“Xiksentokakan xitakuautamatiyakan.” (1 COR. 16:13)

NEKUIKATILMEJ 23 UAN 34

1. 1) ¿Toni kipanok Pedro keman tel chikaujkaejekaya itech ueyiat tein poui Galilea? (Xikonita taixkopin ipeujyan tamachtilis.) 2) ¿Keyej Pedro peuak pankalaki?

SE YOUAK, keman Pedro uan okseki imomachtijkauan Jesús kipanauijtoyaj itech se barco ueyiat tein poui Galilea, peuak tel chikaujkaejeka. Ompa, kiitakej Jesús nejnentiyaya aixko. Pedro kitajtanij Jesús ox ueliskia nejnemis aixko ijkon kemej yejua. Jesús kiluij ke kemaj. Yejua ika Pedro kisak itech barco uan peuak nejnemi kiajsiti Jesús. Sayoj ke satepan ke tepitsin nejnemik, peuak pankalaki. ¿Keyej? Porin kiitak chikaujkaejekat uan mouik. Yejua ika Pedro kitajtanij Jesús maj kipaleuiani. Jesús kimakitskij uan kiluij: “Tejua tagatsin, semi tepitsin san tikpia motakuautamatilis. ¿Keye amo [tiyektakuaujtamatik] nouan?” (Mat. 14:24-32).

2. ¿Toni tikitaskej itech nejin tamachtilis?

2 Itech nejin tamachtilis tikitaskej eyi taman tein uelis techmachtis tein kipanok Pedro. Yekinika, keniuj achto kinextij ke takuaujtamatia ke Jiova kipaleuiskia. Ojpatika, keyej peuak kipoloua itakuaujtamatilis. Uan expatika, keniuj oksepa kichikauak itakuaujtamatilis. Komo tikmatij nejin eyi taman techpaleuis maj  chikauak tikpiakan totakuaujtamatilis (1 Cor. 16:13).

MAJ TITAKUAUJTAMATIKAN IUAN JIOVA

3. 1) ¿Keyej kisak Pedro itech barco uan nejnemik aixko? 2) ¿Keniuj akin tikchiuaj kemej Cristo no tikchiujkej se taman kemej nejon?

3 Keman Jesús kinotsak Pedro, yejua kisak itech barco uan nejnemik aixko. ¿Keyej kichiuak nejon? Porin takuaujtamatia ke Jiova kipaleuiskia ijkon kemej kipaleuijtoya Jesús. Akin tikchiuaj kemej Cristo no tikchiujkej se taman kemej nejon. Keman timomachtijkej itech Biblia ke Jesús techyoleua maj timochiuakan tiimomachtijkauan, timotemaktijkej iuan Jiova uan timoauijkej. ¿Keyej? Porin semi titakuaujtamatiaj ke Jiova uan Jesús techpaleuiskiaj (Juan 14:1; xikonixtajtolti 1 Pedro 2:21).

Pedro uelik nejnemik aixko porin kipiaya takuaujtamatilis

4, 5. ¿Keyej takuaujtamatilis kitelpia ipatiuj?

4 Takuaujtamatilis kitelpia ipatiuj porin techpaleuia maj tikchiuakan seki taman tein moita ke amo ueliskia tikchiuaskej (Mat. 21:21, 22). Kemej neskayot, Pedro uelik nejnemik aixko porin kipiaya takuaujtamatilis. Tejuan no tikchiuanij seki taman tein ouij porin titakuaujtamatij. Kemej neskayot, timiakej senkis tikpatanij kemej timonejnemiltiayaj. Uan taltikpakneminij akin ipa techixmatiaj kiitaj ke axkan amo timonejnemiltiajok kemej achto. Tikpatakej nochi nejon porin tiktasojtaj Jiova uan yejuatsin techpaleuij maj ijkon tikchiuanij (xikonixtajtolti Colosenses 3:5-10). Uan no, kemej titakuaujtamatij timotemaktijkej iuan Jiova uan timochiujkej tiitasojikniuan. Nejin amo ueliskia tikchiuaskej komo Dios amo techpaleuiskia (Efes. 2:8).

5 Takuaujtamatilis no kitelpia ipatiuj porin techmaka chikaualis tein techpaleuia maj tikixnamikikan tayejyekolis tein techtalilia Satanás, akin kitelpia chikaualis (Efes. 6:16). Uan no, takuaujtamatilis techpaleuia maj tikxikokan kuejmolmej. Jiova motenkaua touan ke komo iuan titakuaujtamatij uan tiktayekanaltiaj tiktekitiliskej, yejuatsin techmakas nochi tein techpoloua (Mat. 6:30-34). Uan komo titakuaujtamatij, techkauas maj tinemikan nochipaya itech Xochital (Juan 3:16).

