Xionyoui kampa nesi tein kipia

Xionyoui kampa nesi tein kipia

Tanojnots 80: Israelitas kiskej Babilonia

Tanojnots 80: Israelitas kiskej Babilonia

AJSITOYAYA ome xiuit ijkuak medos uan persas moaxkatilijkej Babilonia. ¡Uan xikita tein mochiujtok axkan! Kemaj, israelitas kistokej Babilonia. ¿Keniuj mokixtijkej? ¿Akoni kinkauak maj kisanij?

Kinkauak Ciro, tein tekiuajtia Persia. Miak xiujmej achtopa keman nemiskia Ciro, Jiova kichiuak maj itanauatijkauj Isaías kijkuilouani tein kichiuaskia: ‘Tikchiuas tein nej nikneki xikchiua. Kikauaskej maj tatapoto altepet uan ijkon uelis timoaxkatilis’. Uan Ciro kemaj taixyekanak keman moaxkatilijkej Babilonia. Medos uan persas kalakkej youak itech altepet kampa tatapotoya.

Sayoj ika Isaías, itanauatijkauj Jiova no kijtojka ika Ciro tanauatiskia maj kiyekachijchiuanij Jerusalén uan itemplo. ¿Kitemakak tekiuaj Ciro nejin tanauatil? Kemaj. Yejua nejin tein kiniluij israelitas: ‘Xiyakan Jerusalén, uan ompa xikchijchiuakan itemplo Jiova namoDios’. Uan yejua nejon yaya kichiuatij israelitas.

Israelitas kistokej Babilonia

Sayoj ika amo nochin israelitas tein moajsiaj Babilonia ueliskiaj mokepaskiaj Jerusalén. Ta uejka katka, ¡tel uejka! Monekia nejnemiskej kemej naui metsti, uan miakej katkaj xiuejkejya uan mokokouayajya. Uan okseki tamanok kintsakuiltij maj amo yanij. Sayoj ika tein amo yaya mokepatij, Ciro kiniluij: ‘Xikinimakakan plata uan oro uan okseki netetayokolilmej tein mokepatij uan kichijchiuatij Jerusalén uan templo’.

Yejika, israelitas tein mokepkej Jerusalén kiselijkej miak netetayokolilmej. Uan Ciro no kinimakak tatayilonimej tein tekiuaj Nabucodonosor kinkixtijka itech itemplo Jiova keman kixpolojkej Jerusalén. Tel miak taman kiuikakej israelitas.

Satepan keman israelitas ojtokakej kemej naui metsti, ajsikej Jerusalén ijkon kemej moijtojka. Panokaya ajsitok 70 xiujmej ijkuak Jerusalén kiixpolojkaj uan mokaujka taseltijkan. Sayoj ika maski israelitas moajsiajya imin talpan, kipanokej ouijkayomej, kemej tikitaskej.

Isaías 44:28; 45:1-4; Esdras 1:1-11.



Netajtanilmej

  • Kemej moita itech taixkopin, ¿toni kichiujtokej israelitas?
  • ¿Keniuj kichiuak Ciro ijkon kemej kijtojka Jiova itenkopa Isaías?
  • ¿Toni kiniluij Ciro israelitas tein amo ueliskiaj mokepaskiaj Jerusalén?
  • ¿Toni Ciro kinimakak israelitas maj kiuikanij Jerusalén?
  • ¿Kanachi metsti kiniuikilij israelitas ajsiskej Jerusalén?
  • ¿Kanachi xiuit mokaujka taseltijkan imin talpan Israelitas?

Okseki netajtanilmej

  • Xikixtajtolti Isaías 44:28 uan 45:1-4.

    Keman Jiova achtook kijtoj tein kichiuaskia Ciro, ¿keniuj kiyeknextij ika melauj mochiuaskia? (Isa. 55:10, 11; Rom. 4:17.)

    Keman Isaías achtook kijtojka tein kichiuaskia Ciro, ¿keniuj kinextia ika Jiova ueli kijtoua tein mochiua satepan? (Isa. 42:9; 45:21; 46:10, 11; 2 Ped. 1:20.)

  • Xikixtajtolti Esdras 1:1-11.

    Ijkon kemej kichiujkej israelitas tein amo uelik mokepkej Jerusalén, ¿keniuj no ijkon uelis tikinpaleuiskej tein motemakaj okachiok kitekitiliskej Jiova? (Esd. 1:4, 6; Rom. 12:13; Col. 4:12.)