Xionyoui kampa nesi tein kipia

Xionyoui kampa nesi tein kipia

Tanojnots 94: Jesús kintasojtak konemej

Tanojnots 94: Jesús kintasojtak konemej

XIKITA, nikan Jesús kinapalojtok se konet. Moita ika yej iminka motekipachoua konemej. Takamej tein kiitstokej yejuan itatitaniluan. ¿Tikmati toni kiniluia Jesús?

Jesús uan itatitaniluan uejka yajkaj uan mokepkajya. Itech ojti, tatitanilmej motajtolteuijkej. Yejika, satepan keman ajsikej, Jesús kintajtanij: ‘¿Toni ika namotajtolteuiayaj ojti?’ Tein melauj Jesús kimatia toni ika motajtolteuijkej. Sayoj kinekia kiitas ox kiiluiskiaj, yejika kintajtanij.

Jesús uan se konet

Tatitanilmej amo tanankilijkej, porin itech ojti motajtolteuiayaj akoni eskia okachi ueyichiujkej. Sekin kinekiaj okachi moueyichiuaskej inpan oksekin. ¿Keniuj kiniluiskia Jesús ika amo kuali maj kinejnekinij moueyichiuaskej?

Yej kinotsak se konet, uan kitalij imin ixpan imomachtijkauan, uan kiniluij: ‘Nikneki kuali xikmatikan nejin: Komo amo namopataj uan namochiuaj kemej konemej, amo keman nayetoskej itech itekiuajyo Dios. Taltikpaknenkej tein okachi ueyi itech tekiuajyot, yejua tein mochiua kemej nejin konet’. ¿Tikmati keyej kijtoj nejin?

Konemej amo kinemiliaj mochiuaskej tayekananij niono moueyichiuaskej inpan oksekin. Yejika tatitanilmej monekia mochiuaskej kemej konemej uan amo moteuiskiaj ika akoni eskia tayekankej oso ueyichiujkej.

Okseki tonalmej satepan, Jesús no kinextij ika iminka moteltekipachouaya konemej. Se ome eyi metsti satepan keman taltikpakneminij kiniuikayaj konemej maj kiitatij Jesús, tatitanilmej kinekiaj kintsakuiltiskej. Sayoj ika Jesús kijtoj: ‘Xikinkauakan konemej maj ualakan nouan, uan amo xikintsakuiltikan, porin itekiuajyo Dios imin axkatis taltikpakneminij kemej konemej’. Ompa, kininapaloj konemej uan kintiochiuak. ¡Semi kuali tikmatiskej ika Jesús kintasojtak konemej! ¿Melauj?

Mateo 18:1-4; 19:13-15, NM; Marcos 9:33-37; 10:13-16.



Netajtanilmej

  • ¿Keyej motajtolteuijkej tatitanilmej keman uejka yajkaj uan mokeptoyajya?
  • ¿Keyej kinotsak Jesús se konet uan kitalij imin ixpan tatitanilmej?
  • ¿Toni kijtosnekia Jesús keman kiniluij itatitaniluan ika monekia mochiuaskej kemej konemej?
  • ¿Keniuj kinextij Jesús ika kintasojtaya konemej se ome eyi metsti satepan?

Okseki netajtanilmej

  • Xikixtajtolti Mateo 18:1-4.

    ¿Keyej Jesús kikuia neskayomej keman tamachtiaya? (Mat. 13:34, 36; Mar. 4:33, 34.)

  • Xikixtajtolti Mateo 19:13-15, NM.

    ¿Toni kualneskayomej tein kipiaj konemej moneki tikixualtiskej komo tiknekij tikseliskej itatiochiualisuan Tekiuajyot? (Sal. 25:9; 138:6; 1 Cor. 14:20.)

  • Xikixtajtolti Marcos 9:33-37.

    ¿Toni kinimachtij Jesús imomachtijkauan tein kinekiaj mochiuaskej tayekananij oso uejueyimej? (Mar. 9:35; Mat. 20:25, 26; Gál. 6:3; Fili. 2:5-8.)

  • Xikixtajtolti Marcos 10:13-16.

    ¿Keniuj kiniseliaya Jesús taltikpakneminij, uan toni kininextilia nejin tokniuan ueuentsitsin? (Mar. 6:30-34; Fili. 2:1-4; 1 Tim. 4:12.)