Xionyoui kampa nesi tein kipia

Xionyoui kampa nesi tein kipia

Tanojnots 99: Moajsiaj ajko itech se kali

Tanojnots 99: Moajsiaj ajko itech se kali

PANOKA ome tonal, uan axkan jueves youak. Jesús uan 12 itatitaniluan ualajkej nikan ajko itech se kali, uan kimajseuakoj tiotakyot tein itokay Pascua. Tein kistok, Judas Iscariote, uan kiniluiti tiopixkamej keniuj kikitskiskej Jesús.

ITakualis toTekotsin

Se tonal achto, Judas kinininojnotska tiopixkamej uan kiniluijka: ‘¿Toni nanechmakaskej komo namechpaleuia xikitskikan Jesús?’ Kiiluijkej: ‘Sempoual uan majtakti platajtomin’. Ompa, Judas mosentilij imiuan uan ijkon kiniuikaskia kampa yetoya Jesús. ¿Amo timoluia ika tel amo kuali tein kichiuak?

Keman kitamichiujkej Pascua, Jesús kipeualtij okse takualis tein motelneki. Kinimakak itatitaniluan koyotaxkal uan kiniluij: ‘Xikuakan, porin nejin kijtosneki nonakayo tein namoka niktemakati’. Ompa, kikuik se tapalkat vino, uan kiniluij: ‘Xitayikan, porin nejin kijtosneki noesyo, tein namoka mimilauis’. Biblia kitokaytia nejin ‘itakualis toTekotsin’.

Keman israelitas kichiuayaj Pascua ika kielnamikiaj ijkuak iángel Dios ‘panok’ imin chajchan keman moajsiaj Egipto, uan kinimiktij imin tayekankakoneuan egipcios. Sayoj ika axkan Jesús kinekia maj itatojtokakauan kielnamikinij ika yej iminka momikilij. Yejika tanauatij maj ijkon kichiuanij xijxiujtika.

Keman kitamichiujkej iTakualis toTekotsin, Jesús kiniluij itatitaniluan maj moyolchikauanij uan maj eskiaj chikaujkej ika imin takuaujtamatilis. Ika tamik, mokuikatijkej uan ika kiueyichiujkej Dios uan kiskej. Acha panokaya tajkoyoual. ¿Kani yajkej?

Mateo 26:14-30; Lucas 22:1-39; Juan capítulos 13-17; 1 Corintios 11:20.



Netajtanilmej

  • Kemej moita itech taixkopin, ¿keyej yetokej Jesús iuan majtaktiomome itatitaniluan ajko itech se kali?
  • ¿Akoni takat tein kistok, uan toni kichiuati?
  • ¿Toni takualis tein motelneki kipeualtij Jesús satepan keman kitamichiujkej Pascua?
  • ¿Toni kinelnamiktiaya israelitas Pascua, uan toni kinelnamiktiskia itatojtokakauan Jesús nejin takualis tein motelneki?
  • Satepan keman kitamichiujkej iTakualis toTekotsin, ¿toni kiniluij Jesús itatojtokakauan, uan toni kichiujkej yejuan?

Okseki netajtanilmej

  • Xikixtajtolti Mateo 26:14-30.

    ¿Keniuj kinextia Mateo 26:15 ika keman Judas kitemaktij Jesús ipa achto kinemilijkaya?

    Xikijto ome taman keyej mimilauik iesyo Jesús (Mat. 26:27, 28; Jer. 31:31-33; Efe. 1:7; Heb. 9:19, 20).

  • Xikixtajtolti Lucas 22:1-39.

    ¿Toni kijtosneki keman moijtoua ika Satanás kalakik itech Judas? (Luc. 22:3; Juan 13:2; Hech. 1:24, 25.)

  • Xikixtajtolti Juan 13:1-20.

    Ika tein kijtoua Juan 13:2, ¿uelis se kitajtakoltis Judas ika tein kichiuak, uan toni technextilia axkan tein tiktekitiliaj Dios? (Gén. 4:7; 2 Cor. 2:11; Gál. 6:1; Sant. 1:13, 14.)

    ¿Toni se tel kuali neskayot kitemakak Jesús? (Juan 13:15; Mat. 23:11; 1 Ped. 2:21, NM.)

  • Xikixtajtolti Juan 17:1-26.

    ¿Toni kijtosnekik Jesús keman tajtanik itech netataujtil maj itatojtokakauan mochiuanij ‘sesaj’? (Juan 17:11, 21-23; Rom. 13:8; 14:19; Col. 3:14.)