Xionyoui kampa nesi tein kipia

Xionyoui kampa nesi tein kipia

Tanojnots 95: Keniuj tamachtij Jesús

Tanojnots 95: Keniuj tamachtij Jesús

SE TONAL Jesús kiiluij se takat ika monekia kintasojtas taltikpakneminij. Yej tajtanik: ‘¿Kemej akonimej moneki nikintasojtas?’ Jesús kimatia toni kinemilijtoya takat. Yej moluiaya ika monekia kintasojtas sayoj judíos uan tein pouiaj itech taneltokalis tein kipiaya. Yejika maj tikitakan toni kiiluij Jesús.

Iksa Jesús tamachtiaya ika tanojnotsmej. Uan axkan maj tikitakan se. Kitetapouij tein kipanok se judío uan se samaritano. Timomachtijkejya ika miakej judíos amo kiniyekitayaj samaritanos. Yejua nejin tanojnots:

Se tonal se judío temouaya itech ojti tein yaya Jericó. Sayoj ika seki takamej kitachtekijkej. Kikuilijkej itomin, kitelmaakej uan kiixtayoualtijkej.

Satepan, se tiopixkat judío panok itech ojti, uan kiitak takat takokol. ¿Toni timoluia kichiuak? Sayoj kitayoualuij uan yajki. Ompa, se levita tel taneltokakej panok ompakauin. ¿Motsakuilij? Amo, amo no motsakuilij kipaleuis takat. Ueli tikiniuejkaita tiopixkat uan levita pantemotiouij itech ojti.

Sayoj ika xikita akoni yetok nikan iuan takat judío tein takokol. Se samaritano uan kipaleuijtok. Yej kipajtilij kampa kikojkokojkej. Satepan, kiuikak kampa ueliskia moseuiskia uan pajtiskia.

Samaritano tein tapaleuijtok

Keman Jesús kitamiijtoj itanojnots, kitajtanij takat: ‘¿Akoni timoluia ika kinextilij netasojtalis takat tein kikojkokojkej? ¿Tiopixkat, levita, oso samaritano?’

Takat tanankilij: ‘Samaritano, tein kipaleuij takat takokol’.

Jesús kiiluij: ‘Melauj tein tikijtoua. Yejika, xiouj uan no ijkon xikinchiuiliti oksekin taltikpakneminij kemej yej kichiuak’.

¿Tikuelita kemej tamachtij Jesús? ¿Melauj ika tejuan uelis timomachtiskej miak taman tein motelneki ika tein kijtoj Jesús itech Biblia?

Lucas 10:25-37.



Netajtanilmej

  • ¿Toni netajtanil kichiuilij se takat Jesús, uan keyej?
  • ¿Toni kikuia iksa Jesús keman tamachtiaya, uan keniuj timomachtijkejya ika mouikayaj judíos uan samaritanos?
  • Itech tanojnots tein Jesús kijtoj, ¿toni kipanok se judío tein temouaya itech ojti tein yaya Jericó?
  • ¿Toni mochiuak keman se tiopixkat judío uan se levita panokej itech nejon ojti?
  • Kemej moita itech taixkopin, ¿akoni kipaleuijtok judío tein kikojkokojkej?
  • Keman Jesús kitamiijtoj tanojnots, ¿toni kitajtanij takat, uan keniuj tanankilij?

Okseki netajtanilmej

  • Xikixtajtolti Lucas 10:25-37.

    Ijkuak se taltikpaknenkej tein kitelixmatia iTanauatil Dios kitajtanij Jesús akoni monekia kitasojtas, ¿keniuj kipaleuij Jesús maj iselti monankiliani? (Luc. 10:26; Mat. 16:13-16.)

    ¿Keniuj kikuia neskayomej Jesús kemej kinpaleuiskia tein kikaktoyaj maj amo kinpialianij se tanemilil tein amo kuali taltikpakneminij, maski ayamo kinixmatiaj? (Luc. 10:36, 37; 18:9-14; Tito 1:9.)