitak maj kitetapoui kuali tanauatilmej noyampa’.

Ananías tatakamatik. Keman kiitak Saulo, imauan kitalij ipan uan kiiluij: ‘ToTekotsin nechualtitanik maj nimitstachialtiki uan xipexoni ika yektikatsin espíritu’. Keman kijtoj nejon, kisak itech ixtololouan Saulo kemej eskia euatsitsin uan oksepa uelik tachiak.

Saulo kitelkuikej maj tanojnotsani itech miak uejueyi altepemej. Moixmatik kemej tatitanil Pablo, uan timomachtiskejok miak taman tein kichiuak. Sayoj ika, achto maj tikitakan tein Dios kiiluij maj kichiuani Pedro.

Hechos 8:1-4; 9:1-20; 22:6-16; 26:8-20.



Netajtanilmej

  • ¿Toni kichiuak Saulo satepan keman kimiktijkej Esteban?
  • ¿Toni mochiuak tein kimojkaitakej keman Saulo yajtoya Damasco?
  • ¿Toni kinauatij Jesús maj kichiuani Saulo?
  • ¿Toni Jesús kinajnauatij Ananías, uan keniuj oksepa uelik tachiak Saulo?
  • ¿Ika toni tokayit satepan moixmatik Saulo, uan keniuj tel tekitik?

Okseki netajtanilmej

  • Xikixtajtolti Hechos 8:1-4.

    ¿Keniuj kichiuak taixnamikilis, tein kipanokej yankuik oloch tokniuan tein monechikouayaj maj momoyauani kuali tanauatilmej, uan keniuj no ijkuitik mochiua axkan? (Hech. 8:4; Isa. 54:17.)

  • Xikixtajtolti Hechos 9:1-20.

    ¿Akonimej kinekia Jesús maj kininojnotsani Saulo? (Hech. 9:15; 13:5; 26:1; 27:24; Rom. 11:13.)

  • Xikixtajtolti Hechos 22:6-16.

    ¿Keniuj no ijkon uelis tikchiuaskej kemej Ananías, uan keyej motelneki? (Hech. 22:12; 1 Tim. 3:7; 1 Ped. 1:14-16; 2:12.)

  • Xikixtajtolti Hechos 26:8-20.

    Tikmatiskej ika Saulo mochiuak itekitikauj Dios, ¿keniuj kiniyolchikaua tokniuan akin kipiaj imin namik tein amo taneltokaj? (Hech. 26:11; 1 Tim. 1:14-16; 2 Tim. 4:2; 1 Ped. 3:1-3.)