Xionyoui kampa nesi tein kipia

Xionyoui kampa nesi tein kipia

Tanojnots 103: Kalakik maski tatsaktoya

Tanojnots 103: Kalakik maski tatsaktoya

KEMAN Pedro uan Juan moajsiaj kampa yetoya inakayo Jesús uan satepan yajkej, María mokauak ompa uan peuak choka. ¡Ompa, kinalitak tekoyok kemej tikitakej itech okse tanojnots, uan kinitak ome ángeles! Yejuan kitajtanijkej: ‘¿Keyej tichoka?’

María tanankilij: ‘Kiuikakej noTekotsin, uan amo nikmati kani kitalijkej’. Ompa, mokepak uan kiitak se takat. Yej kitajtanij: ‘¿Akoni tiktemoua?’

María moluiaya ika nejon takat katka xochitajtekitikej, uan acha yejua kiuikak inakayo Jesús. Yejika kiiluij: ‘Komo tejua tikuikak, xinechilui kani tiktalij’. Sayoj ika nejon takat katka Jesús. Kipiaya inakayo tein María amo kiixmatia. Sayoj ika keman kinotsak ika itokay, María kimatik ika katka Jesús. Yejika motaloj kiniluito imomachtijkauan: ‘¡Nikitak toTekotsin!’

Satepan itech nejon tonal, keman ome imomachtijkauan yajtoyaj altepekonet Emaús, se takat kinajsito. Uan kemej Jesús momikilijkaya, imomachtijkauan tel tayokoxtoyaj. Sayoj ika keman ojtokatiayaj, nejon takat kinimelauilijtiaya miak taman tein Biblia kijtoua, uan yejuan kuali momachilijkej. Satepan, keman motsakuilijkej kampa takuaskiaj, ome imomachtijkauan kiixmatkej ika nejon takat katka Jesús. Yej poliuj uan yejuan mokepkej Jerusalén kiniluitoj tatitanilmej.

Keman yejuan mokeptoyaj, Jesús no kimonextilij Pedro. Oksekin moteluelitakej keman kikakkej nejon. Satepan, nejon ome imomachtijkauan ajsikej Jerusalén uan kinajsitoj tatitanilmej. Kiniluijkej ika Jesús kinimonextilij ojti. Keman kiniluijtoyaj nejon, ¿tikmati toni mochiuak tein kimojkaitakej?

Xikita taixkopin. Jesús monextij kalijtik kampa yetoyaj tatitanilmej, maski tatsaktoya. ¡Yejuan tel yolpakkej! ¡Tel kualtsin tein mochiuak nejon tonal! ¿Ueli tikpoua kanachpaya monextij Jesús? ¿Makuilpaya?

Jesús kinmonextilijtok imomachtijkauan

Tatitanil Tomás amo yetoya imiuan keman Jesús monextij. Yejika, imomachtijkauan kiiluijkej: ‘¡Tikitakej toTekotsin!’ Sayoj ika Tomás kijtoj ika kineltokas komo kiita. Chikueyi tonal satepan, imomachtijkauan yetoyaj oksepa itech se kali kampa tatsaktoya, uan ijkuak, Tomás ompa yetoya. Uan sepasaj monextij Jesús, uan Tomás kineltokak.

Juan 20:11-29; Lucas 24:13-43.



Netajtanilmej

  • ¿Toni kiiluij María se takat tein yej moluiaya ika katka se xochitajtekitikej, uan keniuj kimatik ika yekmelauj katka Jesús?
  • ¿Toni kinpanok ome imomachtijkauan Jesús keman yajtoyaj altepekonet Emaús?
  • Keman ome imomachtijkauan Jesús kiniluijtoyaj tatitanilmej ika kiitakej, ¿toni mochiuak tein kimojkaitakej?
  • ¿Kanachpaya kinimonextilij Jesús itatojtokakauan?
  • ¿Toni kijtoj Tomás keman kikakik ika imomachtijkauan Jesús kiitakej, uan toni mochiuak chikueyi tonal satepan?

Okseki netajtanilmej

  • Xikixtajtolti Juan 20:11-29.

    ¿Kijtojtoya Jesús itech Juan 20:23 ika taltikpakneminij kipiaj tanauatil maj kintapojpoluikan imin itajtakoluan aksamej? Xikmelaua (Sal. 49:2, 7; Isa. 55:7; 1 Tim. 2:5, 6; 1 Juan 2:1, 2).

  • Xikixtajtolti Lucas 24:13-43.

    ¿Toni moneki tikchiuaskej uan ijkon toyolo uelis kiselis itamachtilis Biblia tein melauak? (Luc. 24: 32, 33; Esd. 7:10; Hech. 16:14; Heb. 5:11-14.)