MAJ AMO TIKPOLOKAN TAKUAUJTAMATILIS

6, 7. 1) ¿Kemej toni tamatij ejekat uan at tein kiajkotamotaya chikaujkaejekat tein Pedro semi kimouilij? 2) ¿Keyej tikijtouaj ke akin yeski uelis kipolos itakuaujtamatilis?

6 Maj oksepa ika titajtokan Pedro. ¿Keyej mouik keman nejnentiyaya aixko? Biblia kijtoua ke amo kiitakok Jesús uan sayoj kiitak chikaujkaejekat (Mat. 14:30). Nejon kichiuak maj peua kipolo itakuaujtamatilis uan maj peua pankalaki. Uelis tikijtoskej ke kuejmolmej uan tayejyekolismej tein mojmostaj ika timoixnamikij tamatij kemej ejekat uan at tein kiajkotamotaya nejon chikaujkaejekat. Maski nejin kuejmolmej uelis yeskij tel ouijkej, Jiova uelis techmakas chikaualis tein techpaleuis maj tikxikokan. Sayoj ke komo sayoj tikitaj kuejmolmej, uelis peuas amo titakuaujtamatiskejok ke Jiova techpaleuis.

Komo sayoj tikitaj kuejmolmej tein tikpiaj, uelis peuas tikpoloskej totakuaujtamatilis

7 Akin yeski uelis kipolos itakuaujtamatilis. ¿Keyej ijkon tikijtouaj? Porin Biblia kijtoua ke amo se kipias takuaujtamatilis yejua “ne tajtakol ten techmekania”, oso tein ijsiujka techmekauia (Heb. 12:1). Komo sayoj tikitaj kuejmolmej  tein tikpiaj ijkon kemej kichiuak Pedro, uelis peuas tikpoloskej totakuaujtamatilis. ¿Keniuj uelis tikmatiskej ox totakuaujtamatilis amo chikauakok? Maj tikitakan seki netajtanilmej tein techpaleuis maj tikmatikan.

8. ¿Toni uelis kichiuas maj amo titakuaujtamatikanok itech tein Jiova motenkauani?

8 ¿Tiksentokaj titakuaujtamatij itech tein Jiova motenkauani? Kemej neskayot, Jiova motenkaua ke amo uejkaua kiixpolos tein amo kuali tein mochiujtok itech nejin taltikpak kampa Satanás taixyekantok. Sayoj ke komo timokauaj maj techtapololti neixpetanilis tein onkak nikan taltikpak, uelis amo titakuaujtamatiskejok ke amo uejkaua ejkos tamilis (Hab. 2:3). Maj tikitakan okse neskayot. Jiova no motenkauak techtapojpoluis totajtakoluan itechkopa inemilis Jesús tein kitemakak. Sayoj ke komo tiksentokaj itech titanemiliaj nepololmej tein achto tikchiujkej, uelis tiomeyolouaskej ox Jiova techtapojpoluijya (Hech. 3:19). Nejon uelis kichiuas maj amo techyolpaktiok tiktekitiliskej Jiova uan maj amo tiksentokakanok tikteixmatiltikan kuali tanauatilmej.

9. ¿Toni uelis panos komo amo tiktayekanaltiajok tiktekitiliskej Jiova itech tonemilis?

9 ¿Tiksentokaj tiktekitiliaj Jiova ika nochi toyolo? Keman senkis tiktekitiliaj Jiova techpaleuia maj tikitakan nemilis nochipaya tein tikchiaj tikseliskej. Sayoj ke ¿toni uelis panos komo peua tiktayekanaltiaj okseki taman itech tonemilis? Kemej neskayot, uelis tikseliskej se tekit kampa kuali techtaxtauiskej sayoj ke amo techkauasok maj semi tiktekitilikan Jiova kemej achto. Nejin uelis kichiuas maj totakuaujtamatilis amo chikauakok moajsi uan maj amo tiksentokakanok tiktekitilikan Jiova ika nochi toyolo (Heb. 6:10-12).

