Xionyoui kampa nesi tein kipia

Xionyoui kampa nesi tein kipia

Tanojnots 107: Kitetenkej Esteban

Tanojnots 107: Kitetenkej Esteban

NEJIN takat tein tankuaijkatok motokaytia Esteban. Yej se imomachtijkauj Jesús tein tatakamatkej. ¡Sayoj ika xikita tein mochiujtok! Nejin takamej kikajkauilijtokej uejueyi tet. ¿Keyej kiteltauelitaj Esteban? Maj tikitakan.

Esteban kitetentokej

Dios kipaleuiaya maj kichiua uejueyi mouiskatekimej. Uan no kinimachtiaya taltikpakneminij tein melauak, uan nejon takamej amo kiuelitayaj, yejika iuan motajtolteuijkej. Sayoj ika Dios kimakak Esteban ueyi tamatilis, uan kinextij ika nejon takamej tamachtiayaj xolopijyot. Nejon okachi kintelkualantij, yejika kikitskijkej uan kininotskej seki taltikpakneminij maj kitakajkayauilianij Esteban.

Tayekankej tiopixkat kitajtanij: ‘¿Melauj tein kijtouaj?’ Esteban tanankilij ika se kuali tanojnots ika Biblia. Keman matantiayaya, kiniluij ika ne uejkauj takamej amo yolkualmej kintauelitakej itanauatijkauan Dios. Ompa kijtoj: ‘Namejuan no ijkon nankichiuaj. Nankimiktijkej Jesús, itekitikauj Dios, uan amo nankitakamatij itanauatiluan Dios’.

¡Nejon kintelkualantij tayekananij itech taneltokalis! Kemej tel kualantoyaj, tananatskayaj. Sayoj ika, keman Esteban moixajokuik uan kijtoj: ‘¡Xikitakan! Ne iluikak nikita Jesús ijkatok iyekmakopa Dios’. Nejon takamej monakastsajtsakkej uan kikitskijkej Esteban. Kititilatskej uan kiajxitijkej altepetenoj.

Ompa, mokixtilijkej imin taken tein kipiayaj pani uan kikauilijkej telpoch Saulo maj kinpialiani. ¿Tikita Saulo? Satepan, seki takamej peuak kitetemaj Esteban. Yej motankuaketsak, kemej ueli tikita nikan, uan kichiuak netataujtil iuan Dios: ‘Jiova, amo xikintatsakuilti ika nejin tein amo kuali kichiujtokej’. Yej kimatia ika tayekananij itech taneltokalis kinkajkayaujtoyaj sekin, yejika ijkon kichiuayaj. Keman kitamiijtoj nejin, Esteban momikilij.

Keman aksa mitschiuilia teisa tein amo kuali, ¿tiktemoua keniuj timomakepas, oso tiktajtania Dios maj kinchiuili teisa tein amo kuali? Niono Esteban uan Jesús kichiujkej nejon. Yejuan katkaj yolkualmej imiuan taltikpakneminij maski kinchiuiliayaj tein tel amo kuali. Maj timochikauakan no ijkon tikchiuaskej.

Hechos 6:8-15; 7:1-60.



Netajtanilmej

  • ¿Akoni Esteban, uan toni kipaleuiaya Dios maj kichiua?
  • ¿Toni kijtoj Esteban tein kintelkualantij tayekananij itech taneltokalis?
  • Satepan keman kititilatskej Esteban uan kiajxitijkej altepetenoj, ¿toni kichiuilijkej?
  • Kemej moita itech taixkopin, ¿akoni telpoch tein ijkatok uan imets ixpan yetok seki taken?
  • ¿Toni Esteban kitajtanij Jiova itech netataujtil achtopa keman momikiliskia?
  • ¿Keniuj no ijkon uelis tikchiuaskej kemej Esteban keman aksa techchiuilis tein amo kuali?

Okseki netajtanilmej

  • Xikixtajtolti Hechos 6:8-15.

    ¿Toni kichiuaj tayekananij itech taneltokalis tein ika kinekij kitsakuiltiskej imin tanojnotsalis itaixpantijkauan Jiova? (Hech. 6:9, 11, 13.)

  • Xikixtajtolti Hechos 7:1-60.

    ¿Keyej uelik Esteban kipaleuij ika yolchikaualis kuali tanauatilmej imin ixpan oloch tamelauanij, uan toni technextilia nejin? (Hech. 7:51-53; Rom. 15:4; 2 Tim. 3:14-17; 1 Ped. 3:15.)

    ¿Toni tanemilil moneki tikixualtiskej uan tikinpialiskej tein kiixnamikij totanojnotsalis? (Hech. 7:58-60; Mat. 5:44; Luc. 23:33, 34.)