Xionyoui kampa nesi tein kipia

Xionyoui kampa nesi tein kipia

Tanojnots 90: Jesús tajtoj iuan se siuat itech ameyal

Tanojnots 90: Jesús tajtoj iuan se siuat itech ameyal

JESÚS motsakuilij itech se ameyal tein moajsi Samaria uan ompa moseuijtok. Imomachtijkauan yajkej itech altepet kikouatoj toni kikuaskej. Uan siuat akin Jesús iuan tajtojtok atakuiko. Jesús kiiluij: ‘Xinechuanti tsikitsin at’.

Jesús tajtojtok iuan se siuat samaritana

Siuat kitelmojkakakik. ¿Tikmati keyej? Jesús katka judío, uan siuat katka samaritana. Uan miakej judíos amo kiniyekitayaj samaritanos. ¡Niono kininotsayaj! Sayoj ika Jesús kintasojtaya nochin taltikpakneminij. Yej kiiluij siuat: ‘Komo tikmatiskia akoni mitstajtania at, tej tiktajtaniskia, uan yej mitsmakaskia at tein kitemaka nemilis’.

Siuat kijtoj: ‘Tejuatsin, ameyal tel uejkatan, uan amo tikpia toni ika tikixtis. ¿Kani tikuiti at tein kitemaka nemilis?’

Jesús kiiluij: ‘Komo titayi nejin at oksepa tiamikis. Sayoj ika at tein nimitsmakati ueli kichiua maj se nemi nochipaya’.

Siuat kijtoj: ‘Tejuatsin, ¡xinechmaka nejon at! Ijkon, amo kemanok niamikis. Uan amo no monekisok niatakuikiuj’.

Siuat moluiaya ika Jesús kinojnotstoya ika yekmelauj at. Uan amo ijkon, ta ika kinojnotstoya tein melauak kijtoua Dios uan itekiuajyo, tein tamati kemej at tein kitemaka nemilis. Ueli kitemaka nemilis nochipaya.

Ompa, Jesús kiiluij siuat: ‘Xiknotsati monamik uan oksepa xiuiki’.

Siuat kijtoj: ‘Amo nikpia nonamik’.

Jesús kiiluij: ‘Kuali titanankilij. Sayoj ika tikinpiak makuil monamikuan, uan takat tein axkan iuan tinemi amo monamik’.

Nejon katka melauak, uan yejika siuat kimojkakakik. ¿Keniuj kimatik Jesús nochi nejon? Dios kimatiltij, porin Jesús katka akin Dios motenkaujka ika kititaniskia. Ompa, imomachtijkauan Jesús mokepkej, uan kimojkaitakej Jesús maj kinojnotstoni se samaritana.

¿Toni technextilia nochi nejin? Ika Jesús katka kualtakat imiuan nochin taltikpakneminij. Tejuan no ijkon maj timochiuakan; maj amo timoluikan ika aksa amo yolkuali sayoj porin chijchipauak oso maseual. Jesús kinekia maj nochin taltikpakneminij kiixmatinij iTajtol Dios tein teuika itech nemilis nochipaya. Uan tejuan maj no tiknekikan tikinpaleuikan taltikpakneminij maj kiixmatikan.

Juan 4:5-43; 17:3.



Netajtanilmej

  • ¿Keyej motsakuilij Jesús ameyaltenoj tein moajsia Samaria, uan toni kiiluij se siuat tein ompa ajsik?
  • ¿Toni kimojkakakik siuat, toni kiiluij Jesús, uan keyej?
  • ¿Katiyejua at moluiaya siuat ika kinojnotstoya Jesús, sayoj ika tein yekmelauj katiyejua at ika tajtouaya Jesús?
  • ¿Keyej kimojkakakik siuat maj Jesús kimatiliani inemilis, uan akoni kimatiltij Jesús?
  • ¿Toni technextilia nejin tanojnots?

Okseki netajtanilmej

  • Xikixtajtolti Juan 4:5-43.

    Ijkon kemej kichiuak Jesús, ¿keniuj moneki tikinitaskej nochin taltikpakneminij? (Juan 4:9; 1 Cor. 9:22; 1 Tim. 2:3, 4; Tito 2:11.)

    ¿Toni tatiochiualismej tein ualeua imako Dios kiselia akin mochiua imomachtijkauj Jesús? (Juan 4:14; Isa. 58:11; 1 Ped. 5:10.)

    Kemej samaritana tein kitelnekik kitetapouis tein kikakik, ¿keniuj no ijkon uelis tiknextiskej ika tikpatiujitaj nemachtil tein kipia Biblia? (Juan 4:7, 28; Mat. 6:33, NM; Luc. 10:40-42.)