Xionyoui kampa nesi tein kipia

Xionyoui kampa nesi tein kipia

Tanojnots 102: Moajokuik Jesús

Tanojnots 102: Moajokuik Jesús

¿TIKMATI akoni nejin siuat uan akonimej ome takamej? Siuat motokaytia María Magdalena, itasojikniuj Jesús. Uan takamej tein istak takentokej, ángeles. María kinalitstok tekoyok kampa kitalijkej inakayo Jesús, ¡sayoj ika amo ompa yetokok! ¿Akoni kiuikak? Maj tikitakan.

Ángeles tajtojtokej iuan María Magdalena

Satepan keman momikilij Jesús, tiopixkamej kiiluitoj Pilato: ‘Keman Jesús yoltoya kijtoj ika eyi tonal satepan moajokuiskia. Yejika, xitanauati maj kiyekpiatij tekoyok. ¡Ijkon, imomachtijkauan amo uelis kichtekiskej inakayo uan kijtoskej ika moajokuik!’ Pilato kiniluij tiopixkamej maj kintitaninij tajpianij.

Sayoj ika, eyi tonal satepan keman Jesús momikilij, kualkasaj se iángel Jiova sepasaj monextij, uan kixkepak tet tein ika tentsaktoya tekoyok. Tajpianij motelmoujtijkej uan niono uelik moolinijkej. ¡Satepan, keman kinalitakej tekoyok, inakayo Jesús amo yetoyaok! Sekin tajpianij yajkej altepet uan kininojnotsatoj tiopixkamej. ¿Tikmati toni kichiujkej tiopixkamej amo yolkualmej? Kintaxtauijkej tajpianij uan kiniluijkej: ‘Xikijtokan ika imomachtijkauan kiuikakej keman nankochtoyaj’.

Satepan, sekin siuamej kiitatoj tekoyok. Sayoj ika amo yetoyaok inakayo Jesús, yejika ¡kimojkaitakej! Uan sepasaj, ome ángeles monextijkej ika imin taken tein petania. Tajtankej: ‘¿Keyej nankitemouaj Jesús nikan? Yej moajokuika. Xiyakan uan xikiniluitij imomachtijkauan’. Yejuan motalojkej. Sayoj ika se takat kintsakuilij ojti. ¿Tikmati akoni katka? ¡Katka Jesús! Kiniluij: ‘Xiyakan uan xikiniluitij nomomachtijkauan’.

Keman siuamej kiniluijkej imomachtijkauan Jesús ika yej oksepa yoltoya uan kiitakajya, yejuan amo ueliaj kineltokayaj. ¡Pedro uan Juan motalojkej kiitatoj tekoyok, sayoj ika amo teyi kipiayaok! Keman yejuan yajkej, María Magdalena mokauak ompa. Uan ijkuaka naltachiak uan kinitak ome ángeles.

¿Tikmati toni kipanok inakayo Jesús? Dios kichiuak maj poliuini. Dios amo kiajokuik Jesús ika inakayo kemej tein kipiaya achto. Ta kiajokuik kemej espíritu, ijkon kemej ángeles. Sayoj ika, Jesús monekia kinimatiltis imomachtijkauan ika moajokkaya, yejika monextij kemej ueliskiaj kiitaskiaj.

Mateo 27:62-66; 28:1-15; Lucas 24:1-12; Juan 20:1-12.



Netajtanilmej

  • ¿Akoni siuat tein moita itech taixkopin, akonimej ome takamej, uan kani yetokej?
  • ¿Keyej kininauatij Pilato tiopixkamej maj kintitaninij tajpianij uan maj kiyekpianij tekoyok kampa toktoya Jesús?
  • Eyi tonal satepan keman Jesús momikilij, ¿toni kichiuak se ángel kualkasaj, uan toni kichiujkej tiopixkamej?
  • ¿Keyej kimojkaitakej seki siuamej keman kiitatoj tekoyok kampa toktoya Jesús?
  • ¿Keyej motalojkej Pedro uan Juan itech tekoyok kampa toktoya Jesús, uan toni kiitakej?
  • ¿Toni kipanok inakayo Jesús, uan toni kichiuak tein ika kinimatiltij imomachtijkauan ika moajokkaya?

Okseki netajtanilmej

  • Xikixtajtolti Mateo 27:62-66 uan 28:1-15.

    ¿Keniuj tajtakojkej tayekananij tiopixkamej, fariseos uan ueuentsitsin ipan yektikatsin espíritu keman Jesús moajokuik? (Mat. 12:24, 31, 32; 28:11-15.)

  • Xikixtajtolti Lucas 24:1-12.

    Itech Biblia kampa ika motajtoua ineajokuilis Jesús, ¿keniuj kinextij Jiova ika uelis se kinineltokilis tein kijtouaj siuamej? (Luc. 24:4, 9, 10; Mat. 28:1-7.)

  • Xikixtajtolti Juan 20:1-12.

    Ijkuak amo senkis tikajsikamatiskej keniuj mochiuas teisa tein Biblia achtook kijtoua, ¿keniuj techpaleuia Juan 20:8, 9 maj tikitakan ika moneki maj amo tiyolijsiuikan? (Pro. 4:18; Mat. 17:22, 23; Luc. 24:5-8; Juan 16:12.)