Xionyoui kampa nesi tein kipia

Xionyoui kampa nesi tein kipia

Tanojnots 87: Telpoch Jesús moajsik templo

Tanojnots 87: Telpoch Jesús moajsik templo

XIKITA telpoch tein tajtoua imiuan takamej tein xiuejkejya. Yejuan tamachtiaj itech itemplo Dios tein moajsi Jerusalén. Uan telpoch yejua Jesús. Nesi ika moteliskaltijya. Kipia 12 xiujmej.

Tamachtianij kitelmojkaitayaj Jesús maj kitelmatini tein Dios tamachtia uan nochi tein ijkuiliujtok itech Biblia. Sayoj ika, ¿keyej amo yetokej nikan José uan María? ¿Kani yetokej? Maj tikitakan.

Telpoch Jesús kinnojnotstok tamachtianij

Xijxiujtika José kiniuikaya ichankauan Jerusalén, uan ompa teuantiaj itech se ueyi iluit tein motokaytiaya Pascua. Tel uejka nejnemiaj keman kisayaj Nazaret uan yayaj Jerusalén. Amo onkayaj tepostamamanij niono tepospataninij. Yejika tel miakej taltikpakneminij nejnemiaj, uan yejuan kiniuikiliaya eyi tonal ajsiskej Jerusalén.

Itech nejon xiujmej, José kipiaya miakej ikoneuan. Uan monekia kinitas ikniuan Jesús okichpipil uan siuapipil tein okachi konemej katkaj. Itech nejon xiuit, José uan María mokeptoyajya Nazaret imiuan konemej. Moluiayaj ika Jesús yetoya imiuan okseki taltikpakneminij tein no mokeptoyajya. Sayoj ika keman motsakuilijkej kampa yaya mokauatij, amo kiajsikej. ¡Kitemojkej kampa yetoyaj imin chankauan uan imin tasojikniuan, uan amo no kiajsikej! Yejika mokepkej Jerusalén kitemotoj.

Satepan kiajsikej nikan itech templo. Kinkaktoya tamachtianij uan kinchiuilijtoya netajtanilmej. Uan nochin taltikpakneminij kimojkaitayaj tamatilis tein kipiaya Jesús. Sayoj ika María kiiluij: ‘Nokonetsin, ¿keyej ijkon titechchiuak? Mopopaj uan nejua timotekipachojtoyaj uan timitstemojtinemiaj’.

Jesús tanankilij: ‘¿Keyej nanechtemojtinemiaj? ¿Amo nankimatiaj ika monekia niyetos ichan noPopaj?’

Kemaj, Jesús kiuelitaya yetos kampa okachi kimatiskia tein Dios tamachtia. Tejuan no ijkon moneki timochiuaskej, ¿melauj? Ompa Nazaret, Jesús nochipa yaya nechikolmej kampa taueyichiuayaj. Uan kemej kuali kikakia tein moijtouaya, kimatik miak taman tein Biblia kijtoua. Maj tiktojtokakan ineskayo Jesús.

Lucas 2:41-52; Mateo 13:53-56.



Netajtanilmej

  • ¿Kanachi xiuit kipia Jesús nikan itech taixkopin, uan kani yetok?
  • ¿Toni kichiuaya José xijxiujtika iuan ichankauan?
  • Satepan keman José uan María nejnenkajya se tonal keman mokeptoyaj iminchan, ¿keyej oksepa mokepkej Jerusalén?
  • ¿Kani José uan María kiajsikej Jesús, uan keyej taltikpakneminij kimojkaitayaj Jesús?
  • ¿Toni Jesús kiiluij imomaj?
  • ¿Keniuj uelis tiktojtokaskej ineskayo Jesús keman timomachtiskej tein Dios kijtoua?

Okseki netajtanilmej

  • Xikixtajtolti Lucas 2:41-52.

    Maski Tanauatil kijtouaya ika sayoj takamej monekia yaskej iluit tein mochiuaya xijxiujtika, ¿toni kuali neskayot kinkauilijkej José uan María axkan tetatmej? (Luc. 2:41; Deu. 16:16; 31:12; Pro. 22:6.)

    Ijkon kemej Jesús kintakamatik itatuan, ¿toni se kuali neskayot kinkauilij axkan telpochmej uan ichpochmej? (Luc. 2:51; Deu. 5:16; Pro. 23:22; Col. 3:20.)

  • Xikixtajtolti Mateo 13:53-56.

    ¿Keniuj motokaytijkej naui ikniuan Jesús tein ixnesij itech Biblia? Uan ¿keniuj kinkuikej satepan Jacobo (tein no motokaytij Santiago) uan Judas kemej itekitikauan Dios? (Mat. 13:55; Hech. 12:17; 15:6, 13; 21:18; Gál. 1:19; Sant. 1:1; Jud. 1:1.)