Imomachtijkauan Jesús kimatiaj ke moneki se kipias takuaujtamatilis tein tapaleuia maj se kintapojpolui oksekin

10. ¿Keyej tikijtouaj ke keman tikintapojpoluiaj oksekin tiknextiaj ke titakuaujtamatij iuan Jiova?

10 ¿Techouijmaka titetapojpoluiskej? Keman oksekin techyolxokoliaj, ¿tikualanij uan amo iniuan titajtouajok? Komo ijkon tikchiuaj, uelis semi tiktayekanaltijtoskej tein tejuan tikmachiliaj. Sayoj ke komo tikintapojpoluiaj akin techyolxokoliaj, tiknextiaj ke titakuaujtamatij iuan Jiova. ¿Keyej tikijtouaj nejon? Tikmatij ke komo tiknekij maj Jiova techtapojpolui totajtakoluan, moneki tikintapojpoluiskej oksekin (Luc. 11:4). Keman tikintapojpoluiaj, tiknextiaj ke titakuaujtamatij ke Jiova kiyolpaktis tein tikchiuaj uan ke techtapojpoluis. Uan nejon okachi moneki ke tikchiuaskej maj oksekin kimachilikan tein tejuan tikmachilijkej keman teisa techchiuilijkej. Imomachtijkauan Jesús kimatiaj ke moneki se kipias takuaujtamatilis tein tapaleuia maj se kintapojpolui oksekin. Yejua ika, keman Jesús kiniluij maj kintapojpoluianij hasta akin miakpa kinyolxokoliskiaj, yejuan kiluijkej: “Xitechonmajxitili totakuautamatilis kachi ok” (Luc. 17:1-5).

11. ¿Toni moneki amo tikchiuaskej keman aksa techyolmajxitia?

 11 ¿Techouijmaka tikseliskej tein techyolmajxitiaj? Keman aksa techyolmajxitia, moneki tikitaskej keniuj uelis techpaleuis tein techiluia. Sayoj ke amo teyi ika techpaleuis komo okachi tikitiliaj inepololuan oso tiktemouaj tikajsiskej nepololmej itech tein techiluia (Prov. 19:20). Okachi kuali maj tikpiakan takuaujtamatilis uan maj tikitakan nejon kemej se taman tein techpaleuia maj titanemilikan kemej Jiova.

12. ¿Toni tiknextiaj komo nochipa amo kuali ininka titajtouaj akin taixyekanaj itech nechikol?

12 ¿Amo kuali ininka titajtouaj akin taixyekanaj itech nechikol? Keman israelitas kikakkej tein amo kuali tein kitematiltijkej majtakti tapijpianij, amo kuali ika tajtojkej Moisés uan Aarón. Yejua ika Jiova kitajtanij Moisés: “¿Hasta kemanian amo nechpoujkaitas nejin xolal, uan hasta kemanian amo nouan takuaujtamatiskej maski nikchiuani miak uejueyi tachiualismej kampa yejuan moajsij?” (Núm. 14:2-4, 11). Keman israelitas amo kuali ininka tajtojkej takamej akin Jiova kinixpejpenka maj kinixyekanakan, kinextijkej ke amo takuaujtamatiaj iuan yejuatsin. No ijkon, komo nochipa amo kuali ininka titajtouaj takamej akin Jiova kinixtalia maj taixyekanakan itech nechikol, tiknextiaj ke amo chikauakok totakuaujtamatilis iuan yejuatsin.

13. ¿Keyej moneki amo timosenkauaskej komo tikitaj ke amo chikauakok totakuaujtamatilis?

13 Satepan ke timomachtijkej nejin netajtanilmej, xa tikitaskej ke amo chikauakok totakuaujtamatilis. Sayoj ke moneki amo timosenkauaskej. Maj tikelnamikikan ke hasta tatitanil Pedro mouik uan kipoloj itakuaujtamatilis. Uan kemansa, Jesús monekik kinyolmajxitis nochin tatitanilmej porin amo semi chikauak katka inintakuaujtamatilis (Mat. 16:8). Maski ijkon, tein kichiuak Pedro satepan ke peuak kipoloua itakuaujtamatilis uan pankalaki aijtik uelis techmachtis se taman tein motelneki.

 KENIUJ OKSEPA MOCHIKAUAS TOTAKUAUJTAMATILIS

14, 15. 1) ¿Toni kichiuak Pedro keman peuak pankalaki aijtik? 2) ¿Keniuj uelis kuali tikitaskej Jesús?

