Xionyoui kampa nesi tein kipia

Xionyoui kampa nesi tein kipia

Tanojnots 85: Jesús nemik kampa kineuayaj tapialmej

Tanojnots 85: Jesús nemik kampa kineuayaj tapialmej

¿TIKMATI akoni nejin konet? Kemaj, yejua Jesús. Yekin nemik kampa kineuaj tapialmej. María kitektok Jesús kampa kintatemiaj kuakuejmej uan okseki tapialmej. Sayoj ika, ¿keyej yetokej María uan José nikan imiuan tapialmej? Nikan amo se kali kemej kampa uelis nemis se konet, ¿melauj?

Amo, amo ijkon. Sayoj ika yejuan yetokej nikan, porin takat César Augusto, tein tekiuajtia Roma, kichiuak se tanauatil kampa kijtouaya ika nochin taltikpakneminij maj mokepanij itech imin altepeuj kampa nenkaj, uan maj ompa moamataliani imin tokay. José nemik Belén. Sayoj ika keman yejua uan María ajsikej, amo kiajsikej kani mokalotiskej. Yejika yajkej kampa kineuayaj tapialmej. ¡Uan nejon tonal María kipiak Jesús! Sayoj ika kemej tikita, Jesús kuali yetok.

José, María uan konetsin Jesús

¿Ueli tikinita tajpianij tein kiitakij Jesús? Yejuan yetoyaj youak itech ixtauat uan se tanex kintauilij. ¡Katka se ángel! Tajpianij motelmoujtijkej. Sayoj ika ángel kiniluij: ‘¡Amo ximomoujtikan! Namechualkuilia kuali tanauatilmej. Axkan, ne Belén yolik Cristo toTekotsin. ¡Nejin kinimakixtis itekitikauan Dios! Nankiajsiskej tetsiliujtok ika taken uan uetstok kampa kintatemiaj tapialmej’. Sepasaj, miakej ángeles ajsikej uan peuak kiueyichiuaj Dios. Ompa, tajpianij motalojkej kitemotoj Jesús, uan kiajsitoj kemej nikan moita.

¿Tikmati keyej taman katka Jesús? ¿Tikmati akoni yekmelauj katka? Xikelnamiki, itech iyekinika tanojnots nejin amaix, ika titajtojkej yekinika iKoneuj Dios. Yej tekitik iuan Jiova keman kichijchiuak iluikak, Taltikpak uan nochi tein tikitaj. Tein nikan moita, ¡yejua Jesús!

Kemaj, Jiova kikuik inemilis iKoneuj ne iluikak uan kipanoltij iijtik María. Ompa, peuak moskaltia konet kemej nochin konemej moskaltiaj iijtik imin momaj. Sayoj ika nejin konet katka iKoneuj Dios. Satepan, Jesús nemik Belén kampa kineuayaj tapialmej. ¿Ueli tikita keyej yolpakkej ángeles keman kiniluijkej tajpianij ika Jesús nemika?

Lucas 2:1-20.



Netajtanilmej

  • ¿Akoni konet tein yetok itech taixkopin, uan kani kitektok María?
  • ¿Keyej nemik Jesús kampa kineuayaj tapialmej?
  • ¿Akonimej takamej tein kalaktokej kampa kineuaj tapialmej, uan toni kiniluij se ángel?
  • ¿Keyej taman katka Jesús?
  • ¿Keyej uelis se kitokaytis Jesús iKoneuj Dios?

Okseki netajtanilmej

  • Xikixtajtolti Lucas 2:1-20.

    Ika tein kichiuak César Augusto, ¿keniuj mochiuak ijkon kemej moijtojka kani nemiskia Jesús? (Luc. 2:1-4; Miq. 5:2.)

    ¿Keniuj uelis se aksa mopouas imiuan taltikpakneminij tein kiyolpaktiaj Dios? (Luc. 2:14; Mat. 16:24; Juan 17:3; Hech. 3:19; Heb. 11:6.)

    Komo nejon tajpianij yolyemankej tein nemiaj Judea, yolpakkej keman nemik Temakixtijkej, ¿keyej axkan moneki okachiok yolpakiskej itekitikauan Dios? (Luc. 2:10, 11; Efe. 3:8, 9; Apo. 11:15; 14:6.)