14 ¿Toni kichiuak Pedro keman peuak pankalaki aijtik? Yejua tel kuali moakalakiaya oso ajkuia, yejua ika ueliskia ajkuis uan mokepaskia itech barco (Juan 21:7). Sayoj ke amo ijkon kichiuak. ¿Keyej? Porin amo kitemoj iselti momakixtis, ta kiitak Jesús uan kitajtanij maj kipaleuiani. Komo tikitaj ke totakuaujtamatilis amo chikauakok, moneki tikchiuaskej kemej Pedro. ¿Keniuj?

15 Pedro kiitak Jesús. Tejuan no moneki kuali tikitaskej Jesús, kemej kijtoua Biblia (Heb. 12:2, 3). (Xikonita kampa kijtoua “Tein okachi momelaua”.) Sayoj ke tejuan amo ueli tikitaj Jesús ika toixtololouan kemej kiitaya Pedro. Komo ijkon, ¿keniuj uelis kuali tikitaskej Jesús? Komo timomachtiaj tein kichiuak uan tein tamachtij, uan komo tikchiuaj kemej yejua. Komo tikchiuaj nejin, techpaleuis maj oksepa mochikaua totakuaujtamatilis. Maj tikitakan seki taman kemej uelis tikchiuaskej kemej Jesús.

Keman senkis tikitaj ineskayo Jesús uan tiktojtokaj ika nejmachkayot, totakuaujtamatilis okachi mochikaua (xikonita párrafo 15)

16. ¿Keniuj uelis tikchikauaskej totakuaujtamatilis ika Biblia?

16 Maj tikchikauakan totakuaujtamatilis itech Biblia. Jesús senkis kineltokaya ke tein kijtoua iTajtol Dios melauak uan ke kipia okachi kuali tayolmajxitilis (Juan 17:17). Komo tiknekij tikchiuaskej kemej Jesús uan tiknekij maj totakuaujtamatilis chikauak moajsi, moneki mojmostaj tikixtajtoltiskej Biblia, timomachtiskej uan itech titanemiliskej tein techmachtia. No moneki tiktemoskej itanankililuan netajtanilmej tein uelis tikpiaskej. Kemej neskayot, ¿senkis tikonneltoka ke tinemij itech itamian tonalmej? Xionmomachti tein Biblia achtook kijtojka ke mochiuaskia itech itamian tonalmej uan tikonchikauas motakuaujtamatilis. ¿Senkis tikonneltoka ke Jiova kichiuas tein motenkauak? Xionmomachti tein Biblia achtook kijtojka ke panoskia uan tein ijkon mochiuakya uan tikonchikauas motakuaujtamatilis. ¿Senkis tikonneltoka ke tein tayolmajxitia Biblia tapaleuia axkan? Xikonixtajtolti keniuj keman seki tokniuan kichiuanij tein Biblia tayolmajxitia kinpaleuiani maj kipiakan okachi kuali nemilis uan tikonchikauas motakuaujtamatilis (1 Tes. 2:13). *

17. 1) ¿Toni kipaleuij Jesús maj kixikouani uejueyi tayejyekolismej? 2) ¿Keniuj uelis tikchiuaskej kemej Jesús?

17 Maj itech titanemilikan tein Jiova motenkauani techmakas. Jesús itech tanemilij tein Jiova motenkaujka kimakas. Nejon kipaleuij maj kixikouani uejueyi tayejyekolismej (Heb. 12:2). Yejua amo mokauak maj kitapololtiani tein ueliskia kiselis nikan taltikpak (Mat. 4:8-10). ¿Keniuj uelis tikchiuaskej kemej Jesús? Komo itech titanemiliaj tein Jiova motenkauani techmakas. ¿Toni uelis mitsonpaleuis xikonchiua nejin? Xikonnemili keniuj yeski nemilis itech Xochital. Uelis tikonijkuilos oso tikonneskayotis itech se amat tein tikonuelitaskia tikonchiuas ompa. Oso uelis tikonijkuilos inintokay taltikpakneminij akin moajokuiskej uan tikonuelitaskia iniuan tiontajtos uan no uelis tikonijkuilos toni tikoniluiskia. Xikonnemili ke tein Dios motenkauak kichiuas no motenkaua mitsonmakas tejuatsin.

18. ¿Toni uelis techpaleuis maj tikpiakan okachi takuaujtamatilis?

18 Maj tiktajtanikan Jiova maj techmaka okachi takuaujtamatilis. Jesús kinmachtij itatojtokakauan maj kitajtanianij Jiova maj kinmakani yektikatsin espíritu (Luc. 11:9, 13). Yektikatsin espíritu kichiuas maj tikpiakan okachi  takuaujtamatilis, porin takuaujtamatilis poui itech takilot tein kitemaka espíritu. No uelis tiktajtaniskej Jiova maj techpaleui maj tikixnamikikan tein kichiua maj tikpolojtiyakan totakuaujtamatilis. Kemej neskayot, komo tikitaj ke techouijmaka tikintapojpoluiskej oksekin, uelis tiktajtaniskej Jiova maj techmaka chikauak takuaujtamatilis uan maj techpaleui maj titetapojpoluikan.

19. ¿Akonimej moneki tikinixpejpenaskej kemej totasojikniuan?

19 Maj tikinixpejpenakan kemej totasojikniuan akin kipiaskej chikauak inintakuaujtamatilis. Jesús kuali kinixpejpenak itasojikniuan. Tatitanilmej katkaj okachi kuali itasojikniuan porin amo kikauayaj uan kitakamatiaj (xikonixtajtolti Juan 15:14, 15). Tejuan no moneki tikinixpejpenaskej kemej totasojikniuan akin kipiaj chikauak inintakuaujtamatilis uan akin kitakamatij Jesús. Kuali tasojiknimej amo motatiliaj teisa. Techyolmajxitiaj keman ijkon moneki kichiuaskej. Uan komo tejuan moneki tikinyolmajxitiskej, yejuan kiseliaj tein tikiniluiaj (Prov. 27:9).

20. ¿Keyej moneki tikinpaleuiskej okseki taltikpakneminij maj kipiakan se chikauak takuaujtamatilis?

20 Maj tikinpaleuikan okseki taltikpakneminij maj kipiakan chikauak takuaujtamatilis. Jesús kichiuak uan kijtoj miak taman tein ika kinpaleuij imomachtijkauan maj kichikauanij inintakuaujtamatilis (Mar. 11:20-24). Tejuan no moneki tikinpaleuiskej oksekin maj kichikauakan inintakuaujtamatilis. Ijkon no tikchikauaskej totakuaujtamatilis (Prov. 11:25). ¿Keniuj uelis tikchikauaskej inintakuaujtamatilis oksekin? Keman tikintapouiaj taltikpakneminij kuali tanauatilmej uelis tikinmelauiliskej keyej tikneltokaj ke Dios yekmelauj nemi, ke toka motekipachoua uan ke yejuatsin itanemililuan tein moajsij itech Biblia. No uelis tikinpaleuiskej tokniuan maj kipiakan chikauak takuaujtamatilis. Kemej neskayot, komo tikakij ke se tokniuj amo kuali ininka tajtoua akin taixyekanaj itech nechikol, amo moneki tiknemiliskej tein amo kuali nion amo iuan titajtoskejok. Moneki tikpaleuiskej ika nejmachkayot maj okachi takuaujtamati iuan Jiova uan maj iniuan takuaujtamati tokniuan akin taixyekanaj (Jud. 22, 23). ¿Titelpochok oso tiichpochok uan tiyajtok kaltamachtiloyan? Komo motamachtijkauj ika tajtoua ke nemilis iselti peuak, ximoyolchikaua uan xikmatilti ke senkis tikneltoka ke Dios kichijchiuak nochi tein onkak. Amo ximonemili ke motamachtijkauj uan akin iniuan timomachtia amo kuali kiitaskej tein tikneltoka. Xa panos tein amo tikchiaya uan kuali tanankiliskej.

21. ¿Itech toni taman techpaleuis Jiova tisejsemej?

21 Kemej tikitakej, Jiova uan Jesús kipaleuijkej Pedro maj moijkuaniliani moujkayot uan maj kipiani se chikauak takuaujtamatilis. Uan satepan, Pedro techkauilij tinochin se tel kuali neskayot ika takuaujtamatilis. Jiova no techpaleuis tisejsemej maj tikpiakan se chikauak takuaujtamatilis (xikonixtajtolti 1 Pedro 5:9, 10). Komo timochikauaj tikchiuaskej nejin, tikseliskej miak tatiochiualismej uan tikitaskej ke amo nenkaj tein tikchiujkej.

^ párr. 16 Kemej neskayot, xikonita tamachtilis “ITajtol Dios kipatak ininnemilis”, tein kisa itech amaix Tanejmachtijkej tein motemaka itech tanojnotsalis.